އައްޑޫގެ ޕްރީ ސްކޫލްތަކުގެ ފައިސާ ޓީޗަރުންނަށް ނުދެވި ލަސްވަމުން ދަނީ އެ ފައިސާ ކައުންސިލުން ދެވޭނެ ގޮތެއް ނެތިގެން ކަމަށް އައްޑޫ ސިޓީ ކައުންސިލުން ބުނެފި އެވެ.
ކައުންސިލުން ބުނީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގައި ކައުންސިލްގެ މައްޗަށް ކުރުން ލާޒިމް ކުރާ ކަންތައްތަކުގެ ތެރޭގައި ޕްރީ ސްކޫލް ހިންގުން ވެސް ހިމެނޭ ކަމަށެވެ.
"މި އަހަރު މިނިސްޓްރީ އޮފް ފިނޭންސް އިން އައްޑޫސިޓީ ކައުންސިލަށް ކަނޑައެޅުއްވި ބަޖެޓުގައި ޕްރީސްކޫލްތަކަށް ލިބުނީ، 2,730,000 ރުފިޔާ އެވެ. މި އަހަރުގެ ސެޕްޓެމްބަރު މަހުގެ ނިޔަލަށް ޚަރަދުވެފައި ވަނީ 2,240,998 ރުފިޔާ އެވެ. ޓީޗަރުންގެ މުސާރަ ދިނުމަށް ޑިސެމްބަރު މަހުގެ ނިޔަލަށް 1,041,500 ރުފިޔާ ބޭނުންވެއެވެ. ޑިސެމްބަރު މަހުގެ ނިޔަލަށް އިތުރަށް ބޭނުން ވަނީ، 552،498 ރުފިޔާ އެވެ." ކައުންސިލުން ނެރުނު ބަޔާނެއްގައިވެ އެވެ. "އައްޑޫ ސިޓީ ކައުންސިލްގެ އިދާރާގެ ހިންގުމަށް ދައުލަތުން ދެއްވަން ޖެހޭ ފައިސާގެ އެއްވެސް މިންވަރެއް، މުވައްޒަފުންގެ މުސާރަ ފިޔަވައި، 2013 ސެޕްޓެމްބަރު މަހުން ފެށިގެން މި އިދާރާއަށް ލިބިފައި ނުވާކަން ރައްޔިތުންގެ މައުލޫމާތަށްޓަކައި ދަންނަވަމެވެ. ޕްރީ ސްކޫލްތަކަށް ދެވޭ އެހީގެ ފައިސާ ސެޕްޓެމްބަރު މަހުން ފެށިގެން މިހާތަނަށް ދެވިފައި ނެތުމުން އެ ފަރާތްތަކުގެ ޝަކުވާ މެދުނުކެނޑި ލިބެމުން ދެ އެވެ."
ކައުންސިލުން ބުނީ އައްޑޫގައި ހިންގާ 10 ޕްރީ ސްކޫލަކަށް ކައުންސިލުން އަންނަނީ އެތަންތާގެ ޓީޗަރުންނަށް މުސާރަ ދެމުން ކަމަށެވެ. ޓީޗަރުންނަށް މުސާރަ ދޭ ސްކޫލްތަކަކީ، ޝައިޚް ހުސައިންރަހާ ޕްރީސްކޫލް، ޝަރިފީ ޕްރީސްކޫލް، އަސްރިއްޔާ ތުއްތުކުދިންގެ ތަޢުލީމުދޭ ކްލާސް، ކުދިމާ ޕްރީސްކޫލް، އަމާން ޕްރީސްކޫލް، ނަސްރިއްޔާ ޕްރީސްކޫލް، ހިރާޕްރީސްކޫލް، އުޖާލާ ޕްރީސްކޫލް، މެދުވަލު ސްކޫލް، އަދި ސަޢީދިއްޔާ ސްކޫލެވެ.
މީގެ ތެރޭގައި މަހަކު 30،560 ރުފިޔާ ލިބޭ ހަ ސޫކޫލް ހިމެނެއެވެ. އަދި މަހަކު 130،220 ރުފިޔާ ލިބޭ ދެ ސްކޫލާއި، މަހަކު 20،540 ރުފިޔާ ލިބޭ ސްކޫލަކާއި، މަހަކު 40،580 ރުފިޔާ ލިބޭ ސްކޫލެއް ހިމެނެ އެވެ.