މި އަހަރުގެ ހައްޖުވެރިން ހައްޖުގެ އަޅުކަން އަދާކުރާނީ މާސްކް އަޅާ އިޖްތިމާޢީ ގައިދުރުކަން ގާއިމްކޮށްގެންނެވެ.
މި ޕެންޑަމިކް އައި ފަހުން ދެވަނަ އަހަރު ހައްޖުވުމަށް ހައްޖުވެރިން ވަނީ މައްކާއަށް ޖަމާވާން ފަށާފައެވެ. އެހެން ނަމަވެސް އެހެން އަހަރު ތަކާއި ޚިލާފަށް މި އަހަރު ހައްޖަށް މައްކާއަށް ދިޔުމަށް ހުއްދަ ދެވުނީ އެންމެ 60،000 ހައްޖުވެރިންނަށެވެ. އެއީ ހާލަތު ހުރި ގޮތުން ގައިދުރުކަން ގާއިމްކޮށްގެން އަޅުކަން އަދާކުރެވޭނެ ކަމަށް ބެލެވޭ އަދަދެވެ.
މި ފަހަރު ފާހަގަ ވެގެން ދިޔައީ ހައްޖުވެރިން މައްކާގެ ބިމަށް ދިޔުމަށް ދަތުރު ކުރި ބަސްތަކުން ފެށިގެން ވެސް ސިއްޙީ މާހިރުން ކަނޑައަޅުއްވާފައި ހުރި ފިޔަވަޅުތައް ބަރާބަރަށް އެޅުމަށް ބާރުއަޅާފައިވާކަމެެވެ. އެ ގޮތުން ބަހުގެ ތެރޭގައި ހައްޖުވެރިން ތިބީ ވެސް ކޮންމެ ދެމީހެއްގެ ދެމެދުގައި ދުރުމިން ހުންނަ ގޮތަށެވެ. އަދި މާސްކު އަޅައިގެންނެވެ.
ހައްޖުގެ އަޅުކަމަށް މައްކާއަށް ދިޔުމަށް ދަތުރު ފަށާފައިވާ ކޮންމެ މީހަކީ ވެސް ކޮވިޑުން ސަލާމަތްވުމަށް ދެވޭ ވެކްސިންގެ 2 ޑޯޒް ފުރިހަމަ ކޮށްފައިވާ މީހުންނެވެ.
މި އަހަރުގެ ހައްޖުގެ އަޅުކަން އަދާކުރުމަށް މައްކާއަށްދާ މީހުން ވަނީ 20 ގްރޫޕަކަށް ބަހާފައި ކަމަށް އޮފިޝަލުން ބުނެއެވެ. އެއީ ގައިދުރުކަން ބަހައްޓައިގެން ޠަވާފް ކުރުމުގެ ކަންތައް އެންމެ ރަނގަޅަށް ކުރިޔަށް ގެންދިޔުމަށްޓަކައެވެ.
2020 ވަނަ އަހަރު 10،000 ސައުދީ އަރަބިއާގެ މީހުން ވަނީ ހައްޖު ކޮށްފައެވެ. އެހެން ނަމަވެސް ޙައްޖުގެ އަޅުކަމުގެ ތެރެއިން އެއްވެސް ގޮތަކަށް ބަލިފެތުރިފައެއް ނެތެވެ.
ސައުދީއަރަބިއާއިން މިހާތަނަށް ވަނީ 500،000 ކޮވިޑް ކޭސް ފެނިފައެވެ. މި ބަލީގައި އެ ގައުމުން 8000 މީހުން ވަނީ މަރުވެފައެވެ. އަދި 21.5 މިލިއަން ވެކްސިން ޑޯޒްވަނީ ދެވިފައެވެ. މި އަދަދަކީ އާބާދީގެ 10 އިންސައްތަ ކަމަށް ދުނިޔޭގެ ހިސާބުތަކުން ދައްކައެވެ.
އެންމެންގެ ވެސް އުއްމީދަކީ މި އަހަރު ހައްޖުގެ އަޅުކަމަށް ދިޔަ އެންމެހާ ހައްޖުވެރިން ގަދަވެ ސަލާމަތުން އެނބުރިއައުމެވެ. އަދި ހައްޖުގެ އަޅުކަމުގެ ތެރެއިން ކޮވިޑް އައުޓްބްރޭކެއް ﷲގެ އިރާދަފުޅުން ފެނިގެން ނުދިޔުމެވެ.