ޑޮކްޓަރުންނަށް މިހާރު ދެވޭ މުސާރަ ކުޑަކަމުން، ރާއްޖޭން ބޭރުން ޑޮކްޓަރުން ހޯދަން ދަތިވެފައި ވަނިކޮށް، އާ ސަރުކާރުން ޑޮކްޓަރުންގެ މުސާރަތަކަށް ބޮޑެތި ބަދަލުތަކެއް ގެނައުމުގެ މަސައްކަތް ފަށައިފި އެވެ.
ޑޮކްޓަރުން ނުލިބުމުގެ މައްސަލަ ވަރަށް އާންމުކޮށް ކުރިމަރިވެފައި އޮންނަ ހިތަދޫ ރީޖަނަލް ހޮސްޕިޓަލްގެ މެނޭޖަރު ހަދީޖާ ހަފުސާ ވިދާޅުވީ ހެލްތު މިނިސްޓްރީން ޑޮކްޓަރުންގެ މުސާރަތަކަށް ހެޔޮ ބަދަލެއް ގެނެސް އެއަށް ވަރަށް އަވަހަށް އަމަލު ކުރަން ފަށާނެ ކަމުގެ ސިގްނަލްތައް ލިބިފައިވާ ކަމަށެވެ.
އަދި އެކަމާ ގުޅޭ ގޮތުން ނިންމަން ޖެހޭ އެންމެ ފަހުން ކަންކަން މިނިސްޓްރީން ކުރަމުން އަންނަ ކަމަށް ވެސް ހަފުސާ ވިދާޅުވި އެވެ.
އޭނާ ވިދާޅުވީ ޑޮކްޓަރުންގެ މުސާރަތަކަށް ގެންނަ ބަދަލާ އެކު 22،000ރ. އާއި 65،000ރ. އާ ދޭތެރޭ އަދަދެއްގެ ކުރިއެރުމެއް އަންނާނެ ކަމަށެވެ.
އަދި މިއޮނިގަނޑަށް އަމަލު ކުރާ އިރު، ޑޮކްޓަރުންގެ ޑިއުޓީ އަށް ވެސް މިހާރަށް ވުރެ ހެޔޮ ބަދަލުތަކެއް އަންނާނެ ކަމަށް ހަފުސާ ވިދާޅުވި އެވެ.
އެނގިފައިވާ ގޮތުގައި މިނިސްޓްރީން މި ބަދަލު ގެންނަން ބޭނުންވީ ސިއްހީ ހިދުމަތަކީ ރައްޔިތުންނަށް ލިބެން ޖެހޭ ވަރަށް އަސާސީ ހިދުމަތަކަށްވެފައި، ދައުލަތުގެ ބަޖެޓްގައި ތާށި ކަމެއް ހުރި ނަމަވެސް، ރައްޔިތުން އިތުބާރު ކުރާ ފަދަ ސިއްހީ ހިދުމަތްތަކެއް ދެވޭނެ އިންތިޒާމުތަކެއް ހަމަޖެއްސުމެވެ.
ހިތަދޫ ރީޖަނަލް ހޮސްޕިޓަލަށް މީގެ ކުރިން ތަފާތު ދާއިރާތަކުން ޑޮކްޓަރުން ހޯދަން ވަރަށް ބޮޑަށް ދަތިވެފައި އޮތް ނަމަވެސް، އާ ސަރުކާރު އައުމަށް ފަހު، އެ ހޮސްޕިޓަލަށް ބޭނުންވާ ޑޮކްޓަރުން ހެލްތު މިނިސްޓްރީން މިހާރު ވަނީ ހަމަޖައްސައި ދީފަ އެވެ.
އެހެންވެ މި ވަގުތު ޑޮކްޓަރުންގެ ދަތި ކަމެއް ނެތް ކަމަށް ހަފުސާ ވިދާޅުވި އެވެ.