މާލެ ސަރަހައްދުގައި ކޮވިޑް-19 އިން ދިފާއުވުމަށް ޖަހާ ވެކްސިން ޖެހުން ކުރިޔަށް އޮތް އީދު ބަންދަށް މެދުކަނޑާލަން ނިންމާފައިވާކަން ހެލްތް އެމާޖެންސީ އޮޕަރޭޝަން ސެންޓަރ (އެޗްއީއޯސީ)ން ހާމަކޮށްފިއެވެ.
މި މަހު ވެކްސިން ޖަހާ އެންމެ ފަހު ދުވަހަކީ އަންނަ ހޮނިހިރު ދުވަސް ކަމަށް ވެސް އެޗްއީއޯސީއިން ވަނީ ބުނެފައެވެ. އަދި މިވަގުތު ރާއްޖޭގައި ޖަހަމުންދަނީ ވެކްސިންގެ ދެ ވައްތަރު ކަމަށްވާ ސިނޮފާމް ވެކްސިން އާއި ކޮވިޝީލް ވެކްސިނެވެ.
އިއްޔެ އާ ހަމައަށް ރާއްޖެއިން ޖުމްލަ 319،378 މީހަކަށް ވަނީ ވެކްސިންގެ ފުުރަތަމަ ޑޯޒް ޖަހާފައެވެ. އަދި ދެވަނަ ޑޯޒް ޖެހި މީހުންގެ އަދަދު ވަނީ 242،370 އަށް އަރާފައެވެ.
މިހާރު މާލެ އާއި އެހެނިހެން ރަށްތަކުގައި ވެކްސިން ޖަހަމުންދަނީ އެޕޮއިންޓްމަންޓް ހައްދައިގެންނެވެ. ވެކްސިން ޖެހުމަށް މިވަގުތު އެޕޮއިންޓްމެންޓް ހަދާފައި ވަނީ މަދު ފަރާތްތަކެއް ކަމަށާއި، އޭޕްރިލް މަހު ވެކްސިންގެ ފުރަތަމަ ޑޯޒް ޖަހާފައިވާ ފަރާތްތަކަށް ދެ ވަނަ ޑޯޒް ޖެހުމަށް ފުރުސަތު ހުޅުވާލާފައިވާ ކަމަށް އެޗްއީއޯސީއިން ބުނެއެވެ.
އައްޑޫގައި އެޕޮއިންޓްމަންޓް ހައްދައިގެން ޖަހަމުންދިޔަ ކޮވިޝީލްޑް ވެކްސިން މިވަގުތު ވަނީ ހުސްވެފައެވެ. ކޮވިޝީލްޑް ޖެހުމަށް ހަމަޖެހިފައިވަނީ ފުރަތަމަ ޑޯޒް ވެސް ކޮވިޝީލްޑް ޖަހާފައިވާ ފަރާތްތަކެވެ. އަލަށް ވެކްސިން ޖަހާ ފަރާތްތަކަށް ޖެހުމަށް ހަމަޖެހިފައިވަނީ ސިނޮފާމް ވެކްސިނެވެ.