އައްޑޫގައި ހިންގާ ވެބްސައިޓެއް ކަމަށްވާ "ވޮއިސް އޮފް މީދޫ (ވީއޯއެމް)" އިން އިންތިޒާމްކޮށްގެން ބޭސިކް ޖާނަލިޒަމް ވޯކްޝޮޕެއް ބާއްވައިފި އެވެ.
މި މަހުގެ 17 ވަނަ ދުވަހު ވިލާ ކޮލެޖްގެ އައްޑޫ ކެމްޕަސްގައި ބޭއްވުނު މިވޯކްޝޮޕްގައި ހުޅުމީދޫގެ 30 ކުއްޖަކު ބައިވެރިވެ ވޯކްޝޮޕް ފުރިހަމަކޮށްފައިވެ އެވެ.
ހުޅުމީދޫގައި ނޫސްވެރިކަން ކުރިއެރުވުމަށާއި ސްކޫލްތަކުގެ ދަރިވަރުންނާއި ޒުވާނުން ނޫސްވެރިކަމުގެ ދާއިރާއަށް އަހުލުވެރި ކުރުމުގެ މަގްސަދުގައި ވީއޯއެމުން އިންތިޒާމް ކުރި ވޯކްޝޮޕްގައި މައުލޫމާތު ދެއްވީ ރާއްޖޭގެ ނޫސްވެރިކަމުގެ ދާއިރާގައި މަސައްކަތް ކުރައްވަމުން ގެންދަވާ ތަޖުރިބާކާރު ބޭފުޅެކެވެ.
ވޯކްޝޮޕްގައި ބައިވެރިވެ ވޯކްޝޮޕް ނިންމި ސްކޫލްތަކުގެ ދަރިވަރުންނާއި ޒުވާނުން ދެ ގްރޫޕަކަށް ބަހާލައިގެން ބާއްވާ ބަހުސްއެއް މި މަހުގެ 26 ވަނަ ދުވަހުގެ ރޭ 9:00 ގައި އަތޮޅު މަދަރުސާގެ ހޯލްގައި ބާއްވާ ގޮތަށް ވެސް ވަނީ ހަމަޖެހިފަ އެވެ.
ވީއޯއެމުން ބޭއްވި ވޯކްޝޮޕް ފުރިހަމަ ކުރި ކުދިންގެ ތެރެއިން އައްޑޫ ލައިވަށް ލިޔަން ޝައުގުވެރިވާ ކުދިންނަން އެ ފުރުސަތު ވަނީ ހުޅުވާލައިފަ އެވެ.
އެފަދަ ކޮންމެ ކުއްޖަކަށް އައްޑޫ ލައިވުން މަރުހަބާ ކިޔާނެ އެވެ.
