ހުޅުމާލޭގައި 3،000 ހައުސިން ޔުނިޓް އަޅަން ސީ ލައިފް ގްލޯބަލްއާ ހަވާލުކުރުމުން އެ ތަންތަން ވިއްކުމުގެ ނަމުގައި އެތައް ބައެއްގެ އަތުން ބުކިން ފީ ނެގުމަށް ފަހު، މަސައްކަތް ނުކޮށް ފިލައިގެން އުޅެނިކޮށް ރާއްޖެއިން ބޭރުން ހައްޔަރުކޮށް ގެނެސްފައިވާ ސީލައިފް ގްލޯބަލްގެ މެނޭޖިން ޑިރެކްޓަރު މުހައްމަދު އަހުމަދު މޫސާ (އައްމަޓީ)ގެ މައްޗަށް އުފުލާފައިވާ ދައުވާތަކަށް އޭނާ އިންކާރުކޮށްފިއެވެ.
މި މައްސަލައިގައި އަންމަޓީގެ މައްޗަށް 42 ދައުވާއެއް އުފުލާފައިވެއެވެ. އެހެންނަމަވެސް މިއަދު ކުރިއަށްދިޔަ ޝަރީއަތުގައި އޭނާގެ މައްޗަށް އިއްވާފައިވަނީ 4 ދައުވާއެކެވެ. އަދި އެ 4 ދައުވާއަށް އައްމަޓީ އިންކާރުކޮށްފައިވެއެވެ. އަދި ދެން އަންނަ އަޑުއެހުމެއްގައި ތަފްސީލީ ގޮތެއްގައި އިންކާރުކުރާ ސަބަބުތައް ހުށަހަޅާނެކަމަށެވެ. މައްސަލަ ބައްލަވާ ގާޒީ ނިންމެވީ ދެން އަންނަ އަޑުއެހުމެއްގައި ދެން ހުރި ދައުވާތައް އިއްވުމަށެވެ.
މިއަދު ކުރިއަށްގެންދިޔަ އަޑުއެހުމުގައި އައްމަޓީގެ ބަންދާ ގުޅޭގޮތުންވެސް ވާހަކަދައްކާފައިވެއެެވެ. އެގޮތުން މީގެ ކުރިން މައްސަލަ ބައްލަވާ ގާޒީ ޝަރުތުތަކަކާއެކު އައްމަޓީ ބަންދުން ދޫކޮށްލާފައިވާއިރު ދައުލަތުން އެ ނިންމުން އިސްތިއުނާފު ކުރުމުން ހައިކޯޓުން ވަނީ އައްމަޓީ ބަންދު ކުރުމަށް އަމުރުކޮށްފައެވެ.
މިއަދުގެ އަޑުއެހުމުގައި ދައުލަތުން ބުނެފައިވަނީ އައްމަޓީ ފިލާފާނެކަމުގެ އަދި ކޯޓަށް ހާޒިރުނުވެދާނެ ކަމުގެ ބިރުއޮތްކަމަށެވެ. އެހެން ކަމުން ހައިކޯޓުން ނިންމި ކަންކަމުގެ މައްޗަށް ރިއާޔަތްކޮށް އައްމަޓީގެ ބަންދު ދެމެހެއްޓުމަށް ދައުލަތުން އެދިފައިވެއެވެ.
އައްމަޓީގެ ބަންދާ ގުޅޭގޮތުން އޭނާގެ ވަކީލް މުހުތާޒް މުހުސިން ވާހަކަ ދައްކަވަމުން ވިދާޅުވީ، ހައިކޯޓުގެ ނިންމުމުގައި ފަނޑިޔާރު ފަރުހީޒާ މުހިންމު ކަންތައްތަކެއް ފާހަގަކޮށްފައިވާކަމަށެވެ. އެގޮތުން ކުރިން އޮތް ޝަރުތުތަކުގެ އިތުރަށް ކަފާލާތުގެ ދަށުން ނުވަތަ ވަކިތަނަކަށް ގޮސް ސޮއިކުރުން ފަދަ އިތުރު ހަރުދަނާ ޝަރުތުތަކެއް ލުމަށްފަހު ބަންދުން ދޫކުރެވިދާނެކަން ފަނޑިޔާރު ފަރުހީޒާ ފާހަގަކުރައްވާފައިއޮތްކަން މުހުތާޒް ފާހަގަކުރެއްވިއެވެ.
މިކަމުގައި ދެފަރާތުގެ ވާހަކަތަކަށް އަޑުއެއްސެވުމަށްފަހު މައްސަލަ ބައްލަވާ ގާޒީ ވިދާޅުވި އައްމަޓީގެ ބަންދާއި މެދު މާދަމާ ގޮތެއް ނިންމަވާނެކަމަށެވެ.
އައްމަޓީއަށް 42 ދައުވާއެއް އުފުލާފައިވޭ!
13 މާރިޗު 2014 ދުވަހު، ހައުސިންގ ޑިވަލޮޕްމެންޓް ކޯރޕަރޭޝަން (އެޗްޑީސީ) އާއި ސީ-ލައިފް ގްލޯބަލް އިންކް ޕްރައިވެޓް ލިމިޓެޑާ ދެމެދު ވެފައިވާ އެއްބަސްވުމެއްގެ ދަށުން ހުޅުމާލޭގައި 3000 (ތިންހާސް) ހައުސިންގ ޔުނިޓް އެޅުމަށް، ސީ-ލައިފް ގްލޯބަލް އިންކް ޕްރައިވެޓް ލިމިޓެޑާ ޙަވާލުކުުރުމުން، އެ އެއްބަސްވުމުގައިވާ މުއްދަތުގައި ހައުސިންގ ޔުނިޓްތައް އެޅުމުގެ އަމަލީ މަސައްކަތް ފުރިހަމަނުކޮށް، މަކަރާއި ހީލަތުން އެކި މީހުން އަތުން ބޮޑެތި އަދަދުތަކުން ފައިސާ ނަގައި، އެ ފައިސާއަށް ހިޔާނާތްތެރިވެފައިވާ ކަަމަށް ތުހުމަތުކުރެވުނު މައްސަލައިގައި އައްމަޓީގެ މައްޗަށް ދައުވާ ކޮށްފައިވަނީ 30 މޭ ގައެވެ.
މި މައްސަލައިގައި އައްމަޓީގެ މައްޗަށް ވަނީ ހިޔާނާތްތެރިވުމުގެ ކުށުގެ 42 ދައުވާ ކޮށްފައިވެއެވެ.
ޕީޖީ އޮފީހުން ބުނެފައިވަނީ މި ކުށްތަކަށް ޤާނޫނުގައި ކަނޑައަޅާފައިވާ އަދަބަށް ބަލާއިރު، މި ދައުވާތައް ސާބިތުވެއްޖެނަމަ 65 އަހަރު ދުވަހުގެ ޖަލު އަދަބެއް ކަނޑައެޅޭނެކަމަށް ބެލެވޭކަމަށެވެ.