ސ. ފޭދޫގައި އިމާރާތްކޮށްފައިވާ ހައުސިން ޔުނިޓްތަކުގެ ގުރުލުން ނުބޭއްވިގެން އުޅެނީ ފޭދޫގައި ހުރި ކައުންސިލްގެ ޔޫތު އެންޑް ބިޒްނަސް ޑިޕާޓްމަންޓްގެ އިހުމާލުން ކަމަށް މޭޔަރު އަބްދުﷲ ސޯދިގް (ސޯބެ) ވިދާޅުވެއްޖެ އެވެ.
އޭނާ އިއްޔެ ވިދާޅުވީ މާދަމާ ގުރުލުން ބާއްވަން ޖެހޭނެ ކަމަށް އެ ޑިޕާޓްމަންޓަށާއި އެތަނުގެ އިސްވެރިންގެ އިތުރުން ފޭދޫ ދާއިރާ ތަމްސީލް ކުރައްވާ އަހުމަދު މިރުޒާދު (މިރާ) އަށް ވެސް އަންގަވާފައިވާ ކަމަށެވެ.
އެހެން ނަމަވެސް މާދަމާ ގުރުލުން ބޭއްވުމަށް ނިންމާފައި ނެތް ކަމަށް މިރާގެ އިތުރުން ބިޒްނަސް ޑިޕާޓްމަންޓުން ބުންޏެވެ.
"ވިހީގައި ގުރުލާން ޖެހޭނެ ކަމަށް އަންގާފައި އޮންނާނީ. އެކަމަކު އެކަން އެގޮތަށް ކުރަން ނިންމާފައި ނެތް ކަމަށް އަޅުގަނޑަކަށް އެނގިފައެއް ނެތް. އަދި މިރުޒާދުގެ ފަރާތުން ވެސް އެކަން އެނގިފައެއް ނެތް،" ސޯބެ ވިދާޅުވި އެވެ. "އެކަން އެ ގޮތަށް ކުރިއަށް ނުދާ ކަމަށް ވަންޏާ އަޅުގަނޑު ގަބޫލް ކުރާ ގޮތުގައި މިރުޒާދު ވެސް އެކަން އަންގަން ޖެހޭނެ."
ސޯބެ ވިދާޅުވީ ހައުސިން ޔުނިޓްތަކުގެ ގުރުލުން ބާއްވަން މަަސައްކަތް ކުރަމުން އަންނަތާ އެެއް އަހަރެއްހާ ދުވަސްވީ އިރު ވެސް، އެކަން ވެފައި ނެތުމުން އޭގައި އިހުމާލް ވަނީ ފޭދޫގައި ހުރި ޑިޕާޓްމަންޓް ކަމަށެވެ.
ސަބަބަކީ އެކަން ކުރިއަށް ގެންދިއުމުގެ ހުރިހާ އިހުތިޔާރެއް ދީފައި އޮތް، ނަމަވެސް އެކަން އެ ޑިޕާޓްމަންޓް ކުރެވިފައި ނުވާތީ އޭގެ ސަބަބުން މާލީ ގޮތުން ވެސް ގިނަ ގެއްލުންތަކެއް ވަމުންދާ ކަމަށް ވިދާޅުވި އެވެ.
"ވިހީގައި ގުރު ނުލެވޭ ކަމަށް ވަންޏާ އެންމެ ލަސްވެގެން މި މަހުގެ 28 ގެ ކުރިން އެކަން ބާއްވައި ނިންމަން ޖެހޭނެ،" މޭޔަރު ވިދާޅުވި އެވެ.
އޭނާ ވިދާޅުވީ ހައުސިން ޔުނިޓްތައް ނިމިފައި ހުންނަތާ ތިން އަހަރުވާ އިރު، އެތަންތަނުގެ ސެކިއުރިޓީ އަށް ވެސް މަހަކު ލައްކައެއްހާ ރުފިޔާ ހަރަދުވާ ކަމަށެވެ. އެގޮތުން ހައުސިން މިނިސްޓްރީ އާއި ކައުންސިލްގެ ބަޖެޓުން ވެސް ސެކިއުރިޓީ އަށް ހަރަދުކޮށްފައިވާ ކަމަށް ވިދާޅުވި އެވެ.
ބިޒްނަސް ޑިޕާޓްމަންޓްގެ ޑެޕިއުޓީ ޑިރެކްޓަރު ހަސަން ލަތީފް މިއަދު ވިދާޅުވީ ފޭދޫގެ ހައުސިން ޔުނިޓްތަކުގެ ގުރުއަތުލުމާ ބެހޭ ގޮތުން ސީދާ އެއްޗެއް ދަންނަވަން އެނގިވަޑައި ނުގަންނަވާ ކަމަށެވެ.
"މިކަމަކާ ޖެހިގެން ގޮސް އަޅުގަނޑުމެން މި ތިބީ ކައުންސިލް ތެރޭގައި ފިތިފައި. ގުރުއަތު ނުލެވިގެން ހަވާލު ނުކުރެވިގެން އުޅޭ ހައުސިން ޔުނިޓްތަކެއް މި ނޫނީ އަޅުގަނޑުމެން މިހާތަނަކަށް ނުދެކެން،" އޭނާ ވިދާޅުވި އެވެ.
ލަތީފް ވިދާޅުވީ މި މަހުގެ 26 ގައި ގުރުލާ ވާހަކަތަކެއް ވެސް ދެކެވިފައިވާ ކަމަށާއި އެކަމާ ގުޅޭ ގޮތުން މިރުޒާދު ކައުންސިލްގެ އިންފްރާސްޓްރަކްޗަ ޑިޕާޓްމަންޓަށް ސިޓިއެއް ވެސް، ފޮނުވާފައިވާ ކަމަށެވެ.
"އެކަމަކު އަޅުގަނޑުމެންނަކަށް ނޭނގޭ އެ ދުވަހު ވެސް ގުރުއަތުލުން ބާއްވާނެ ކަމަށް ނުވަތަ ނޫން ކަމެއް،" އޭނާ ވިދާޅުވި އެވެ. "އަނެެއްކާ މިކަން ކުރިއަށް ގެންދާ އިރު، ކޮމިޓީއެއް ނަގައިގެން މަސައްކަތްތައް ކުރިއަށް ގެންދާ ގޮތަށް ވެސް ވާހަކަ ދެކެވިފައި އޮތީ."
މީގެ ކުރިން ވެސް ތިން ފަހަރެއްގެ މަތިން ގުރުއަތުލުން ބޭއްވުމަށް ތާރީހުތަކެއް ކަނޑައެޅި އެވެ. އެކަމަކު ކުރިމަތިލި ފަރާތްތަކަށް ޕޮއިންޓް ދީފައިވާ އުސޫލާ މެދު ބައެއް މީހުން މައްސަލަ ޖައްސަމުން ގެންދާތީ ގުރުލުން ކޮންމެ ފަހަރަކު ވެސް ވަނީ ކެންސަލް ކުރަން ޖެހިފަ އެެވެ.
ހައުސިން ޔުނިޓްތަކަށް އެންމެ ފަހުން ހުޅުވާލި ފުރުސަތުގައި 327 ފަރާތަކުން ވަނީ ކުރިމަތިލާފައިވާކަމަށެވެ. ނަމަވެސް މީގެ ތެރެއިން ޝަރުޠު ހަމަވެ ގުރުއަތަށް ހޮވިފައިވަނީ 315 ފަރާތެކެވެ.