ކުރީގެ ރައީސް އަބްދުﷲ ޔާމީނާއި ދެކޮޅަށް ހުށަހަޅާފައިވާ ދައުވާތަކާއި ގުޅިގެން ދެފަރާތުން ހެކި ހާމަކޮށްފިއެވެ.
ރ.ފުއްގިރި މައްސަލައިގައި ޔާމީންގެ މައްޗަށް އުފުލާފައިވާ ރިޝްވަތު ޤަބޫލުކުރުމާއި މަނީ ލޯންޑްރިންގެ ދައުވާއާ ގުޅިގެން މިއަދު ކްރިމިނަލް ކޯޓުގައި ވަނީ އެ މައްސަލައާ ގުޅޭ އިބްތިދާއީ އަޑުއެހުން ކުރިއަށް ގެންގޮސްފައެވެ.
އެގޮތުން މި ދެ ދައުވާއަށްވެސް ރައީސް ޔާމީނާއި ދެކޮޅަށް ދައުލަތުން ވަނީ ޝަފަހީ އަދި ކިތާބީ ހެކި ހިމެނޭގޮތަށް ޖުމުލަ 86 ހެއްކެއް ހުށަހަޅާފައެވެ. އެގޮތުން ޔާމީނާއި ދެކޮޅަށް ހުށަހަޅާފައިވާ ހެކީގެ ތެރޭގައި، އެމްއެމްޕީއާރްސީގެ ކުރީގެ އެމްޑީ އަބްދުﷲ ޒިޔަތު، ކުރީގެ ނައިބު ރައީސް އަހުމަދު އަދީބު، ސަން ކުންފުނީގެ ޗެއާމަން އަދި މީދޫ ދާއިރާގެ މެމްބަރު އަހުމަދު ސިޔާމް މުހައްމަދު، ކުރީގެ މެމްބަރު އަލީ މައުރޫފް އަދި މ. ޕޮމްޕިޔާ އިބްރާހިމް ރަޝީދު (ބޮންޑޭ) ފާހަގަކުރެވެއެވެ. މީގެ އިތުރުންވެސް ގިނަ ކިތާބީ ހެކި ޔާމީނާއި ދެކޮޅަށް ދައުލަތުން ހުށަހަޅާފައިވެއެވެ.
ޔާމީންގެ ފަރާތުން ދިފާއީ ހެކިންގެ ގޮތުގައި ހުށަހަޅާފައިވާ ފަރާތްތަކުގެ ތެރޭގައި، ސަން ކުންފުނީގެ ޗެއާމަން އަދި މީދޫ ދާއިރާގެ މެމްބަރު އަހުމަދު ސިޔާމް މުހައްމަދު، މާލެސިޓީ ޑެޕިއުޓީ މޭޔަރު އަހުމަދު ނަރީޝް އަދި މި މައްސަލައިގައި ދައުވާ ލިބޭ އަހުމަދު ކްރިކް ރިޟާ ފާހަގަކުރެވެއެވެ. މީގެ އިތުރުންވެސް އިތުރު ފަރާތްތަކަކާއި ކިތާބީ ހެކި ހުށަހަޅާފައިވެއެވެ.
ރައީސް ޔާމީންގެ ފަރާތުން ހެއްކެއްގެގޮތުގައި ސިޔާމް ހުށަހަޅާފައިވަނީ ސިޔާމާއި އެކު ހިންގާފައިވަނީ ޑޮލަރު ގަތުމުގެ މުއާމަލާތެއްކަން ސާބިތުކުރުމަށެވެ. އަދި ހެއްކެއްގެ ގޮތުގައި ނަރީޝް ހުށަހަޅާފައިވަނީ، ޑޮލަރު ގަތުމަށްފަހު ދޭންޖެހޭ ފައިސާ ޔާމީންގެ ފަރާތުން ސިޔާމަށް ހަވާލުކުރިއިރު ނަރީޝް އަދި އިތުރުމީހަކު ހެއްކިންގެ ގޮތުގައި ތިބިކަން ސާބިތު ކުރުމަށެވެ. ނަރީޝާއެކު އެވަގުތު ހެކިންގެ ގޮތުގައި ތިބިކަމަށްބުނާ އިތުރު މީހަކުވެސް ދިފާއީ ހެއްކެއްގެ ގޮތުގައި ޔާމީންގެ ފަރާތުން ހުށަހަޅާފައިވެއެވެ.
ރައީސް ޔާމީންގެ ވަކީލް ވިދާޅުވީ، ޑޮލަރު ގަތުމަށް 17.2 މިލިއަން ރުފިޔާ ރައީސް ޔާމީންގެ ފަރާތުން ދީފައިވާކަމަށެވެ. އަދި ޑޮލަރު ގަނެފައިވާނީ ބޭންކް ރޭޓުގައި ކަމަށްވެސް ބުނެފައިވެއެވެ.
މިއަދުގެ އަޑުއެހުން ނިންމާލައްވަމުން މައްސަލަ ބައްލަވާ ކްރިމިނަލް ކޯޓުގެ އިސް ގާޒީ އަހުމަދު ޝަކީލް ވިދާޅުވީ ޝަރީއަތުގެ ކުރިން ހުށަހަޅާ ހުށަހެޅުންތައް، ހުށަހެޅުމަށް ދެ ފަރާތަށްވެސް 10 ދުވަހުގެ ފުރުސަތެއް ދޭނެކަމަށެވެ. އަދި ދެން މައްސަލައިގައި އަޑުއެހުމެއް ބާއްވާނީ ޝަރީއަތުގެ ކުރިން ހުށަހަޅާ ހުށަހެޅުންތަކާ ގުޅޭގޮތުން ވާހަކަ ދެއްކުމަށްވެސް ވެސް ވިދާޅުވިއެވެ. ގާޒީ ވިދާޅުވީ މައްސަލައިގައި ދެން އިތުރު އަޑުއެހުމެއް ބާއްވާނީ އޮގަސްޓް 22 ވަނަ ދުވަހު ކަމަށެވެ.
ރ. ފުއްގިރި މައްސަލައިގެ ތަފްސީލު:
ޕްރޮސިކިއުޓާ ޖެނެރަލް (ޕީޖީ) އޮފީހުން ބުނެފައިވަނީ ޓޫރިޒަމް މިނިސްޓްރީ އާއި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) މެދުވެރިކޮށް ޓޫރިސްޓު ރިސޯޓެއްގެ ގޮތުގައި ތަރައްގީ ކުރުމަށްޓަކައި ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅިގެން ކުރީގެ ރައީސް އަބްދުﷲ ޔާމީން މަގާމުގެ ނުފޫޒު ބޭނުންކޮށްގެން، ކ. މާލެ، މއ. ކުރިކީލަހިޔާ، އަހުމަދު ކްރިކް ރިޟާ މެދުވެރިކޮށް ރިޝްވަތުގެ ގޮތުގައި އެއްމިލިއަން އެއްލައްކަ ސަތާރަހާސް ޑޮލަރު ހޯދައިފައިވާ ކަމަށެވެ.
މީގެ އިތުރުން ރިޝްވަތުގެ ގޮތުގައި ހޯދައިފައިވާ ފައިސާ ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމަންޓް ޕްރައިވެޓް ލިމިޓެޑް ބޭނުންކޮށްގެން ލޯންޑާ ކުރުމަށްޓަކައި ފަށަލަކޮށްފައިވާ ކަމަށްވެސް ޕީޖީން ބުނެފައިވެއެވެ.
މި މައްސަލައިގައި ޕީޖީން ދައުވާކޮށްފައިވަނީ ކުރީގެ ރައީސް އަބްދުﷲ ޔާމީންގެ މައްޗަށާއި، ކ. މާލެ، މއ. ކުރިކީލަހިޔާ، އަހުމަދު ކްރިކް ރިޟާގެ މައްޗަށާއި، ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމަންޓް ޕްރައިވެޓް ލިމިޓެޑްގެ މައްޗަށެވެ.
ރައީސް ޔާމީންގެ މައްޗަށް މި މައްސަލައިގައި ކުރަނީ ރިޝްވަތު ޤަބޫލުކުރުމުގެ ދައުވާ އާއި މަނީލޯންޑްރިންގެ ކުށުގެ ދައުވާއެވެ. އަހުމަދު ކްރިކް ރިޟާގެ މައްޗަށް ކުރަނީ ރިޝްވަތު ދިނުމުގައި މެދުވެރިއަކަށްވުމުގެ ކުށުގެ ދައުވާ އާއި މަނީ ލޯންޑްރިންގެ ކުށުގެ ދައުވާއެވެ. ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމަންޓް ޕްރައިވެޓް ލިމިޓެޑްގެ މައްޗަށް ކުރަނީ މަނީ ލޯންޑްރިންގެ ކުށުގެ ދައުވާ އެވެ.