މޯލްޑިވްސް ނެޝަނަލް ޕާޓީ (އެމްއެންޕީ)އަށް މެމްބަރުން އިތުރުކުރުމަށް އެ ޕާޓީގެ އުފެއްދުމުގައި އިސްކޮށް އުޅުއްވާ ބޭފުޅުން އަންނަ ހަފްތާގައި އަތޮޅުތެރެއަށް ދަތުރުފަށަން ނިންމައިފި އެވެ.
އެމްއެންޕީ އުފެއްދުމުގައި އިސްކޮށް އުޅުއްވާ ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު އަބްދުﷲ ރިޔާޒް އައްޑޫ ލައިވް އަށް ވިދާޅުވީ އެމްއެންޕީއަށް ވަންނަން އެދޭ މީހުނަށް ވީހާ ބޮޑަށް ފުރުސަތު ދިނުމަށް އަތޮޅު ތެރެއަށް ދަތުރުކުރަން ނިންމާފައިވާ ކަމަށެވެ.
"މި ވަގުތު މި ދަނީ ލީޑަރޝިޕްގެ ބޭފުޅުންގެ ތެރެއިން އަތޮޅު ތެރެއަށް ވަޑައިގަންނަވާނެ ބޭފުޅުންނާއި ރަށްތައް ފައިނަލް ކުރުމުގެ މަސައްކަތް. އަޅުގަނޑުމެންގެ ޓީމްތައް މިހާރުވެސް އަތޮޅު ތެރޭގައި އެބަ ހަރަކާތްތެރިވޭ. އެކަމު ލީޑަރޝިޕްގެ ބޭފުޅުންވެސް އަތޮޅު ތެރެއަށް ވަޑައިގަތުމަކީ މުހިންމު ކަމެއް ކަމަށް ދެކޭތީ ލީޑަރޝިޕުން ދާން މި ނިންމީ،" ރިޔާޒް ވިދާޅުވި އެވެ.
ރިޔާޒް ވިދާޅުވި ގޮތުގައި އެމްއެންޕީއަށް މިހާރު ވެސް ވަރަށް ތައުލީމީ މީހުންތަކެއް ވަނީ ގުޅިފަ އެވެ. އަދި އެހެންމެ އާއްމު ގިނަ ފަރާތްތަކެއްވެސް ގުޅެމުންދާ ކަމަށް އޭނާ ފާހަގަ ކުރެއްވި އެވެ.
"އަޅުގަނޑުމެންގެ ޕާޓީއަށް މިހާތަނަށް ގުޅިގެންވަޑައި ގެންނެވި ބޭފުޅުންގެ ތެރޭގައި އެބަ ހިމެނޭ 25 ބޭފުޅަކު މާސްޓަރ ޑިގްރީ އަދި އެއަށް ވުރެ މަތީ ތައުލީމް ހުރި، އޭގެ ތެރޭގައި ޕީއެޗްޑީ ނަންގަވާފައި ތިބި ބޭފުޅުން އެބަ ތިއްބެވި. މިއީ އެއް ހަފްތާގެ ތެރޭގައި ގުޅިވަޑައިގެންނެވި ބޭފުޅުން ތައުލީމީ ބޭފުޅުންނަށް އެކަނި ބެލިޔަސް. އަދި އެ ނޫންވެސް ތައުލީމީ ގާބިލް ބޭފުޅުންތަކެއް ޕާޓީއާ ގުޅިއްޖެ. ވަރަށް އުޖާލާކޮށް މި ފެންނަނީ. އަދި މިހާރުވެސް މާލޭގައި ވެސް ވަރަށް ގިނަ ފަރާތްތަކުން އަޅުގަނޑުމެންނާ ބައްދަލު ކުރަމުން އެބަ ދޭ ޕާޓީއާ ގުޅުމަށް،" ރިޔާޒް އެވެ.
އެމްއެންޕީގެ އއަމާޒަކީ ކުރިއަށް އޮތް ރިޔާސީ އިންތިހާބުގައި ވާދަކޮށް ކާމިޔާބުކުރުން ކަމަށް އެ ޕާޓީގެ ފައުންޑާ އަދި ދަނގެތި ދާއިރާގެ މެމްބަރު މުހައްމަދު ނާޒިމް ވަނީ ވިދާޅުވެފައި އެވެ. އެ ޕާޓީއަށް މެމްބަރުން އިތުރުކުރުމަށް ރަޖިސްޓްރޭޝަން އޮފީހެއް ވެސް ވަނީ ހުޅުވާފައި އެވެ.
ނާޒިމާއި ރިޔާޒްގެ އިތުރުން އެ ޕާޓީގައި އުފެއްދެވުމުގައި އިސްކޮށް އުޅުއްވަނީ ވިލިމާލެ ދާއިރާގެ މެމްބަރު އަހުމަދު އުޝާމާއި ރައްޔިތުން މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ (މޮސްޓާ) އާއި ނިލަންދޫ ދާއިރާގެ މެމްބަރު އަބްދުލް މުހުސިން ހަމީދެވެ.