ޕާޓީ ޕޮލިޓިކްސް އަށްވުރެ ގައުމާއި ރައްޔިތުންގެ މަސްލަހަތު އިސްކުރަންޖެހޭ ކަމަށް ވިލިނގިލީ ދާއިރާގެ މެމްބަރު ސައިދު ހުސައިން ވިދާޅުވެއްޖެއެވެ.
ސައުދު ކުރެއްވި ޓްވީޓްގައި އިތުރަށް ވިދާޅުވީ ސިޔާސީ ވެރިންގެ ކޯޅުމާއިހެދި ރައްޔިތުން މި ދަނީ ހަނާވަމުން ކަމަށެވެ.
Siyaasy veringe koalhumā hedhi rayithun hanā vamun midhany, mi ee sarukārā eku enmen gulhigen rayyithunge hālath ragalhu kurumah masakkai kuranvy vaguthu, baibai vumakun rayithunah hoadha dheveyne luyeh nufeney. Party politics ah vure gaumai rayyithunge maslahathu iskuran jehey.
— Saud Hussain MP (@SaudVillingili) July 17, 2021
"ސިޔާސީ ވެރިންގެ ކޯޅުމާއިހެދި ރައްޔިތުން ހަނާވަމުން މިދަނީ، މިއީ ސަރުކާރާއެކު އެންމެން ގުޅިގެން ރައްޔިތުންގެ ހާލަތު ރަނގަޅު ކުރުމަށް މަސައްކަތް ކުރަންވީ ވަގުތު، ބައިބައި ވުމަކުން ރައްޔިތުންނަށް ހޯދައިދެވޭނެ ލުޔެއް ނުފެނޭ. ޕާޓީ ޕޮލިޓިކްސް އަށްވުރެ ގައުމާއި ރައްޔިތުންގެ މަސްލަހަތު އިސްކުރަންޖެހޭ" ސައުދު ވިދާޅުވިއެވެ.
ސަރުކާރުގެ މެޖޯރިޓީ އޮންނަ އެމްޑީޕީގެ ތެރޭގައި މިހާރު ދިމާވެފައިވަނީ ސިޔާސަތުގެ މައްސަލައެކެވެ. އެމްޑީޕީގެ ރައީސް އާއި އެމްޑީޕީގެ އެންމެ އިސް ލީޑަރު އަދި ރައީސުލްޖުމްހޫރިއްޔާގެ ސިޔާސަތުގެ ތަފާތެކެވެ. އުޒުރެއްގެ ގޮތުގައި ދައްކަނީ ބައެއްކަންކަމުގައި އެއްގަލަކަށް ނޭރި ސިޔާސީ ވިސްނުން ތަފާތުވާ ވާހަކައެކެވެ. ވެރިކަމުގެ ނިޒާމުގެ ބަހުސްވެސް މީގެ ތެރޭގައި މުހިންމު ދައުރެއް އަދާކުރެއެވެ.
ރައީސް ނަޝީދު ވަކި ކަންތައްތަކެއް ބޭނުންވެލައްވާއިރު, ރައީސް ސޯލިހްގެ ފަރާތުން އެދިލައްވަނީ އެކަންކަން ރައީސް ނަޝީދު ބޭނުންފުޅުވެ ލައްވާ ގޮތަކަށް ކުރެއްވުމަށެވެ. މަޖިލީހުގެ ރައީސްގެ ހައިސިއްޔަތުން އަދި ޕާޓީގެ ރައީސްގެ ހައިސިއްޔަތުން އެދިލައްވާ އެދިލެއްވުންތަކެކެވެ. ރައީސް ސޯލިހް ވިދާޅުވަނީ އެމަނިކުފާނުގެ ވިސްނުންފުޅުހުރީ ވައުދުތައް ފުއްދެވުމަށްކަމަށެވެ. އިތުރު ދައުރަކާއި މެދު ވިސްނުންފުޅު ގެންގުޅުއްވާކަމެއް ނުވަތަ ނޫންކަމެއް ސާފެއް ނޫނެވެ.
ރައީސް ނަޝީދު ވަނީ ރައީސް ސޯލިހް އާއެކު ސިޔާސީ ގޮތުން ދެން ކުރިޔަށް ދެވެން ނެތް ކަމަށް ވިދާޅުވެފައެވެ. މީގެ އިތުރުން "ނަފުރަތުގެ އަމަލު ހިިންގުން" ކުށަކަށް ހެދުމަށް ޤާނޫނުލްއުޤޫބާތަށް ސަރުކާރުން ހުށަހަޅާފައިވާ އިސްލާހު ފާސްކުރުމަށް ފަސްޖެހޭނަމަ ސަރުކާރަށް ތާއީދު ކުރެވެން ނެތްކަމަށް ވެސް ނަޝީދު ވަނީ ވިދާޅުވެފައެވެ.
ރައީސް ނަޝީދުގެ އޮފީހުން ނެރެފައިވާ ބަޔާނެއްގައި އެމނިކުފާނާ ހަވާލާދީ ވިދާޅުވެފައިވަނީ ނަފްރަތުގެ ބިލަކީ ރާއްޖޭގައި މީހުންނާމެދު ދީނީގޮތުން ނަފްރަތު އުފެއްދުމުގެ ސަބަބުން ދޭ ހަމަލާތަކަށް ނިމުމެއް ގެނައުމަށް ސަރުކާރުން ހުށަހެޅި ބިލެއްކަމަށެވެ.
އެހެންނަމަވެސް ސަރުކާރު ކޯލިޝަންގައި ހިމެނޭ ކުޑަ އަދާލަތު ޕާޓީގެ ނުފޫޒުން ސަރުކާރުން އެ ބިލަށް ކުރި ތާއީދު ގެންގޮސްފައިވާކަމަށާއި، އަދި އަދާލަތު ޕާޓީން ރައީސް ސޯލިހްގެ އެފަދަ އެތައް ނިންމުމަކަށް ނުފޫޒު ފޯރުވާއިރު އެގޮތަށް ނުފޫޒު ފޯރުވުމުގެ ފުރުސަތު ރައީސް ސޯލިހް ދެއްވަމުން އަންނަކަމަށްވެސް ވިދާޅުވެފައިވެއެވެ.
ރައީސް ނަޝީދު ވިދާޅުވެފައިވަނީ ނަފުރަތުގެ ބިލު ފާސްކުރުމަށް ސަރުކާރުން ފަސްޖެހި އެބިލު ފާސްކުރުމުގެ ހިތްވަރު ނެތްނަމަ ސަރުކާރަށް އެމަނިކުފާނުގެ ތާއީދު ނެތްކަމަށެވެ.