ބޮލީވުޑްގެ މަަޝްހޫރު ކުޅަދާނެ ބަތަލާ ޕްރިޔަންކާ ޗޯޕްޅާގެ ކާމިޔާބީ ފާހަގަ ކުރަން ރާއްޖޭގެ މަޝްހޫރު ނެށުންތެރިޔާ ސުނީތާ އަލީ "އަ ޓްރިބިއުޓް ޓް ޕްރިޔަންކާ ޗޯޕްޅާ ބައި ސުނީތާ އަލީ މޯލްޑިވްސް" ގެ ނަމުގައި ޔޫޓިއުބް ވީޑިއޯއެއް ނެރެފި އެވެ.
ހުކުރު ދުވަހު ޔޫޓިއުބުގައި އާންމު ކުރި މި ވީޑިއޯގައި ސުނީތާ ވަނީ ޕްރިޔަންކާގެ ފޮޓޯތަކެއް ބޭނުންކޮށްގެން ޒީނަތްތެރިކޮށްފައިވާ ސްޓޭޖެއްގެ މަތީގައި ޕްރިޔަންކާގެ ބައެއް ލަވަތަކެއް ނަށައިފަ އެވެ.
އެގޮތުން ދާދި ފަހުން ޕްރިޔަންކާގެ އަޑުން ކިޔާފައިވާ އަދި މިހާރު ވަރަށް ބޮޑު މަގުބޫލް ކަމެއް ވެސް ލިބިފައިވާ "އިން މައި ސިޓީ" އާއި "އެގްޒޯޓިކް" ފަދަ ލަވަތައް ހިމަނައިގެން ތައްޔާރުކޮށްފައިވާ މިކްސްއަކަށް ސުނީތާ ވަނީ ބެކް ޑާންސަރުންނާ އެކު ނަށައިފަ އެވެ.
މި ވީޑިއޯގައި އަދި ޕްރިޔަންކާގެ ބައެއް ފިލްމްތަކުގައި ހިމެނޭ ލަވަތަކުގެ ތަންތަންކޮޅާއި، އޭނާ އަށް އެކި އެވޯޑް ހަފުލާތަކުން، އެވޯޑް ހާސިލް ކުރާ މަންޒަރު ދައްކުވައިދޭ ކްލިޕްތައް ވެސް ހިމަނާފައިވެ އެވެ.
ސުނީތާ ބުނީ ޕްރިޔަންކާ އަށް މިފަދަ ޓްރިބިއުޓެއް ދޭން ނިންމީ، ބޮލީވުޑާ އެއްވެސް ގުޅުމެއް ނެތް އާއިލާއަކުން ނިކުމެ، އޭނާ މިހާތަނަށް ހޯދާފައިވާ ކާމިޔާބީތަކަކީ އަންހެނެއްގެ ހައިސިއްޔަތުން ފަހަރުވެރިވާން ޖެހޭ ވަރުގެ ކާމިޔާބީތަކަކަށްވާތީ ކަމަށެވެ.
އަދި ރާއްޖެއަކީ ވެސް ޕްރިޔަންކާގެ ވަރަށް ގިނަ ފޭނުން ތިބި ގައުމަކަށްވެފައި އޭނާއަކީ ވަރަށް ގިނަ ބަޔަކަށް އިންސްޕިރޭޝަނެއް ކަމަށް ވެސް، ވީޑިއޯ ލަވަ އަލްބަމްތައް ވެސް ނެރޭ ސުނީތާ ބުންޏެވެ.
ސުނީތާ ޕްރިޔަންކާ އަށް ދޭ ޔޫޓިއުބް ޓްރިބިއުޓް ފެށޭ އިރު، އޭނާ އަށް ތައުރީފްކޮށް ވަރަށް ގިނަ ވާހަކަތައް ހިމަނާފައިވެ އެވެ.
މި ވީޑިއޯ މިހާތަނަށް 248 އަށް ވުރެ ގިނަ މީހުން ވަނީ ބަލައިފަ އެވެ.