އިންޑޮނޭޝިއާގެ ގެތަކުން ކޮންމެ ދުވަހަކު އެކަނި ތިބެ މަރުވެފައިތިބި އެތައް ބައެއްގެ ހަށިތައް، މީހުން ވަޅުލުމުގައި އުޅޭ ފަރާތްތަކުން ދަނީ ނަގާ ވަޅުލަމުންނެވެ.
އެކަނި ތިބެ މަރުވެފައިތިބޭ ފަރާތްތަކަކީ އޮކްސިޖަން ލިބޭނެ ގޮތެއް ނެތި، ހޮސްޕިޓަލުން ޖާގަ ނެތުމުގެ ސަބަބުން ގެއަށް ފޮނުވާލުމުން ކޮވިޑާއި ގޭގައި އެކަނި ތިބެ ހަނގުރާމަކޮށް މި ދުނިޔެއަށް އަލްވަދާޢު ކިޔާފައިވާ ފަރާތްތަކެވެ. ކޮންމެ ދުވަހަކު ވެސް މި ފަދަ އެތައް ހަށިގަނޑެއް ގެތަކުން ނެރެގެން ގޮސް ވަޅުލާން ޖެހޭ ކަމަށް އަލިފާން ނިއްވުމުގައި ހަރަކާތްތެރިވާ ފަރާތްތަކުން ބުނެއެވެ. އެ ގައުމުގެ މިހާލަތުގައި އަލިފާން ނިއްވާ މީހުން ނެރެފައިތިބީ މަރުވާ މީހުން ހޯދާ އެ މީހުން ވަޅުލުމުގެ މަސައްކަތަށެވެ.
2.7 މިލިއަން މީހުންނަށް އިންޑޮނޭޝިއާގައި މި ބަލި ވަނީ ޖެހިފައެވެ. އިއްޔެ އެކަނި ވެސް 50،000 އަށްވުރެ ގިނަ އާ ކޭސް ވަނީ ފެނިފައެވެ. ޑެލްޓާ ވޭރިއަންޓުގެ ސަބަބުން އެ ގައުމުގެ ހާލަތު ވަރަށް ބޮޑަށް ގޯސްވެ އޭޝިއާގެ އެންމެ ކޮވިޑް ހާލަތު ދަށް ގައުމަކަށް އެ ގައުމު ވަނީ ވެފައެވެ.
އާންމުު ގޮތެއްގައި އަވަށްޓެރިން ގުލާފައި ގެ ކައިރި ގެއެއްގެ މީހަކު ނުފެންނަތާ ދުވަސް ވެއްޖެ ކަމަށް ބުނަނީ ކަމަށާއި ދެ ކަމާއި ބެހޭ ފަރާތުން އެ ގެއަކަށް ދާއިރު ފެންނަނީ އެމީހެއްގެ ފުރާނަ ނެތް މަސްގަނޑު ކަމަށް ވީރާވަން ނަމަކަށް ކިޔާ އަލިފާން ނިއްވާ މީހަކު ބުނެފައިވެއެވެ.
ކުރިން އާންމުކޮށް ދުވާލެއްގެ މައްޗަށް ދެތިން މީހަކު ވަޅުލަމުން ދިޔަ ނަމަވެސް މިހާރު ދުވާލަކަށް 20 ނުވަތަ 30 މީހުން ވަޅުލާން ޖެހޭ ކަމަށް ވެސް އޭނާ ވަނީ ބުނެފައެވެ.
އިންޑޮނޭޝިއާއިން މިހާތަނަށް ކޮވިޑް ޖެހިގެން 70،000 މީހުން ވަނީ މަރުވެފައެވެ.