ކޮމްޕިޔުޓަރު ބޭނުން ކުރުމަށް ކީބޯޑަކާއި މައުސް ކޮންމެހެން ބޭނުން ވި ދުވަސްވަރެއް ވެސް ދެކުނީމެވެ. ދެން އެއާއި ވިދިގެން އައީ ޓަޗް ސްކްރީން ތަކާއި "ނެޗުރަލް އިންޕުޓް" ގެ އީޖާދުކުރުން ތަކެވެ.
ދެން ފެންނާނެ އައު އީޖާދަކަށް ލޯތަށް އިންތިޒާރު ކުރަމުން ދާއިރު، ފާއިތުވި ދެތިން އަހަރުގެ ތެރޭގައި ލޮލާއި އަތްފައިގެ ޙަރަކާތުން ކޮމްޕިޔުޓަރު ބޭނުން ކުރުމުގެ އީޖާދު ކުރުން ތަކަކަށް ބޮޑެތި މަސައްކަތް ތަކެއް ވަނީ ކުރެވިފައެވެ.
މިދިޔަ ހަފްތާގެ ތެރޭގައި ލީޕް މޯޝަންސް އިން ބުނި ގޮތުގައި މި އަހަރުގެ ތެރޭގައި، އަލަށް ތަޢާރަފް ކުރާ "މޯޝަން ކޮންޓްރޯލާ" ހަރޑްވެއަރ އަސުސް ކޮމްޕިޔުޓަރު ތަކަށް ފޯރުކޮށް ދެވޭނެއެވެ. ކުޑަކުޑަ އައިޕޮޑެއްގެ ސައިޒުގެ ލީޕް ސެންސަރެއްގެ އެހީގައި 8 އަކަފޫޓުގެ ބައުންޑަރީއެއްގައި ކުރެވޭ ކުދިކުދި ޙަރަކާތްތައް ފާހަގަ ކުރެވެއެވެ. އަދި މި ޙަރަކާތްތަކުގެ އެހީގައި ކޮމްޕިޔުޓަރ ކޮންޓްރޯލް ކުރެވެއެވެ.
ލީޕްގެ މި އީޖާދު މައިކޮރޯސޮފްޓްގެ ކައިނެކްޓް މޯޝަން ކޮންޓްރޯލާ އަށްވުރެ މާބޮޑުތަންވެސް އަގުހެޔޮ ވާނެކަމަށްވެސް ވެއެވެ. ކައިނެކްޓް މޯޝަން ކޮންޓްރޯލަރ އަށްވުރެ ޑިޓެކްޝަން ރޭންޖް ކުޑަނަމަވެސް ލީޕްގެ އުފެއްދުމުގައިވާ ސެންސަރުން މިލިމީޓަރެއްގެ %1 ގެ ކުޑަ ޙަރަކާތެއްވެސް ދެނެގަނެއެވެ.
ލީޕްގެ މޯޝަން ކޮންޓްރޯލަރ ގެ އަގަކީ 70$ ކަމަށް ލީޕްގެ ވެބްސައިޓްގައި ލިޔެފައި ވެއެވެ. ލީޕްގެ ވެބްސައިޓް މެދުވެރިކޮށް މިހާރު މި އުފެއްދުން ޕްރީ އޯޑަރ ކުރެވޭނެއެވެ.