ނިމިގެން ދިޔަ ރިޔާސީ އިންތިހާބުގެ އޮފިޝަލުންގެ ގޮތުގައި މަސައްކަތް ކުރި މީހުންނަށް ލިބެން ޖެހޭ ފައިސާ ނުލިބިގެން އައްޑޫގެ ބައެއް އޮފިޝަލުން ކަންބޮޑުވުން ފާޅު ކުރަމުން ދިޔަ ނަމަވެސް މި މަސް ނިމުމުގެ ކުރިން އެ ފައިސާ ލިބޭނެ ކަމަށް އިލެކްޝަން ކޮމިޝަންގެ އައްޑޫ ޔުނިޓުން ބުނެފި އެވެ.
އެ ޔުނިޓް ހިންގެވުމާ ހަވާލުވެ ހުންނެވި އަހުމަދު މައުސޫމް މިއަދު ވިދާޅުވީ، މާ އަވަސް އަރުވާލައިގެން ބައެއް އޮފިޝަލުން ފައިސާ ނުލިބިގެން އުޅެނީ ކަމަށެވެ.
"އެކަން ކުރިއަށް އެބަދޭ. އިލެކްޝަނުން އޮފިޝަލުންގެ ހާޒިރީ އާ އެއްޗެހި ޗެކްކޮށް، ދޭން ޖެހޭ ފައިސޭ ދޫކުރަން ކުރަން ޖެހޭ މަސައްކަތްތައް ކުރަމުން އަންނަނީ. އެހެންވީމާ ފިނޭންސުން އީސީ އަށް ފައިސާ ދޫކުރަން ފެށުމާ އެކު އޮފިޝަލުންނަށް ފައިސާ ލިބޭނެ،" އޭނާ ވިދާޅުވި އެވެ. "އަޅުގަނޑުމެން އުންމީދު މި ކުރަނީ މި މަސް ނިމުމުގެ ކުރިން ފައިސާ ހުރިހާ އޮފިޝަލުންނަށް ލިބޭނެ ކަމަށް."
މައުސޫމް އިތުރަށް ވިދާޅުވީ ނޮވެމްބަރު މަހުގެ 16 ވަނަ ދުވަހު ބޭއްވި ރިޔާސީ އިންތިހާބުގެ އޮފިޝަލުންނަށް ލިބެން ޖެހޭ ފައިސާގެ އިތުރަށް ސެޕްޓެމްބަރު 19 ގައި ބާއްވަން އުޅުމަށް ފަހު، ކެންސަލް ކުރި އިންތިހާބުގެ ޓްރޭނިންގައި ބައިވެރިވެގެން ލިބެން ޖެހޭ ފައިސާ ވެސް އޮފިޝަލުންނަށް ލިބޭނެ ކަމަށެވެ.
"ފައިސާ ދޫކުރާނީ ހާޒިރީ އަށް ވަރަށް ބޮޑަށް ބެލުމަށް ފަހު. އައްޑޫގައި 300 އަށް ވުރެ ގިނަ އޮފިޝަލުން ހަރަކާތްތެރިވި އިރު، ފުރިހަމަ ކުރަން ޖެހޭ ކަންކަން ފުރިހަމަ ނުކޮށް ހަރަކާތްތެރިވި އޮފިޝަލުން އެންމެ ގިނައިން ވެސް ތިބީ އައްޑޫގައިކަން ފާހަގަ ކުރެވޭ،" އޭނާ ވިދާޅުވި އެވެ. "އެކަމަކު ކޮންމެ ގޮތެއް ވިޔަސް ލިބެން ޖެހޭ ފައިސާއެއް ވެއްޖިއްޔާ އޮފިޝަލުންނަށް އެ ފައިސާ ލިބޭނެ."