އައްޑޫގެ މަގު މަރާމާތު ކުރަން ބޭނުން ކުރަން ގެނެސްފައިވާ އެއްވެސް ވެހިކަލެއް އައްޑޫން ބޭރު ކުރެވިގެން ނުވާނެ ކަމަށް ކައުންސިލަރު ހުސައިން ހިލްމީ ވިދާޅުވެއްޖެ އެވެ.
އައްޑޫ ސިޓީ ކައުންސިލްގައި ހިތަދޫ މެދު ދާއިރާ ތަމްސީލް ކުރައްވާ އަދި ކައުންސިލްގެ ޓްރާންސްޕޯޓް އެންޑް އިންފްރާސްޓްރަކްޗަ ޑިޕާޓްމަންޓް ބަލަހައްޓަވާ މެމްބަރު، މިހެން ވިދާޅުވެފައިވާ އިރު، އައްޑޫގެ މަގުތައް މަރާމާތުކޮށް ބެލެހެއްޓުމަށް މިހާރު ހަވާލުކޮށްފައިވާ މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) އަށް އެކަން އެކަށީގެނވާ ގޮތަކަށް ނުކުރެވޭ ކަމަށް ކައުންސިލުން ދަނީ ތަކުރާރުކޮށް ބުނަމުންނެވެ.
އަދި ވެލި ތާރު އެޅި މަގުތަކާއި ވެލި މަގުތައް ވެސް މަރާމާތު ކުރަން ކައުންސިލުން އެކި ފަހަރު އެދުމުން ވެސް، ފައިސާ ނުލިބޭ ކަމަށް ބުނެ މަސައްކަތްތައް ކުރަން އެ ކުންފުނިން އުޒުރުވެރިވާކަން ފާހަގަ ކުރެވެ އެވެ.
މޭޔަރު އަބްދުﷲ ސޯދިގް (ސޯބެ) ވެސް ވިދާޅުވީ އެމްއާރްޑީސީގެ ބެލުމުގެ ދަށަށް ގެންގޮސްފައި ހުރި ސާމާނުތަކަކީ ކައުންސިލްގެ ތަކެތި ކަމަށާއި މަގު މަރާމާތު ކުރުމަކީ ކައުންސިލްގެ މެންޑޭޓްގެ ތެރޭގައި ވެސް ހިމެނޭ ކަމެއް ކަމަށެވެ.
އެކަމަކު ވެރިން މާލޭގައި ތިއްބަވާ ކުންފުންޏެއްގެ ދަށަށް މިކަން ގެންދިއުމުން މަގުތައް މަރާމާތު ނުކުރެވުމުގެ އިތުރަށް، ތަކެތި މަރާމާތު ވެސް ނުކުރާތީ ބޮޑެތި ގެއްލުންތަކެއް ލިބިފައިވާ ކަމަށެވެ.