ކޮވިޑް-19 އިން ރައްކާތެރިވުމަށް ކުރެވެމުންދާ ބުރަ މަސައްކަތްތަކުގައި ރާއްޖޭގެ އެކި ކަންކޮޅުތަކުގައި ފްރޮންޓްލައިންގައި މަސައްކަތްކުރާ މަސައްކަތްތެރިންގެ ތެރެއިން 12،400ށް ވުރެ ގިނަ މަސައްކަތްތެރިންނަށް އެލަވަންސް ދީފިއެވެ.
މިކަމާއި ގުޅޭގޮތުން އެންމެ ފަހުން ފިނޭންސް މިނިސްޓްރީން އާންމުކޮށްފައިވާ މައުލޫމާތުތައް ދައްކާގޮތުން ޖުލައި 11 ވަނަ ދުވަހުގެ ނިޔަލަށް ވަނީ ފްރަންޓްލައިން އެލަވަންސްގެ ގޮތުގައި 165.72 މިލިއަން ރުފިޔާ 12,479 މީހުންނަށް ދޫކޮށްފައެވެ. ސަރުކާރުން ފްރަންޓްލައިން އެލަވަންސް ދޭން ފަށާފައި ވަނީ މިދިޔަ އަހަރުގެ މެއި މަހުއެވެ.
މި އެލަވަންސް ފްރަންޓްލައިން މަސައްކަތްތެރިންނަށް ދޭން ނިންމާފައިވަނީ ތިން ކެޓަގަރީއަކަށް ބަހާލައިގެންނެވެ. އެއީ ހައި ރިސްކް ކެޓަގަރީ، މީޑިއަމް ރިސްކް ކެޓަގަރީ އަދި ލޯ ރިސްކް ކެޓަގަރީއެވެ.
ތިން ކެޓަގަރީގައި މަސައްކަތް ކުރާ މުވައްޒަފުންނަށް އެލަވަންސްގެ އަދަދު ވަނީ ތަފާތުކޮށް ކަނޑައަޅުއްވާފައެވެ. އެގޮތުން ކޮވިޑް-19 އަށް ޕޮޒިޓިވްވާ މީހުން ނުވަތަ ބަލި ހުރެދާނެ ކަމަށް ބެލެވޭ ހައި ރިސްކް މީހުންނާއި، އެފަދަ ތަކެއްޗާއި، ގާތުން ދިމާވެދާނެ މީހުން ހައި ރިސްކް ކެޓަގަރީގައި ހިމަނާ، އެ ކެޓަގަރީގެ މީހުންނަށް ދުވާލަކަށް 500 ރުފިޔާ އެލަވަންސްގެ ގޮތުގައި ދޭން ވަނީ ނިންމާފައެވެ. އަދި މީޑިއަމް ރިސްކް ކެޓަގަރީގައި ކޮވިޑް-19 އަށް ޕޮޒިޓިވްވާ މީހުންނަށް ސީދާގޮތުން ޚިދުމަތް ދޭން ނުޖެހުނު ނަމަވެސް، ހައި ރިސްކް މީހުންނާއެކު ސީދާ މަސައްކަތް ކުރަންޖެހޭ މީހުންނަށް ދުވާލަކަށް ދިނުމަށް ނިންމީ 250 ރުފިޔާއެވެ. ލޯ ރިސްކް ކެޓެގަރީގައި ހިމެނޭ މީހުންނަށް ދޭން ނިންމީ ދުވާލަކަށް 200 ރުފިޔާ އެވެ.
ލޯ ރިސްކް ކެޓަގަރީގައި ހިމެނެނީ ހައި ރިސްކް އަދި މީޑިއަމް ރިސްކް ކެޓެގަރީގައި ނުހިމެނޭ، އެހެން ނަމަވެސް ދުވާލެއްގެ މައްޗަށް 6 ގަޑިއިރު، ކޮވިޑް-19 ގެ އޮޕަރޭޝަންތަކުގައި މަސައްކަތްކުރާ މީހުންނެވެ.