ލޯކަލް ކައުންސިލް އިންތިޚާބަށް އެމްޑީޕީން ނުކުންނަވާ ކެންޑިޑޭޓުންނާއި މެނޭޖަރުންނާ ދާއިރާތަކުގެ މެމްބަރުންނަށް ޚާއްޞަ ތަމްރީނު ޕްރޮގްރާމެއްގެ ގޮތުގައި ހިންގުނު "ކެމްޕެއިން ޓްރޭނިން ވާކްޝޮޕް" 26 ސަރަޙައްދެއްގައި ބާއްވައިފި އެވެ.
ކުރިން ރޭވިފައިވާ ދާއިރާތަކުގެ ތެރެއިން ތަފާތު އިތުރު ހަތަރު ސަރަހައްދެއްގައި މި ވާކްޝޮޕް މި ހަފްތާތެރޭ ހިންގަވައި ނިންމަވާނެ ކަމުގައިވެސް އެމްޑީޕީ ސެކެޓޭރިއަޓުން ވަނީ މަޢުލޫމާތު ދެއްވާފަ އެވެ.
ވާކްޝޮޕްތައް ބޭއްވުނީ ހއ.ދިއްދޫ، ހއ.އިހަވަންދޫ، ހދ.ކުޅުދުއްފުށި، ށ.ކޮމަންޑޫ، ށ.މިލަންދޫ، ނ.ޅޮހި، ރ.ހުޅުދުއްފާރު، ރ.އިނގުރައިދޫ، ބ.އޭދަފުށި، ބ.ތުޅާދޫ، ޅ.ނައިފަރު، ޅ.ހިންނަވަރު، ޅ.ކުރެންދޫ، އއ.އުކުޅަސް، އދ. މަހިބަދޫ، ވ. ފެލިދޫ، ތ.ވިލުފުށި، ތ.ތިމަރަފުށި، ލ.ގަން، ގއ.ވިލިގިލި، ގދ.ތިނަދޫ، ގދ.ގައްދޫ، ޏ.ފުވައްމުލައް، އައްޑޫ ސިޓީ އަދި މާލެގައެވެ.. ކޮންމެ އަތޮޅެއްގެ ހުރިހާ ރަށެއްގެ ބައިވެރިންނަށް ވެސް ތަމްރީން ދެވުނެވެ.
ވާކްޝޮޕްގައި އެމްޑީޕީގެ ޓިކެޓުގައި ކުރިއަށް އޮތް ލޯކަލް ކައުންސިލްތަކުގެ އިންތިޚާބުގައި ވާދަކުރައްވާ ހުރިހާ ކެންޑިޑޭޓުންނަށާއި ހުރިހާ ރަށެއްގެ އެމްޑީޕީ ކެމްޕޭންގެ ހަރަކާތްތެރިންނަށް ތަމްރީން ދިނެވެ.
ކެމްޕޭންތައް ކުރިއަށް ގެންދާނެ ގޮތާއި ސިޔާސީ ކަންކަމުގައި ކެމްޕޭން ކުރުމުގައި ކަންކުރަންވީ ގޮތާއި ގުޅޭ ގޮތުން ތަފްޞީލްކޮށް މަޝްވަރާ ކުރެވުނެވެ.
ލޯކަލް ކައުންސިލް އިންތިޚާބުގައި އެމްޑީޕީގެ ޓިކެޓް އޮވެގެން 827 ކެންޑިޑޭޓޫން ވާދަ ކުރައްވާނެ ކަމަށާއި، ބައެއް ދާއިރާގައި އެމްޑީޕީގެ ޓިކެޓްގައި ކެންޑިޑޭޓުން ފާހަގަ ނުކުރެއްވުނު ނަމަވެސް، އެމްޑީޕީގެ ތާއީދު އޮވެގެން ވާދަ ކުރައްވާނެ ކެންޑިޑޭޓުން ހުރިހާ ދާއިރާއަކުން ވެސް ތިއްބަވާނެކަމުގައި އެމްޑީޕީ ގެ އިންތިޚާބު ކޮމިޓީން ވަނީ ފާހަގަ ކުރައްވާފަ އެވެ.
އެމްޑީޕީގެ ޕޮލިސީ ޓީމުންނާއި ފަންނީ މެމްބަރުން އެއްކުރައްވާފަހުރި މަޢުލޫމާތުތަކުގެ އަލީގައި ކޮންމެ ރަށަކަށް ތަފާތު ތަޞައްވަރާއި އަމާޒުތައް ވަނީ ކަނޑައަޅުއްވާފަ އެވެ.
އަދި މި މަހުގެ 28 ވާ ހޮނިހިރު ދުވަހު ލޯކަލް ކައުންސިލް އިންތިޚާބު ގެ އެމްޑީޕީ ކެމްޕޭން އިފްތިތާހު ކުރެވިގެން ދާނީ ކޮންމެ ރަށަކަށް ޚާއްޞަ ވަކި އަމާޒުތަކެއް ނުވަތަ މެނިފެސްޓޯއެއް އޮވެގެން ކަމުގައި އިންތިޚާބު ކޮމިޓީން ވަނީ ފާހަގަ ކުރައްވާފަ އެވެ.