ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) އިން ވިއްކަމުން އަންނަ އިސްލާމިކް ބޮންޑް ސްކޫކަށް ރާއްޖޭގެ ދެވަނަ އަށް އެންމެ އާބާދީ ބޮޑު އައްޑޫން މާ ބޮޑު ތަރުހީބެއް ލިބެމުން ނުދާ ކަމަށް އެ ކުންފުނިން ބުނެ އެވެ.
އައްޑުއަކީ މާލެ ފިޔަވައި އެޗްޑީއެފްސީގެ ބްރާންޗެއް ވެސް ހުރި ހަމަ އެކަނި އަތޮޅު ވެސް މެ އެވެ.
އެ ކުންފުނީގެ އޮފިޝަލަކު މިއަދު ޓީވީއެމްގައި ވާހަކަ ދައްކަވަމުން ވިދާޅުވީ އައްޑޫން ސްކޫކަށް މާ ބޮޑު ތަރުހީބެއް ނުލިބުނު ނަމަވެސް، ރާއްޖޭގެ އެހެން ސަރަހައްދުތަކުން އެދެވޭ ތަރުހީބެއް ލިބެމުން އަންނަ ކަމަށެވެ. އޭގެ ތެރޭގައި ޅ. އަތޮޅު އޭނާ ފާހަގަ ކުރެއްވި އެވެ.
އޮފިޝަލް ވިދާޅުވީ އައްޑޫ ރައްޔިތުންގެ ފަރާތުން ސްކޫކަށް މާ ބޮޑު ތަރުހީބެއް ލިބެމުން ނުދާތީ އެކަމުން ދޭހަވަނީ، ސްކޫކުގެ ބޭނުން ހިފައިގެން ތަރައްގީގެ ކަންކަމުގައި ކުރިއަށް ދާން އާންމުންެދެ މެދުގައި ވިސްނުން ހުރި ގޮތުގައި ތަފާތުތަކެއް ހުރުން ކަމަށެވެ.
އެޗްޑީއެފްސީން ސްކޫކް ވިއްކަމުން އަންނަނީ މި މަހުގެ ނިޔަލަށެވެ. ކުރިން ސްކޫކް ވިއްކަން ނިންމީ ނޮވެމްބަރު މަހުގެ ނިޔަލަށެވެ.
އެހެން ނަމަވެސް ފަހުން މުއްދަތު އިތުރު ކުރީ ކަމަށް އެ ކުންފުނިން ބުންޏެވެ.
އެޗްޑީއެފްސީގެ އިސްލާމިކް ވިންގް "އަމްނާ"ގެ ފަރާތުން ސްކޫކްގެ ނަމުގައި ތައާރަފް ކުރި ބޮންޑުގެ މޫނު މަތީ އަގަކީ 500ރ. އެވެ.
ސުކޫކު ގަންނަ ފަރާތްތަކުގެ ފައިސާ އިންވެސްޓްކޮށްގެން އެ ކުންފުނިން ކުރާ ވިޔަފާރިތަކުން ލިބޭ ފައިދާގެ 65 ޕަސެންޓް ކޮންމެ އަހަރަކު ދެ ފަހަރު ސުކޫކް ގަތް ފަރާތްތަކުގެ މެދުގައި ބަހާނެ އެވެ.