މި އަހަރު ރިލީޒްވި ފިލްމުތަކުގެ ތެރޭގައި ބޮޑު ކާމިޔާބީއެއް ހޯދި ފަރްހާން އަހްތަރު ލީޑް ރޯލް ކުޅުނު "ބާގް މިލްކާ ބާގް" ކަމަކު ނުދާ ކަމަށާއި އެއީ ބޮޑު ފޭކެއް ކަމަށް މަޝްހޫރު އެކްޓަރު ނަސީރުއްދީން ޝާހް ބުނެފި އެވެ.
"ބާގް މިލްކާ ބާގް" އަކީ އިންޑިއާގެ ކުރީގެ މަޝްހޫރު އެތުލީޓް މިލްކާ ސިންގުގެ ހަޔާތުގެ މައްޗަށް އޯމް ޕްރަކާޝް މެހެރާ ޑައިރެކްޓް ކުރި ފިލްމެވެ.
މި ފިލްމް ވަނީ ބޮކްސް އޮފީހުގައި 100 ކްރޯޑް ރުޕީސް އަށް ވުރެ ބޮޑު ވިޔަފާރިއެއް ވެސް ކޮށްފަ އެވެ. "ބާގް މިލްކާ ބާގް" ރިލީޒްވީ ޖުލައި މަހުގެ 5 ވަނަ ދުވަހު އެވެ.
ކާމިޔާބް ގިނަ ފިލްމްތަކެއް ކުޅެފައިވާ އަދި ހޮލީވުޑްގެ ބައެއް ފިލްމްތަކުގައި ވެސް މަސައްކަތްކޮށްފައިވާ ނަސީރުއްދީން ބުނީ މިލްކާގެ ކެރެކްޓާ އަށް ފަރްހާން ވަރަށް ބޮޑަށް މަސައްކަތްކޮށްފައި ހުރިކަން ފާހަގަ ކުރެވޭ ކަމަށެވެ.
އެގޮތުން ހަށިގަނޑަށާއި ބޮލުގެ އިސްތަށިގަނޑު ފަރްހާން ދިގު ކުރިކަން ނަސީރުއްދީން ފާހަގަ ކުރި އެވެ.
"އެކަމަކު ފިލްމުގައި އޭނާގެ ކެރެކްޓާ ވައްތަރެއް ނޫން މިލްކާއަކާ. ވަރަށް ފޭކް. އޭނާ ބޮޑަށް ވައްތަރީ ރޮކް އާ (ހޮލީވުޑްގެ މަޝްހޫރު އެކްޓަރު ޑްވޭން ޖޯންސަން). އަންހެން ކުދިން ފަރްހާންގެ ހަށިގަނޑު ސްކްރީނުން ފެނިފައި ހަޅޭއްލަވައި ހެދި. އެއީ މީގެ ފާހަގަކޮށްލެވޭ ކަމެއް." ފަރްހާންގެ ދައްތަ ޒޯޔާ އަހުތަރުގެ "ޒިންދަގީ ނާ މިލޭގީ ދޮބާރާ" ގައި ފަރްހާންގެ ބައްޕަގެ ރޯލް ކުޅުނު ނަސީރުއްދީން ބުންޏެވެ. "އަހަރެން ގަބޫލް ކުރަން އެ ފިލްމުގެ މަންޒަރުތަކާ އެއްޗެހި ނަގާފައި ހުރި ގޮތް ވަރަށް ރީތި. ޓެކްނިކަލީ އެއީ މޮޅު ފިލްމެއް."
ނަސީރުއްދީންގެ ކުރިއަށް ހުރި ފިލްމްތަކުގެ ތެރެއިން ބެލުންތެރިންނާ ހަމައަށް ދެން އެންމެ އަވަހަށް އަންނާނީ އޭނާ މަދޫރީ ޑިކްޝިޓް އާ އެކު ފެންނަ "ދޭޅް އިޝްގިޔާ" އިންނެވެ.
މި މަހުގެ 13 ވަނަ ދުވަހު ރިލީޒްވި ނަސީރުއްދީންގެ "ޖެކްޕޮޓް" ބަލާނެ ބަޔަކު ނުވުމުން، ފިލްމް ވަނީ ބޮޑު ފްލޮޕަކަށްވެފަ އެވެ.