އައްޑޫގައި ބިނާ ކުރަން ނިންމާފައިވާ އިސްލާމިކް ސެންޓަރުގެ މަސައްކަތް އަންނަ އަހަރު ފެށޭނެ ކަމަށް މޭޔަރު އަބްދުﷲ ސޯދިގް (ސޯބެ) ވިދާޅުވެއްޖެ އެވެ.
"އައްޑޫ ލައިވް" އަށް ދިން ހާއްސަ އިންޓަވިއުއްގައި މޭޔަރު ވިދާޅުވީ ހިތަދޫގައި ބިނާ ކުރާ އިސްލާމިކް ސެންޓަރަށް ބޭނުންވާ އަންނަ އަހަރުގެ ބަޖެޓްގައި ވެސް މިހާރު ހިމެނިފައިވާ ކަމުގެ މައުލޫމާތު ލިބިވަޑައިގެންފައިވާ ކަމަށެވެ.
އެހެންވަ މަޖިލީހުން ބަޖެޓް ފާސްވެގެންދާ އިރު، އިސްލާމިކް ސެންޓަރަށް ބޭނުންވާ ފައިސާ ހިމެނިފައިވާ ކަމަށް ގަބޫލް ކުރައްވާ ކަމަށް ވިދާޅުވި އެވެ. މޭޔަރު ވިދާޅުވީ އެ މަރުކަޒު ބިނާ ކުރަން ބަޖެޓްގައި ހިމަނާފައި ވަނީ 30 މިލިއަން ރުފިޔާ އެވެ.
އަދި އެކަން ބަޖެޓްގައި ހިމެނުމަށް އެމްޑީޕީ އަށް ނިސްބަތްވާ އައްޑޫގެ ރައްޔިތުންގެ މަޖިލީހުގެ ދެ މެމްބަރެއް ކަމަށްވާ ހިތަދޫ އުތުރު ދާއިރާގެ މުހައްމަދު އަސްލަމާއި ހުޅުމީދޫ ދާއިރާގެ މެމްބަރު އިލްޔާސް ލަބީބް ވަރަށް ބޮޑަށް މަސައްކަތް ކުރައްވާފައިވާ ކަމަށް މޭޔަރު ވިދާޅުވި އެވެ.
އައްޑޫގައި އިސްލާމިކް ސެންޓަރެއް ގާއިމު ކުރާނެ ކަމަށް އިއުލާންކޮށްފައި ވަނީ ކުރީގެ ރައީސް މުހައްމަދު ނަޝީދުގެ ވެރިކަމުގައި އައްޑޫގައި މެއި 12، 2011 ގައި ބޭއްވި ކޮމިއުނިޓީ ކެބިނެޓްގަ އެވެ.
އެކަން އިއުލާން ކުރެއްވީ އޭރުގެ އިސްލާމިކް މިނިސްޓަރު ޑރ. އަބްދުލް މަޖީދް އަބްދުލް ބާރީ އެވެ.
އަދި އެ މަޝްރޫއަކީ ސައުދީ ސަރުކާރުގެ އެހީ އާ އެކު ހިންގާ މަޝްރޫއެއް ކަމަށާއި އިސްލާމިކް މަރުކަޒު ޑިޒައިންކޮށް ނިންމާފައިވާ ކަމަށް ވެސް ޑރ. މަޖީދު އޭރު ވިދާޅުވެފައިވެ އެވެ.
އައްޑޫގައި ބިނާ ކުރާ އިސްލާމީ މަރުކަަޒު ބިނާ ކުރަން ނިންމާފައި ވަނީ ހިތަދޫގައި ގައުމީ ޔުނިވަސިޓީގެ ކެމްޕަހުގެ ދަނާލުގެ ފުރަގަހުން، ލިންކް ރޯޑާ ދިމާލުން އޮތް ހުސް ބިމުގަ އެވެ.