އައްޑޫގައި ފުލުހުންނާއި ރައްޔިތުން ގުޅިގެން ކުރަމުންދިޔަ މަސައްކަތުގެ ނަތީޖާއެއްގެ ގޮތުން އައްޑޫ ސިޓީގެ އަމަން ޤާއިމްވެފައިވާކަން ރައްޔިތުންގެ ފަރާތުން ފާހަގަކުރަމުން އަންނަ ކަމަށް އައްޑޫ ސިޓީގެ މޭޔަރު ޢަބްދުﷲ ޞާދިޤް ވިދާޅުވެއްޖެ އެވެ.
ކޮމިޝަނަރު އޮފް ޕޮލިސް ޙުސައިން ވަޙީދު މިހާރު ސައުތު ޕޮލިސް ޑިވިޜަނަށް ކުރަމުންދަ ދަތުރުފުޅުގައި އިއްޔެ އައްޑޫ ސިޓީގައި ސީސީޓީވީ ކެމެރާ ހަރުކޮށް ކެމެރާ ސިސްޓަމް އިފްތިތާޙް ކުރުމަށް ބޭއްވި ރަސްމިއްޔާތަށް ފަހު ކައުންސިލްގެ ފަރާތްތަކާއެކު ބޭއްވި ބައްދަލުވުމުގައި ވާހަކަފުޅު ދައްކަވަމުން އައްޑޫ ސިޓީގެ މޭޔަރު ވިދާޅުވީ އައްޑޫ ސިޓީގެ ކުށުގެ ވެށި އޮތް ގޮތުން އައްޑޫ ސިޓީ ކައުންސިލްގެ ފަރާތުން ފުލުހުންނަށް އެކަން މިއަހަރުގެ ޖެނުއަރީ މަހުގެ ދަންނަވާފައި ވާނެ ކަމަށެވެ.
އަދި އެ ދެންނެވުމާއެކު ފުލުހުންގެ ޙާއްޞަ ޓީމެއް ފޮނުވައި އައްޑޫއަކީ އަމާން އޮމަން މުޖުތަމަޢުއެއް ޤާއިމްވެފައި އޮތް ތަނަކަށް ހެދުމަށް ކުރަމުންދިޔަ މަސައްކަތަކީ ފާހަގަކޮށްލެވޭ މަސައްކަތެއް ކަމަށެވެ.
އައްޑޫ ސިޓީގައި ހިންގަމުންދާ "އަފިރިންގެ އަމާން އައްޑޫ ސިޓީ" އޮޕަރޭޝަނުގެ ސަބަބުން ކުށްކުރުން ދަށަށް ގޮސްފައިވާ ކަމަށާއި ފުލުހުން ފެށި މި މަސައްކަތުގެ ސަބަބުން އައްޑޫ ސިޓީގެ އަމަން ޤާއިމްވެފައިވާ ކާމަށް ރައްޔިތުން ފާހަގަކުރަމުން އަންނަ ކަމަށް ވިދާޅުވި އެވެ. އަދި ފުލުހުން އައްޑޫ ސިޓީގެ އަމަން ޤާއިމް ކުރުމަށްޓަކައި ކުރަމުންދާ މަސައްކަތައް ފާހަގަކޮށް ވަނީ ޝުކުރު އަދާ ކުރައްވާފަ އެވެ.