އިންޑޮނޭޝިއާގައި ކޮވިޑް ޖެހޭ މީހުންގެ އަދަދު އިތުރުވެ ސިއްހީ ޚިދުމަތަށް ނުކަތާ ވަރަށް ދާން ފަށައިފިއެވެ.
ފާއިތުވި 24 ގަޑިއިރުތެރޭގައި އެ ގައުމުން 54،517 އާ ޕޮޒިޓިވް ކޭސް ވަނީ ރެކޯޑް ކުރެވިފައެވެ. 270 މިލިއަންގެ އާބާދީއެއް އޮންނަ އިންޑޮނޭޝިއާގައި ކޮންމެ ދުވަހަކު މި ފަދަ އަދަދަކަށް މީހުން ޕޮޒިޓިވް ވުމަކީ އެ ގައުމުގެ ސިއްހީ ނިޒާމު ގުޑައިގެން ހިނގައިދާނެ ކަމެއް ކަމަށް ތަޖުރިބާކާރުން ބުނެއެވެ.
ދިރާސާއަކުން ދައްކާ ގޮތުގައި ޖަކާޓާގައި އެކަނި ވެސް 10.6 މިލިއަން މީހުންނަށް ވަނީ މި ބަލި ޖެހިފައެވެ. ތަޖުރިބާކާރުން ބުނާ ގޮތުގައި މިއީ ލޮކްޑައުން ކުރަން ޖެހުނު ހާލަތްތަކުގައި ލޮކްޑައުން ނުކޮށް ފަރުވާ ކުޑަވެ، ކޮންޓެކްޓް ޓްރޭސިންގ ރަނގަޅަށް ނަހަދާ ކުރިޔަށް ދިޔުމުގެ ނަތީޖާއެވެ.
ބުދަ ދުވަހު އެކަނި ވެސް 991 މީހަކު ވަނީ މިބަލީގައި އެގައުމުން މަރުވެފައެވެ. އެއާއިއެކު ޖުމްލަ މިހާތަނަށް އިންޑޮނޭޝިއާއިން ކޮވިޑްގައި މަރުވި މީހުންގެ އަދަދު ވަނީ 69210 އަށް އަރާފައެވެ.
ހޮސްޕިޓަލްތައް ވަނީ ފުރިފައެވެ. ޖޫން މަހުން ފެށިގެން އޮކްސިޖަން ނުލިބުމުގެ ދަތިތަކާއި އެ ގައުމު ދަނީ ކުރިމަތި ލަމުންނެވެ. 120،000 މީހުންނަށް މި ވަގުތު ވެސް ދަނީ އެޑްމިޓް ކުރެވި ފަރުވާ ދެމުންނެވެ. ހޮސްޕިޓަލްތަކުގެ އިތުރު މީހުންނަށް ފަރުވާ ނުދެވޭނެ ކަމަށް ދަނީ ބުނަމުންނެވެ.
ހޮސްޕިޓަލުން ޖާގަ ނުލިބި ގޭގައި ތިބެ އެތައް ބަޔަކު ދަނީ މަރުވަމުންނެވެ. ކަށުކަމާކެމީގެ ކަންތައް ކުރާ ފަރާތްތައް ވަރުބަލިވާން ފަށައިފިއެވެ. ދުވާލަކު އެތައް ސަތޭކަ މީހުން ކަފުން ކުރާނެ ކަފާއި ކަފުން ވެސް ގަންނަން ލިބުން ދަތިވާ ހިސާބަށް އެގައުމުގެ ހާލަތު ވަނީ ގޯސްވެފައެވެ.
މިދިޔަ އަންގާރަ ދުވަހު އިންޑިނޭޝިއާއަށް ވަނީ އެސްޓްރަޒެނެކާގެ ވެކްސިން 3.5 މިލިއަން ޑޯޒް ލިބިފައެވެ.