ސ. ފޭދޫ ސިއްހީ މަރުކަޒުގައި ގާއިމު ކުރި އިމަޖެންސީ ރޫމް މިއަދު ރަސްމީކޮށް ހުޅުވައިފި އެވެ.
އެތަން ހުޅުވަން މިއަދު ހަވީރު ބޭއްވި ރަސްމިއްޔާތެއްގައި، އިމަޖެންސީ ރޫމް ހުޅުއްވައި ދެއްވީ ހިތަދޫ ރީޖަނަލް ހޮސްޕިޓަލްގެ މެނޭޖަރު ހަދީޖާ ހަފުސާ އާއި ފޭދޫގެ މަޝްހޫރު ޑޮކްޓަރެއް ކަމަށްވާ އިބްރާހީމް ހަލީލް (ޑރ. ދޮން ތުއްތޫ) އެވެ.
މި ރަސްމިއްޔާތުގައި ސިއްހީ މަރުކަޒުގެ ހުރިހާ މުވައްޒަފުން ބައިވެރިވި އެވެ.
ފޭދޫ ސިއްހީ މަރުކަޒު ހިންގެވުމާ ހަވާލުވެ ހުންނެވި އިހުތިޝާމް ނަޖީބް (އިންތާ) ވިދާޅުވީ ސިއްހީ މަރުކަޒުގައި ގާއިމު ކުރެވުނު އިމަޖެންސީ ރޫމަކީ، ވިލާގެ ޗެއާމަން ގާސިމް އިބްރާހީމްގެ ދީލަތި އެހީ އާ އެކު ކުރެވުނު ކަމެއް ކަމަށެވެ.
އަދި މިތަނުގެ ސަބަބުން ކުރިން ބޭސް އަޅާ ކޮޓަރީގެ ގޮތުގައި ވަރަށް އާދައިގެ ހިދުމަތް ދެމުން ގެންދިޔަ ނަމަވެސް، އިމަޖެންސީ ރޫމްގެ ސަބަބުން އިތުރު ފަަސޭހަތަކެއް ލިބިގެން ދާނެ ކަމަށް އިންތާ ވިދާޅުވި އެވެ.
ސިއްހީ މަރުކަޒުގައި އިމަޖެންސީ ރޫމެއް ހެދުމުގެ އިތުރަށް ގާސިމް ދެއްވި ފައިސާގެ އެހީން، އެތަނުގެ އޮފީސް ބައިގެ ޖާގަ ވެސް ވަނީ ބޮޑުކޮށްފަ އެވެ. އިންތާ ވިދާޅުވީ މި މަސައްކަތްތަކަށް 153،000ރ. އަށް ވުރެ ގިނައިން ހަރަދުވި ކަމަށެވެ.
މި މަސައްކަތް ކޮންޓްރެކްޓް އުސޫލުން ކުރީ މަރަދޫ ނައިސްވޭ ހޮލްޑިން އެވެ.
ހަފުސާ ވިދާޅުވީ ސިއްހީ މަރުކަޒުގައި އިމަޖެންސީ ރޫމެއް ގާއިމު ކުރެވިގެން ދިއުމަކީ އެތަނަށް ލިބުނު ވަރަށް ބޮޑު ކުރިއެރުމެއް ކަމަށެވެ. އަދި މިއީ އެތަނުގެ އިސްވެރިންނާއި ހުރިހާ މުވައްޒަފުންގެ މަސައްކަތުން ހާސިލް ކުރެނު ކާމިޔާބީއެއްކަން ފާހަގަ ކުރައްވައި، އެ ފަރާތްތަކަށް ހަފުސާ ވަނީ ޝުކުރު އަދާ ކުރައްވައިފަ އެވެ.
އޭނާ އިތުރަށް ވިދާޅުވީ ފޭދޫ ސިއްހީ މަރުކަޒުގެ މުވައްޒަފުންނަކީ އައްޑޫގެ އެހެން ސިއްހީ މަރުކަޒުތަކާ ހިލާފަށް، އެތަނުގެ ކުރިއެރުމަށް ވަރަށް ބޮޑަށް އިސްކަންދޭ ތަނެއްކަން ފާހަގަ ކުރެވޭ ކަމަށެވެ.
އެހެންވެ ކުރިއަށް އޮތް ތަނުގައި ވެސް ތަނަށް އަންނަ އުމްރާނީ ކުރިއެރުމާ އެއްްވަރަށް، ހިދުމަތްތައް ވެސް ރަނގަޅު ކުރުމަށް ޓީމެއްގެ ގޮތުގައި މަސައްކަތް ކުރަން ހަފުސާ ވަނީ ގޮވާލައްވައިފަ އެވެ.
އަދި ސިއްހީ މަރުކަޒު ކުރިއަރުވަން އިންތާ ކުރައްވާ މަސައްކަތްތަކަށް ވެސް ހަފުސާ ވަނީ ޝުކުރު އަދާ ކުރައްވައިފަ އެވެ.