ބޮލީވުޑްގެ މަޝްހޫރު ބަތަލާ ސްރީދޭވީ ގެ ގޭގައި ރޭ އަލިފާނުގެ ހާދިސާއެއް ހިނގައިފި އެވެ.
މީޑިއާ ރިޕޯޓްތައް ބުނާ ގޮތުން ސްރީދޭވީ އާއި އޭނާގެ ފިރިމީހާ ބޮނީ ކަޕޫރާއި ދެ ކުދިންގެ އިތުރުން މައިދައިތަ މުމްބާއީގެ އަދޭރީ ވެސްޓް ސަރަހައްދުގައި ދިރިއުޅޭ ގޭގައި ރޭ އިރާކޮޅު ވަގުތެއްގައި އަލިފާނުގެ ހާދިސާއެއް ހިނގީ ސްރީދޭވީގެ ކޮޓަރީގައި ހުރި އޭސީ ޝޯޓްވެގެންނެވެ.
މި ހާދިސާ ހިނގުމާ އެކު "މިސްޓަ އިންޑިއާ" އާއި "ޗާލް ބާޒް" ފަދަ ކާމިޔާބް ފިލްމްތައް ކުޅެފައިވާ ސްރީދޭވީ ވަނީ މައިދައިތަ އާއި ކުދިން ސަލާމަތް ކުރަން ގެއިން ބޭރަށް ނެރަފަ އެވެ. ފަހުން މައިދައިތަ ދިޔައީ، ސަންޖޭ ކަޕޫރު ދިރިއުޅޭ ގެއަކަށެވެ.
ގޭގައި ގެންގުޅޭ ޕެޓް ޑޯގްތައް ވެސް ސްރީދޭވީ ވަނީ ސަލާމަތްކޮށްފަ އެވެ.
މި ހާދިސާ ހިނގި އިރު ބޮނީ ގެއަކު ނެތެވެ. އެހެން ނަމަވެސް އެފަދަ ކަމެއް ހިނގިކަން އެނގުމާ އެކު ބަންޑްރާގައި ހުރެފައި ބޮނީ ވަނީ އާއިލާ ކައިރި އަށް ގޮސްފަ އެެވެ.
އަލިފާން ކޮންޓްރޯލް ކުރެވެންދެން ސްރީދޭވީގެ ދެ ކުދިން ވަގުތު ހޭދަ ކުރީ އެކުވެރިންތަކެއްގެ ގޭގަ އެވެ.
މި ހާދިސދާގައި އަލިފާން ރޯވި ކޮޓަރި އަށް މާ ބޮޑު ގެއްލުމެއް ނުލިބި ވަނީ ސަލާމަތްވެފަ އެވެ.
އެހެން ނަމަވެސް މި ހާދިސާގައި މުޅި ގެއިން ކަރަންޓް ކެނޑިގެން ގޮސްފައިވާތީ، ސްރީދޭވީ އާއި އޭނާގެ އާއިލާ ރޭ ހޭދަ ކުރީ ހޮޓަލެއްގަ އެވެ.