ޓީވީއެމުން މި އަހަރު ބޭއްވި ޤުރުއާން މުބާރާތް "ދިވެހި ރާއްޖޭގެ އެންމެ އަލި ގަދަ ތަރި" ކާމިޔާބް ކުރި ހުސައިން ޒާހިރު އަށް އެ މުބާރާތުގައި އިނާމަކަށް ލިބުނު އޭސީއެއް ސ. ހިތަދޫ ރީޖަނަލް ހޮސްޕިޓަލަށް ހަދިޔާކޮށްފި އެވެ.
އެ ހޮސްޕިޓަލްގެ މެނޭޖަރު ހަދީޖާ ހަފުސާ މިއަދު ވިދާޅުވީ މަރަދޫފޭދޫ ލިލީމާގޭ ޒާހިރު ހޮސްޕިޓަލަށް އޭސީ ހަދިޔާ ކުރީ އިއްޔެ ކަމަށެވެ.
އަދި އެތަނަށް އޭނާ އޭސީ ހަދިޔާ ކުރީ އޭގެ ބޭނުން އެންމެ ރަނގަޅު ގޮތުގައި ހިފޭނެ އެއް ތަނަކަށް ހޮސްޕިޓަލްވާތީ ކަމަށް ޒާހިރު ފާހަގަ ކުރެއްވި ކަމަށް ހަފުސާ ވިދާޅުވި އެވެ.
ޝަރަފުއްދީން ސްކޫލްގެ އިސްލާމް ޓީޗަރެއްގެ މަގާމު އަދާ ކުރައްވާ ޒާހިރު "ދިވެހި ރާއްޖޭގެ އެންމެ އަލި ގަދަ ތަރި" މުބާރާތް ކާމިޔާބް ކުރުމުން 100،000ރ. އަށް ވުރެ ގިނަ ރުފިޔާގެ ފައިސާގެ އިނާމާއި ގިނަ އަދަދެއްގެ ބޮޑެތި ހަދިޔާ އޭނާ އަށް ލިބިފައިވެ އެވެ.