ސ. މީދޫ އެމްސީސީން އިންތިޒާމްކޮށްގެން މީދޫގައި ބޭއްވި ފޮހޯ އެމްސީސީ ވޮލީ މުބާރާތުގެ ޗެމްޕިއަންކަން މީދޫ ޓީމް ހޯދައިފި އެވެ.
މީދޫ ޓީމް މި މުބާރާތުގެ ޗެމްޕިއަންކަން ހޯދީ އިއްޔެ ހަވީރު މީދޫ އިޖްތިމާއީ މަރުކަޒުގައި ކުޅެވުނު މި މުބާރާތުގެ ފައިނަލް މެޗްގައި ހުޅުދޫ އެޗްވައިއެފްގެ ޓީމް ސީދާ ތިން ސެޓުން ބަލިކޮށްފަ އެވެ.
ފޯރިގަދަ ކުޅުމެއް ފެނިގެންދިޔަ މިމެޗްގެ ފުރަތަމަ ސެޓް ފަށައިގެން 13 ޕޮއިންޓާއި ހަމައަށް ކުޅެވުނު އިރު ވެސް ލީޑު ކުރަމުން ގޮސްފައި ވަނީ އެޗްވައިއެފްގެ ޓީމެވެ.
މީދޫ ޓީމަށް ފުރަތަމަ ސެޓްގައި އެޗްވައިއެފްގެ ޓީމުގެ ސްކޯއާއި ހަމަމަހަމަ ކުރެވުނީ 14-14 އިންނެވެ.
އޭގެ ފަހުން މީދޫ ޓީމް މި ސެޓްގައި ލީޑު ހޯދުމަށް ފަހު ސެޓް ގެންގޮސްފައި ވަނީ 25-22 އިންނެވެ.
ދެވަނަ ސެޓް ފަށައިގެން ނިމެންދެން ވެސް ލީޑު ކުރަމުން ގޮސްފައި ވަނީ މީދޫ ޓީމެވެ. މީދޫޓީމް މި ސެޓް ގެންދިޔައީ 25-23 އިންނެވެ.
ތިން ވަނަ ސެޓްގެ ކުޅުން ފަށައިގެން ވެސް 10 ޕޮއިންޓާއި ހަމައަށް ކުޅެވުނު އިރު ވެސް އެޗްވައިއެފްގެ ޓީމް 3 ޕޮއިންޓްގެ ލީޑެއްގައި އޮތެވެ.
އެހެން ނަމަވެސް އެޗްވައިއެފްގެ ޓީމަށް ލީޑު ނުހިފެހެއްޓިގެން ދެޓީމްގެ ސްކޯ 11-11 އިން އެއްވަރުވެ، އޭގެ ފަހުން މިސެޓް ނިމެންދެން ވެސް ލީޑު ކުރަމުން ގޮސްފައި ވަނީ މީދޫ ޓީމެވެ. މީދޫ ޓީމް ގެންގޮސްފައި ވަނީ 25-19 އިންނެވެ.
މެޗްގައި ހުޅުދޫ އެޗްވައިއެފްގެ ޓީމަށް މި މުބާރާތުގައި އެޓީމް ކުރީން ކުޅުނުމެޗްތަކުގައި ނުކުޅޭ ސިންޑީ ކުޅެފައިވީ ކަމުގައި ވިޔަސް މި ދެ ޓީމް މި މުބާރާތް ފެށުމުގެ ގޮތުން ބައްދަލު ކުރި މެޗްގައި އެޗްވައިއެފްގެ ޓީމުގެ ކުޅުންތެރީންގެ ފަރާތުން ފެނުނު ރަނގަޅު ކުޅުމެއް ފެނިގެން ގޮސްފައެއް ނުވެ އެވެ.
އެހެން ނަމަވެސް މީދޫ ޓީމްގައި ސެޓަރު އިބްރާހިމް ޖަމާލު ހިމެނުމުން މީދޫ ޓީމްގެ ކުޅުން ތަންކޮޅެއް ރަނގަޅު ކަމަށް ފެނިގެން ގޮސްފައިވެ އެވެ.
ފައިނަލް މެޗްގެ ކުޅުން ނިމުމުން މި މުބާރާތުގެ ނަތިޖާ ފާޅުކޮށް އިނާމު ދިނުމުގެ ރަސްމިއްޔާތު ބޭއްވުނެވެ.
މި މުބާރާތުން އެކިވަނަތައް ހޯދި ކުޅުންތެރީންނަށާއި ޗެމްޕިއަން ޓީމަށް އަދި ދެވަނަ ޓީމަށާއި ތިން ވަނަ ޓީމަށް ތައްޓާއި މެޑަލް ހަވާލްކޮށް ދެއްވީ ފައިނަލްމެޗްގެ ޝަރަފްވެރި މެހްމާނު އަހުމަދު ޝަރީފުގެ އިތުރަށް އަބްދުﷲ ހާނީ، އަބްދުﷲ ރަޝީދު، އަލީ ޝަހީމް، އަދި އަހުމަދު ޖަމާލެވެ.
ފައިނަލްމެޗްގެ މޮޅުކުޅުން ތެރިއަކަށް ހޮވިފައި ވަނީ މެޗްގައި މޮޅުކުޅުމެއް ދެއްކި މީދޫޓީމްގެ އަޝްފާގު އާދަމް (އައްކަޅޭ) އެވެ.
މުބާރާތުގެ އެންމެ މޮޅު ސެޓަރަކަށް ހޮވިފައި ވަނީ އެޗްވައިއެފްގެ ޝަންވީލެވެ. އެންމެ މޮޅު ސްޕައިކަރަކަށާއި 21 އަހަރުން ދަށުގެ އެންމެ އުއްމީދީ ކުޅުންތެރިއަކަށް ހޮވިފައިވަނީ އެޗްވައިއެފަށް ކުޅުނު މުހައްމަދު ޝާއިންނެވެ.
އެންމެ މޮޅު ބްލޮކަރަކަށް ހޮވިފައި ވަނީ ޝަންގްރިއްލާ ޓީމަށް ކުޅުނު ސްރީލަންގެ ކުޅުންތެރިއެއް ކަމުގަިއވާ ވިންސްލީ އެވެ.
އެންމެ މޮޅު ޑިގައަކަށް ހޮވިފައި ވަނީ މީދޫ ޓީމްގެ އަޝްފާގު އާދަމް (އައްކަޅޭ) އެވެ. ހުރިހާ ގޮތަކުން އެންމެ މޮޅު ކުޅުންތެރިއަކަށް ހޮވިފައިވަނީ މީދޫ ޓީމްގެ އިސްމާއީލް ސާޖިދު (ކުޑަކާއްޓޭ) އެވެ.
ޕެއާޕްލޭ ކުޅުންތެރިއަކަށް މީދޫ ޓީމްގެ ހުސެން ނަޖީބު ހޮވިފައިވާ އިރު ފެއާޕްލޭ ޓީމަކަށް ހޮވިފައި ވަނީ މީދޫ ޓީމެވެ.
މުބާރާތުގެ 3 ވަނަ ޓީމަކަށް ހޮވިފައިވަނީ ޝަންގްރިއްލާގެ ޓީމެވެ. އަދި މުބާރާތުގެ ދެވަނަ ޓީމަކީ ހުޅުދޫ އެޗްވައިއެފްގެ ޓީމެވެ.
ޗެމްޕިއަން ޓީމަކަށް 30،000 ރުފިޔާ ދެވަނަ ޓީމަކަށް 15،000 ރުފިޔާ ހުށަހަޅައިގެން އައްޑޫގެ ހުރިހާ ރަށްރަށުގެ ޓީމްތަކަށް ދައުވަތު ދީގެން މީދޫގައި ބޭއްވި މި މުބާރާތުގައި ބައިވެރިވެފައި ވަނީ ހަތަރު ޓީމަކުންނެވެ.
އެއީ ހުޅުދޫ އެޗްވައިއެފް، މީދޫ މީދޫޓީމް، ޝަންގްރިއްލާ އަދި މީދުން ބައިވެރިވި އެމްއީސީ އެވެ.
މި މުބާރާތް އަންނަ އަހަރު ވެސް ބާއްވާނެ ކަމަށް އެމްސީސީން ބުންޏެވެ.