ކުރިޔަށް އޮތް ބަންދުގައި ބޭންކިންގ ޚިދުމަތްދެވޭނީ ޖުލައި 21 އަދި 27 ވަނަ ދުވަހު އެކަނި ކަމަށް މަރުކަޒީ ބޭންކް، އެމްއެމްއޭއިން ހާމަކޮށްފިއެވެ.
ކުރިއަށް އޮތް ދެ ހަފްތާ ސަރުކާރު ބަންދުވާނެއެވެ. އެހެން ކަމުން މިއާއި ގުޅިގެން އެމްއެމްއޭއިންވަނީ ބޭންކުންތަކުން ޚިދުމަތް ދެވޭނެ ގަޑިތައް އަންގާފައެވެ. އެގޮތުން ފައިސާ ބަލައިގަނެ ދޫކުރުމާއި، ސިޓީ އާއި އެހެނިހެން ތަކެތި ބަލައިގަނެ ދޫކުރެވޭނީ މިމަހުގެ 21ވާ ބުދަދުވަހާއި 27ވާ އަންގާރަ ދުވަހުގެ 8:30ން 14:00 އަށެވެ.
ކުރިން ހަމަޖެހިފައި އޮތްގޮތުން ސަރުކާރު ބަންދުކޮށްފައިވަނީ މިމަހުގެ 27 ގެ ނިއަލަށެވެ. ނަމަވެސް އަންގާރަ ދުވަހު ވަނީ މިމަހުގެ 28 އާއި 29އަކީވެސް ސަރުކާރު ބަންދު ދުވަސްތަކުގެ ގޮތުގައި ކަނޑައަޅާފައެވެ.
މިގޮތަށް ހަމަޖައްސަވައިދެއްވާފައި ވަނީ އަޟްޙާ ޢީދާއި، މިނިވަން ދުވަހާ ގުޅިގެން ޗުއްޓީގައްޔާއި އަދި އެނޫން އެހެން ބޭނުންތަކުގައި ރަށުން ބޭރަށް ދާން ބޭނުންވާ މުވައްޒަފުންނަށް ދަތިތަކެއް ކުރިމަތިވެދާނެތީ، އެކަމަށް ލުޔެއް ދެއްވުމުގެ ގޮތުންނާއި، ބަންދު ދުވަސްތައް މެދުކެނޑުމެއް ނައިސް މުވައްޒަފުންނަށް ޗުއްޓީ ލިބޭގޮތަށް ހަމަޖައްސަވައި ދެއްވުމުގެ ގޮތުން ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހްއެވެ.
މިގޮތަށް ހަމަޖެއްސެވުމާއިއެކު ބަންދު ދުވަސްތަކަށްފަހު ސަރުކާރުގެ އޮފީސްތައް ހުޅުވޭނީ، 2021 އޮގަސްޓު 1 ވާ އާދީއްތަ ދުވަހުގައެވެ.