އެމްޑީޕީ އަދި ޕީޕީއެމްގައި ވެސް ކޮރަޕްޝަނާއި ހަރުކަށި ފިކުރު އޯކޭ ނޫން މެމްބަރުން އެބަތިބި ކަމަށް އެމްޑީޕީގެ ޗެއާޕާސަން ހަސަން ލަތީފް ވިދާޅުވެއްޖެއެވެ.
ހަސަން ކުރެއްވި ޓްވީޓްގައި އިތުރަށް ވިދާޅުވެފައިވަނީ އެމްޑީޕީގައި އުއްމީދުތަކަކާއި އުސޫލުތަކެއްވާ ކަމަށެވެ.
MDP gai vey ummeed thakakaa usoolu thakeh. Alhugandumen beynumee kaabafain ulhunu reethi Islam dheenugai thiben. E ee Raajje Afghanistan akah nuve salaamaiy vaan oiy magu. MDP aa PPM gaives corruption aa vakkama harukashi fikuru OK noon ethah membarunneh eba thibi.
— Hassan Latheef🎈 (@HassanLatheef) July 14, 2021
"އެމްޑީޕީގައި ވޭ އުއްމީދު ތަކަކާއި އުސޫލުތަކެއް. އަޅުގަނޑުމެން ބޭނުމީ ކާބަފައިން އުޅުނު ރީތި އިސްލާމްދީނުގައި ތިބެން. އެއީ ރާއްޖެ އަފްޣާނިސްތާން އަކަށް ނުވެ ސަލާމަތްވާން އޮތް މަގު. އެމްޑީޕީ އާއި ޕީޕީއެމްގައި ވެސް ކޮރަޕްޝަނާއި ވައްކަމާއި ހަރުކަށި ފިކުރު އޯކޭ ނޫން އެތައް މެމްބަރުންނެއް އެބަތިބި" ހަސަން ވިދާޅުވިއެވެ.
ހަސަން މިހެން ވިދާޅުވެފައިވާ އިރު ދާދި ފަހުން މަޖިލިސް ރައީސް މުހައްމަދު ނަޝީދު ވެސް ވަނީ އެމްޑީޕީ ތެރޭގައިވެސް ހަރުކަށި ވިސްނުން އެބަ އުޅޭ ކަމަށާއި، އެމްޑީޕީގެ ގްރޫޕްތަކުގައި ތިބި ހަރުކަށި ފިކުރަށް ތާއީދުކުރާ މީހުން ގްރޫޕުން ނެރުމަށް މަސައްކަތް ކުރަންޖެހޭ ކަމަށް ވިދާޅުވެފައެވެ.
"މި ގުރޫޕްގެ އެޑްމިންވެސް މިކަން ބަލާ. މި ގްރޫޕްގައި ތިބި ހަރުކަށި، ޖިހާދީ ފިކުރުގެ މީހުން ގްރޫޕުން ވަކި ކުރުން ވަރަށް މުހިންމު" ނަޝީދުގެ މެސެޖެއްގައި ވިދާޅުވެފައިވެއެވެ.
އަދި ރާއްޖޭގައި ހަރުކަށި ފިކުރުގެ މީހުންގެ ގާތްގަނޑަކަށް 1000 މީހުން އެބަތިބި ކަމަށާއި އެމީހުން ތަމްރީނު ވަނީ ފަޅު ރަށްރަށަށް ގޮސް ކަމަށެވެ. މީގެއިތުރުން އެ ފަރާތްތަކުން އުޅެނީ ކަންނެލި އޮޑިތަކާއި ޑިންގީ އަދި ލޯންޗު ފަހަރުގައި ކަމަށްވެސް ނަޝީދު ވިދާޅުވިއެވެ.
އަދި ރާއްޖެ އަހަރެމެންގެ ދަރިންނަށް ދޭން ޖެހޭނެ ކަމަށާއި ނަމަވެސް ރައީސް އިބްރާހިމް މުހައްމަދު ސޯލިހު ވެސް މިއަދު ހުންނެވީ ތާށިވެފައި ކަމަށް ނަޝީދު ވިދާޅުވިއެވެ.