ޔޫތު މިނިސްޓްރީގެ ދަށުން ހިންގަމުން އަންނަ ނެޝަނަލް ކެރިއާ ގައިޑެންސް ސެންޓަރު (އެންސީޖީސީ) ގެ ޓީމެއް އަންނަ މަހު އައްޑު އަށް އަންނަ ގޮތަށް ހަމަޖެހިއްޖެ އެވެ.
ވަޒީފާއެއް ނެތް އުމުރުން 18-35 އަހަރާ ދެމެދުގެ ޒުވާނުންނާ ބެހޭ މައުލޫމާތު އެއްކޮށް، އެ މީހުންނާ ބެހޭ ދަފުތަރެއް އެކުލަވާލައި ވަޒީފާ ހޯދައި ދޭން މަސައްކަތް ކުރާ އެންސީޖީސީގެ އޮފިޝަލަކު ވިދާޅުވީ ޖެނުއަރީ ނޫނީ ފެބްރުއަރީ ތެރޭގައި އައްޑު އަށް އެތަނުގެ ޓީމެއް ޒިޔާރަތް ކުރާނެ ކަމަށެވެ.
އޭނާ ވިދާޅުވީ ވަޒީފާ ނެތް ޒުވާނުންނާ ބެހޭ މައުލޫމާތު ރާއްޖޭގެ ހުރިހާ އަތޮޅުތަކަށް ޒިޔާރަތްކޮށްގެން ހޯދާ އިރު، އައްޑުއަކީ އެންސީޖީސީ އަށް މިހާތަނަށް ނުދެވި އޮތް ތިން އަތޮޅުން އެއް އަތޮޅު ކަމަށެވެ.
އެހެންވެ ވަރަށް އަވަހަށް އައްޑު އަށް ދަތުރެއްކޮށް، ވަޒީފާތަކާ ގުޅޭ ގޮތުން ތަފާތު ޕްރޮގްރާމްތަކެއް ހިންގާނެ ކަމަށް ބުންޏެވެ.
މީގެ ތެރޭގައި ޒުވާނުންނާއި ބެލެނިވެރިންނަށް ވެސް ހާއްސަކޮށްގެން ތަފާތު ޕްރޮގްރާމްތައް ހިންގަން ވަނީ ނިންމައިފަ އެވެ.
ދާދި ފަހުން ވެސް އައްޑޫގައި ވަޒީފާ ނެތް މީހުންނާ ބެހޭ މައުލޫމާތު ޔޫތު މިނިސްޓްރީން ހޯދާފައިވެ އެވެ.