އިންޑިއަން އައިޑަލް 12 ހުށަހެޅުމަށްފަހު 2022 ވަނަ އަހަރު ޝޯވތައް ހުށަހެޅުން ހުއްޓާލަން ނިންމާފައިވާ ކަމަށް އަދިތުޔާ ނާރަޔަން ބުނެފިއެވެ.
ޝޯވތައް ހުއްޓާލުމަށްފަހު ދިރިއުޅުމަށް ބޮޑެތި ކަންތަކެއް ކުރަންޖެހޭ ވަގުތު އައިސްފައިވާ ކަމަށް އަދިތުޔާ ވަނީ ބުނެފައެވެ. 2022 ވަނަ އަހަރު ވެގެން ދާނީ އެގޮތުން އޭނާ ޝޯވތައް ހުށަހަޅައިދޭތަން ފެންނާނެ އެންމެ ފަހު އަހަރު ކަމަށް އޭނާ ވަނީ ބުނެފައެވެ.
މިވަގުތު ހުއްޓާލައިފިނަމަ ވާނީ ދަތުރުގެ މެދުން ހުއްޓާލީ ކަމަށާއި އެހެން ކަމުން އޭނާ އެއްބަސް ވެފައިވާ މަސައްކަތްތައް ނިމެންދެން އެގޮތުން 2022ގެ ނިޔަލަށް މިކަމުގައި ދެމިހުންނާނެ ކަމަށާއި އެއަށްފަހު ދުރަށްދާނެ ކަމަށް އޭނާ ވަނީ ބުނެފައެވެ.
އިންޑިއާ ޓީވީއިން އޭނާއަށް ވަރަށް ކުރިއެރުން ހޯދައިދީފައިވާ ކަމަށާއި އެކި ކަހަލަ މަސައްކަތް ޓީވީގައި ކުރަން ޖެހުން ވެގެންދިޔައީ ވަރަށް ރަނގަޅު މަސައްކަތްތަކެއްގެ ގޮތުގައި ކަމަށާއި އެހެން ނަމަވެސް މިހާރު ވަރުބަލިވެފައިވާ ކަމަށް އަދިތުޔާ ވަނީ ބުނެފައެވެ.
15 އަހަރު ޓީވީ އިންޑަސްޓްރީގައި ހޭދަކުރި އިރު އެ މަސައްކަތަށް ފަށާފައިވަނީ ވަރަށް ކުޑައިރު ކަމަށާއި މިހާރު ދާދި އަވަހަށް އޭނާ ބައްޕައަކަށް ވާނެ ކަމަށް އޭނާ ވަނީ ބުނެފައެވެ. އެ ހުރިހާ ދުވަހު އެ މަސައްކަތުގައި އުޅުނު އިރު އެތައް ބައެއްގެ އެހީތެރިކަމާއި، ނަމާއި، މަޝްހޫރު ކަމާއި، ކުރިއެރުން ލިބިފައިވާ ކަމަށް އޭނާ ވަނީ ބުނެފައެވެ.
ޓީވީގައި މަސައްކަތް ކޮށްގެން އަމިއްލަ ގެއާއި ކާރުފަދަ ތަކެތި އޭނާއަށް ހޯދިފައިވާ ކަމަށާއި އަމިއްލަ ފައިމައްޗަށް ތެދުވިފައިވާ ކަމަށް އަދިތުޔާ ވަނީ ބުނެފައެވެ. ދެން ޓީވީއިން ފެނުނަސް ފެންނާނީ ގޭމް ފަދަ ޝޯވއަކުން ކަމަށާއި އެ ނޫނީ ޝޯވ އެއްގެ ފަނޑިޔާރެއްގެ މަގާމް ލިބިއްޖެއްޔާ ފެނިދާނެ ކަމަށް އޭނާ ވަނީ ބުނެފައެވެ.
ވަރަށް އަވަހަށް ޓީވީގައި މިވާހަކަ އިއުލާން ކުރާނެ ކަމަށާއި އެގޮތުން ދެން އިތުރަށް ޝޯވ ހުށަހަޅަން އޭނާއަށް ފުރުސަތު ދިނުން ހުއްޓާލާނެ ކަމަށް ބެލެވޭ ކަމަށް ވެސް އަދިތުޔާ ވަނީ ބުނެފައެވެ. "ކޮންމެ ފަހަރަކު ވެސް ހުންނަނީ ދެން ނުދާން. އެކަމަކު ވެސް ޗެނަލްތަކުން އަހަރެން ލައްވާ އެއްބަސް ކުރުވާނެ ޝޯވ ހުށަަހަޅަން ކޮންމެވެސް ގޮތަކުން" އަދިތުޔާ ބުންޏެވެ.