އިރާގު ހޮސްޕިޓަލްގެ ކޮވިޑް ވޯޑުގައި ރޯވެ މަރުވި މީހުންގެ އަދަދު 92އަށް އަރައިފިއެވެ.
މި ހާދިސާގައި އިތުރު ސަތޭކައަށް ވުރެގިނަ މީހުން ވަނީ ޒަޚަމްވެފައެވެ. މިއީ ކޮވިޑް ޔުނިޓްގައި 3 މަސް ދުވަސްތެރޭގައި ހިނގި މިފަދަ ދެވަނަ ހާދިސާ ކަމަށް އިރާގު ނޫސް އެޖެންސީއިން ބުނެއެވެ.
ދެކުނު ނާސިރިޔާ ސިޓީގައި ހުންނަ އަލްހުސެއިން ޓީޗިންގ ހޮސްޕިޓަލުގައި ރޯވެފައިވަނީ ހޯމަ ދުވަހުގެ ވަގުތެއްގައި ކަމަށް ސިއްހީ އޮފިޝަލުން މައުލޫމާތު ދެއެވެ. އަލިފާންގަނޑު ކޮންޓްރޯލް ކޮށްފައިވަނީ ސިވިލް ޑިފެންސް ޓީމުންނެވެ.
މެޑިކަލް އޮފިޝަލުން ބުނެފައިވާ ގޮތުގައި އެ އަލިފާން ރޯވާން ދިމާވީ އޮކްސިޖަން ފުޅިއެއް ގޮވައިގެންނެވެ. ލޯކަލް ހެލްތް އޮތޯރިޓީގެ ތަރުޖަމާނު ހައިދަރު އަލްޒަމީލީ ބުނެފައިވާ ގޮތުގައި ހާދިސާ ހިނގި ދުވަހު އެ ވަގުތު ވެސް ވަނީ 52 މީހުންގެ ހަށިގަނޑު ފެނިފައެވެ. އަދި 22 މީހުންނަށް ވަނީ ވަރަށް ބޮޑަށް އަނިޔާ ލިބިފައެެވެ. ޖުމްލަ މަރުވެގެން މިހާތަނަށް ރިޕޯޓް ކުރެވުނު މީހުންގެ އަދަދު މި ވަނީ މިހާރު 92އަށް އަރާފައެވެ.
އިތުރު މީހުން އެތެރޭގައި ތާށިވެފައި ތިބޭނެ ކަމަށް ބެލެވޭ ކަމަށް ވެސް އޮފިޝަލުން ބުނެއެވެ. މި ވޯޑްގައި 70 އެނދު ހުންނަ ކަމަށް މައުލޫމާތު ލިބެއެވެ.
އިރާގުގެ ސިއްޚީ ދާއިރާގެ އިސް ފަރާތްތަކުން ދަނީ މި ހާދިސާގައި އެއްވެސް ފަރާތެއްގެ އިހުމާލެއް އޮތްތޯ ބެލުމަށް ތަހުގީގެއް ފަށާފައެވެ. އެ ގޮތުން އިހުމާލެއް އޮތް ކަމަށް ސާބިތުވެއްޖެނަމަ އެމީހަކަށް ހަރުކަށި ފިޔަވަޅު އަޅާ އަދަބު ދޭނެ ކަމަށް ވެސް ވަނީ ބުނެފައެވެ.