ކުރިއަށް ހުރި އުންމީދީ ފިލްމްތަކުގެ ތެރޭގައި ހިމެނޭ އިމްތިއާޒް އަލީގެ "ހައިވޭ" ގެ ފުރަތަމަ ޓްރެއިލާ ލޯންޗްކޮށްފި އެވެ.
އާލިއާ ބަޓް އާއި ރަންދީޕް ހޫޑާ ލީޑް ރޯލުން ފެނިގެންދާ މި ފިލްމް ސިނަމާތަކަށް އަންނާނީ ފެބްރުއަރީ މަހުގެ 21 ގަ އެވެ.
"ހައިވޭ" އަކީ ކަރަން ޖޯހަރުގެ "ސްޓޫޑަންޓް އޮފް ދި އިޔާ" އިން 2012 ވަނަ އަހަރު ބޮލީވުޑަށް ތައާރަފްވި އާލިއާގެ ދެވަނަ ފިލްމެވެ.
އެ ފިލްމުގައި އުމުރުން 20 އަހަރުގެ އާލިއާ ވަރަށް ގްލެމަރަސް ރޯލަކުން ފެނުނު ނަމަވެސް، "ހައިވޭ" ގައި އޭނާ ފެނިގެން ދާނީ މޭކަޕެއް ނެތް، ޑިގްލަމަރަސް ރޯލަކުންނެވެ.
މި ފިލްމަށް ގިނަ ބަޔަކު އިންތިޒާރު ކުރާ އަނެއް ސަބަބަކީ އިމްތިއާޒުގެ ފިލްމަކަށްވެފައި، އޭއާރް ރަހްމާން "ހައިވޭ" ގެ މިއުޒިކް ތައްޔާރުކޮށް ދީފައި ވުމެވެ.
އިމްތިއާޒް އެންމެ ފަހުން ރަންބީރު ކަޕޫރު ހިމަނައިގެން ގެނެސް ދިން "ރޮކްސްޓާ" ގެ މިއުޒިކް ވެސް ތައްޔާރު ކުރީ ރަހުމާނެވެ. އެ ފިލްމްގެ ލަވަތަކަކީ ބެލުންތެރިންގެ ތެރޭގައި ވަރަށް މަގުބޫލްވެގެން ދިޔަ ލަވަތަކެކެވެ.
އެގޮތުން "ހައިވޭ' ގެ ލަވަތައް ވެސް ހިތްގައިމު ވާނެ ކަމާ ދޭތެރޭ އެއްވެސް ޝައްކެއް ނެތެވެ.