އައްޑޫގެ ގުޅިފައިވާ ރަށްރަށުގައި މިހާރު ސީސީޓީވީ ކެމެރާ ހަރު ކުރަމުން ދިޔަ ނަމަވެސް، ވަކިން އޮންނަ ހުޅުމީދޫގައި ސީސީޓީވީ ކެމެރާ ހަރު ކުރަން ނިންމާފައި ނެތް ކަމަށް ކޮމިޝަނަރު އޮފް ޕޮލިސް ހުސައިން ވަހީދު ވިދާޅުވެއްޖެ އެވެ.
މިދިޔަ ބުދަ ދުވަހު ސީޕީ ވިދާޅުވީ މި ވަގުތަށް ކެމެރާ ހަރު ކުރަނީ އައްޑޫ ލިންކް ރޯޑްގައި ކަމަށެވެ. އަދި އެކަން ކުރަނީ އެ މަގަކީ ދުއްވާ މީހުންނަށް ވެސް ވީހާ ވެސް ރައްކާތެރި، އަދި މަގުގައި ހިނގާ ތަފާތު ހާދިސާތައް ހުއްޓުވަން ކަމަށެވެ.
ލިންކް ރޯޑްގެ ފަސް ސަރަހައްދެއްގައި 10 ކެމެރާ ހަރު ކުރަން ވަނީ ނިންމައިފަ އެވެ. މީގެ ތެރެެއިން ދެ ކެމެރާ މިހާރު ހަރުކޮށް، ބޭނުން ކުރަން ވަނީ ފަށައިފަ އެވެ. އަދި ބާކީ ހުރި ކެމެރާތައް ހަރު ކުރަން އަންނަނީ މަސައްކަތް ކުރަމުންނެވެ.
ސީޕީ ވިދާޅުވީ ލިންކް ރޯޑްގައި ހަރު ކުރާ ކެމެރާތަކަކީ ހަގީގަތުގައި، އައްޑޫގައި ހަރު ކުރަން ގެނައި ކެމެރާތަކެއް ނޫން ކަމަށެވެ.
"އަސްލު މިއީ އެހެން ޕްރޮޖެކްޓަކަށް ގެނައި ކެމެރާތަކަށް. އެކަމަކު ފުލުހުން އަލަށް އަމަލު ކުރަން ފެށި 100 ދުވަހުގެ ޕްލޭންގެ ތެރެއިން އައްޑޫގައި ކެމެރާތައް ހަރު ކުރަން ނިންމީ،" ސީޕީ ވިދާޅުވި އެވެ.