ޔޫރަޕަށް ވަރަށް ގަދައަށް ވިއްސާރަވެ، މިހާތަނަށް 40 މީހުން މަރުވެ އެތައް ބަޔަކު ގެއްލިގެން ހޯދަން ފަށައިފިއެވެ.
މި ވިއްސާރައިގައި ފެންބޮޑުވެފައިވާ ގައުމުތަކުގެ ތެރޭގައި، ޖަރުމަން، ބެލްޖިއަމް، އަދި ނެދަލޭންޑް ހިމެނެއެވެ. ބޯކޮށް ވާރޭ ވެހުމުގެ ސަބަބުން ކޯރުތައް ބަންޑުންވުމާއި ގުޅިގެން ފެންބޮޑު ވުމުގެ ސަބަބުން ވަރަށް ބޮޑެތި ގެއްލުންތަކާއި މި ގައުމުތަކުން ދަނީ ކުރިމަތި ލަމުންނެވެ.
މީހުން ސަލާމަތް ކުރުމަށް މަސައްކަތް ކުރާ ފަރާތްތަކުން ވަނީ މީހުން ހޯދުމުގެ މަސައްކަތް ފަށާފައެވެ. ގިނަ އަދަދެއްގެ މީހުން ވަނީ ގެތަކުގައި ތާށިގެވެފައެވެ. އަދި އެތައް ސަތޭކަ މީހުންނެއް ވަނީ ވީނުވީއެއް ނޭނގި ގެއްލިފައެވެ.
ސަލާމަތް ކުރެވުނު މީހުންނަށް މަދުވެގެން ހަތަރު ދުވަސްވަންދެން އުޅެވޭނެ ގޮތާއި ކާބޯތަކެތި ފޯރުކޮށް ދެވިފައިވާ ކަމަށް ރިޕޯޓްތައް ބުނެއެވެ.
500 އެއްހާ ސިފައިން ވަނީ އެންމެ ބޮޑަށް އަސަރު ކޮށްފައިވާ ޖަރުމަން ސަރަހައްދުގައި މީހުންނަށް އެހީވުމަށް ފޮނުވާފައެވެ. ގެތައް ފެނުއަޑީގައިވީ އިރު ކާރުތަކާއި ދަތުރުފަތުރު ކުރާ ވެހިކަލްތައް ވަނީ ފެނުތެރޭގައެވެ.
ގައުމުތަކުގެ މަގުތައް ވަނީ ބޮޑެތި ގަސްތަކާއި ކުނިން ފުރިފައެވެ. މަގުތަކުން ދަތުރު ކުރެވޭނެ އެއްވެސް ގޮތެއް އެ ތަންތަން ސާފު ކުރެވިގެން ނޫނީ ނެތެވެ. މި ހާލަތުގައި މީހުން ހޯދުމުގެ މަސައްކަތުގައި އުޅޭ ފަރާތްތަކަށް ވަނީ ބޮޑެތި ގޮންޖެހުން ތަކާއި ކުރިމަތިލާން ޖެހިފައެވެ.
އެއްތަނުން އަނެއް ތަނަށް ދަތުރު ކުރުން އިންތިހާއަށް އުނދަގޫވެފައިވާ މި ދަނޑިވަޅުގައި މީހުން ހޯދުމަށް ގިނަ ވަގުތު ތަކެއް ނަގާނެ ކަމަށް އެކަމުގައި ހަރަކާތްތެރިވާ ފަރާތްތަކުން ދަނީ ބުނަމުންނެވެ. އެ ވަގުތުގެ ތެރޭގައި އެތައް ބައެއްގެ ފުރާނަ ގެއްލިދާނެ ކަމުގެ ބިރުވަނީ އާއިލާތަކަށް ހީވެފައެވެ.
މި ހާދިސާގައި މަރުވި މީހުން ސީދާ އަދަދެއް އަދި ސާފެއް ނުވެއެވެ.