ސ. ގަން އެއާޕޯޓް ހިންގަން އުފެެއްދި އައްޑޫ އިންޓަނެޝަނަލް އެއާޕޯޓް (އޭއައިއޭ) ގެ މެނެޖިން ޑިރެކްޓަރުގެ މަގާމަށް ބޭނުން ވަނީ އެހެން މަގާމެއްގައި ނެތް މިނިވަން ބޭފުޅެއް ކަމަށް އައްޑޫ ޑިވެލޮޕްމަންޓް ކޮމިޓީ (އޭޑީސީ) އިން ބުނެފި އެވެ.
އެ ކޮމިޓީގެ މެމްބަރު އިބްރާހީމް ހަމީދު ވިދާޅުވީ އޭއައިއޭގެ އެމްޑީއަކަށް މިހާރު އެސްޓީއޯގެ އެމްޑީ ހުންނަވާތީ ގަން އެއާޕޯޓަަށް ދޭން ޖެހޭ ސަމާލުކަން ނުދެވޭ ކަމަށެވެ.
އޭއައިއޭއަކީ އެސްޓީއޯ އާއި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އަދި ގަން އެއާޕޯޓް ކޮމްޕެނީ (ޖީއޭސީއެލް) އުފައްދާފައިވާ ކުންފުންޏެކެވެ.
އޭއައިއޭގެ އެމްޑީއަކަށް މިހާރު އެސްޓީއޯގެ އެމްޑީ އާދަމް އާޒިމް ހުންނެވި އިރު، އޭގެ ކުރިން އެ މަގާމުގައި ހުންނެވީ އެސްޓީއޯގެ ކުރީގެ އެމްޑީ ޝާހިދު އަލީ (ޝާޑް) އެވެ.
ހަމީދު ވިދާޅުވީ ގަން އެއާޕޯޓްގެ ތަަރައްގީގެ މަޝްރޫއަށް ވާނުވާ ވަަރަށް ގާތުން ބަލަމުން އަންނަ ކަމަށެވެ. އަދި އެ ތަނުގެ މަސައްކަތް ދޭތެރެ ދޭތެެރެ އިން މެދުކެނޑެމުންދާތީ އެކަމާ ކަންބޮޑުވާ ކަމަށެވެ.
އެހެން ނަމަވެސް ސަރުކާރުގެ ކަމާ ބެހޭ ފަރާތްތަކުން، އެ ޕްރޮޖެކްޓަށް މާލީ ގޮތުންނާއި އަދި އެ ނޫން ވެސް ގޮތްގޮތުން ދޭން ޖެހޭ އެއްބާރުލުން ދެމުން ގެންދާނެ ކަމުގެ ޔަގީންކަން ދީފައިވާ ކަމަށް ހަމީދު ވިދާޅުވި އެވެ.