ކުރިއަށް އޮތް ލޯކަލް ކައުންސިލް އިންތިހާބުގައި އެމްޑީޕީން ވާދަ ކުރައްވާ ކެންޑިޑޭޓުން އިންތިހާބު ކާމިޔާބް ކުރައްވައި، އައްޑޫ ސިޓީ ކައުންސިލްގެ މެޖޯރިޓީ މި ފަހަރު ވެސް ނަގާނެ ކަމުގެ އުންމީދު ބޮޑު ކަމަށް މޭޔަރު އަބްދުﷲ ސޯދިގް (ސޯބެ) ވިދާޅުވެއްޖެ އެވެ.
"އައްޑޫ ލައިވް" އަށް ދެއްވި ހާއްސަ އިންޓަވިއުއްގައި ސޯބެ ވިދާޅުވީ ލޯކަލް ކައުންސިލް އިންތިހާބުގައި އެމްޑީޕީގެ ކެންޑިޑޭޓުންނާ ވާދަ ކުރައްވަން ތިއްބެވި، އެހެން ޕާޓީތަކުގެ ކެންޑިޑޭޓުންނަށް ބަލާ އިރު މާ ބޮޑު ތަފާތެއް ހުރި ކެންޑިޑޭޓުންތަކެއް ނެތް ކަމަށެވެ.
އަދި އެމްޑީޕީން ވާދަ ކުރައްވާ ކެންޑިޑޭޓުންނަކީ މިކަމަށް ވަރަށް ގާބިލް ބައެއް އޭނާ ވިދާޅުވި އެވެ.
"އަޅުގަނޑުމެން ހިސާބު ޖަހާލީމާ ދައްކަނީ އެމްޑީޕީން މި ފަހަރު ވެސް ކައުންސިލްގެ މެޖޯރިޓީ ނަގާނެކަން. މިކަމަށް ވަރަށް ގާބި؛ލް ބޭފުޅުންތަކެއް އަޅުގަނޑުމެންގެ ތެރެއިން ނިކުމެ ތިއްބެވީ،" ސޯބެ ވިދާޅުވި އެވެ.
އައްޑޫ ސިޓީ ކައުންސިލަށް، މިހާރު އޮތް ކައުންސިލުން މޭޔަރު ސޯބެގެ އިތުރުން މަރަދޫ ދާއިރާ ކައުންސިލަރު އަބްދުﷲ ތޮއްޔިބް (ޓޮމް) އާއި ހިތަދޫ މެދު ދާއިރާގެ މެމްބަރު ހުސައިން ހިލްމީ ވާދަ ކުރައްވަ އެވެ.
އެ ތިން ބޭފުޅުންގެ އިތުރަށް ކައުންސިލަށް އަލަށް ވާދަ ކުރަން ޕްރައިމެރީ ކާމިޔާބް ކުރެއްވި ތިން ބޭފުޅުންނަކީ ހިތަދޫ ދެކުނު ދާއިރާ އަށް ވާދަ ކުރައްވާ މުހައްމަދު ޔަސްރިފް އާއި ފޭދޫ ދާއިރާ އަށް އަބްދުﷲ އަސްވާން (އަތޯ) އާއި ހުޅުމީދޫ ދާއިރާ އަށް، އެ ރަށު އަވަށު ބޯޑް ނައިބް ރައީސަކަށް މިހާރު ހުންނެވި އަލީ މުހައްމަދެވެ.
ސޯބެ ވިދާޅުވީ އެމްޑީޕީން ވާދަ ކުރައްވާ ކެންޑިޑޭޓުން ކައުންސިލްގެ ހަ ގޮނޑި ވެސް ކާމިޔާބް ކުރައްވައި، އަލުން މޭޔަރަަކަށް ސޯބެ ހޮއްވަވާނެ ކަމަށް ވެސް ގަބޫލް ކުރައްވާ ކަމަށެވެ.
އޭނާ އިތުރަށް ވިދާޅުވީ ކައުންސިލްގައި އެއް ޕާޓީއެއްގެ މެޖޯރިޓީ އޮތުމަކީ ކަންކަން ކުރުމަށް ވަރަށް ބޮޑު ފަސޭހައެއް ކަމަށެވެ.
ސޯބެ ވިދާޅުވީ ކައުންސިލްގެ ދެވަނަ ދައުރަކަށް އޭނާ ކުރިމަތިލެއްވި މައިގަނޑު ސަބަބަކީ، ރައްޔިތުން އެކަމަށް ބޭނުންވުން ކަމަށެވެ.
އަދި ސޯބެ ތަމްސީލް ކުރައްވާ ހިތަދޫ އުތުރު ދާއިރާ އިން އެމްޑީޕީގެ ޕްރައިމެރީގައި އޭނާ އާ ވާދަ ކުރަަން އެހެން ކެންޑިޑޭޓަކު ނުނިކުތުމަކީ ވެސް ދާއިރާގެ ރައްޔިތުންގެ ތާއީދު ވަރަށް ބޮޑަށް އޮތްކަން ދައްކުވައިދޭ ކަމެއް ކަމަށެވެ.
"އަނެއްކާ އަޅުގަނޑަކީ ލޯކަލް ގަވަނަސް ވަރަށް ރަނގަޅަށް އެނގޭ މިކަން ކުރެވޭ ވަރުގެ ގާބިލް މީހެއް ކަމަށް އަޅުގަނޑު ދެކެނީ. މި ތިން އަހަރުގެ ތެރޭގެ ތަޖުރިބާ އިން ވެސް އެކަން ފެންނާނެ،" އޭނާ ވިދާޅުވި އެވެ. "އެހެންވެ ރައްޔިތުން އަޅުގަނޑު ހޮއްވަވާނެ ކަމަށް އަޅުގަނޑު ގަބޫލް ކުރަނީ."