މި އަހަރު ބޮލީވުޑްގައި އެންމެ ކާމިޔާބް ބަތަލާއަކީ ދީޕިކާ ކަމާ ދޭތެރޭ އެއްވެސް ޝައްކެއް ނެތެވެ.
އޭނާގެ ހަތަރު ފިލްމެއް ބެލުންތެރިންނާ ހަމައަށް އައި އިރު، އެ ހުރިހާ ފިލްމްތަކަކީ ވެސް ބޮކްސް އޮފީހުގައި އާދަޔާހިލާފް ވިޔަފާރިއެއް ކުރި ފިލްމުތަކެވެ.
މި އަހަރު ރިލީޒްވި ދީޕިކާގެ ފުރަތަމަ ފިލްމަކީ "ރޭސް 2" އެވެ. ޖެނުއަރީ މަގު ރިލީޒްވި އެ ފިލްމަކީ ބޮޑު ސްޓާ ކާސްޓެއް ހިމެނޭ އަހަރުގެ ފުރަތަމަ 100 ކްރޯޑް ފިލްމެވެ.
އޭގެ ފަހުން ދެން އައީ ރަންބީރު ކަޕޫރާ އެކު އެކު ދީޕިކާ ފެނިގެން ދިޔަ "ޔެ ޖަވާނީ ހޭ ދީވާނީ" އެވެ. މެއި މަހުގެ ފަހު ދުވަހު ރިލީޒްވި އެ ފިލްމަކީ ވެސް، 100 ކްރޯޑް ކުލަބުން ޖާގަ ހޯދުމުގެ އިތުރަށް، ބެލުންތެރިންގެ ސަމާލުކަން ވަރަށް ބޮޑަށް ހުއްޓުނު ފިލްމެކެވެ.
ސަބަބަކީ އޭނާގެ ކުރީގެ ލޯބިވެރިޔާ އާ އެކު ދީޕިކާ ފެނިގެން ދިޔަ ފިލްމެވެ.
އެ ފިލްމަށް ފަހު ދެން އައީ ބޮކްސް އޮފީހުގެ ގިނަ ރެކޯޑްތަކެއް މުގުރާލި ފިތުރު އީދު ދުވަހު ރިލީޒްވި "ޗެންނައި އެކްސްޕްރެސް" އެވެ. ޝާހްރުކް ހާނާ އެކު ދީޕިކާ ފެނިގެން ދިޔަ މި ފިލްމަކީ ބެލުންތެރިންގެ ސަޕޯޓް ވަރަށް ބޮޑަށް ލިބުނު ފިލްމެކެވެ.
ބޮކްސް އޮފީހުގައި "ޗެންނައި އެކްސްޕްރެސް" ވަނީ އާދަޔާހިލާފް ވިޔަފާރިއެއްކޮށްފަ އެވެ.
އެ ފިލްމްގެ ބޮޑު ކާމިޔާބީ އަށް ފަހު، ދީޕިކާ އަހަރު ނިންމާލީ ސަންޖޭ ލީލާ ބަންސާލީގެ 100 ކްރޯޑް ފިލްމް "ރާމް-ލީލާ" އިންނެވެ.
ރަންވީރު ސިންގާ އެކު ދީޕިކާ ފުރަތަމަ ފަހަރަށް ފެނިގެން ދިޔަ އެ ފިލްމަކީ ބެލުންތެރިން ވަރަށް ބޮަޑަށް ގަޔާވި، ކުލަގަދަ ހިތްގައިމު އަދި ހިޔާލީ ދުނިޔެއަކަށް ބެލުންތެރިން ގެނެސް ދިން ފިލްމެކެވެ.
މި ހަތަރު ހަތަރު ފިލްމާ އެކު މި އަހަރު ދީޕިކާ ނިންމާމީ ވަރަށް ބިޒީ ޝެޑިއުލަކާ ވެސް އެކުގަ އެވެ. އެގޮތުން އެއް ފަހަރާ އެއް ފިލްމެއްގައި މަސައްކަތް ކުރަމުން އަނެއްކޮޅުން، ރިލީޒްވާން ހުރި ފިލްމްތަކުގެ ޕްރޮމޯޝަން މަަސައްކަތުގައި ވެސް އޭނާ އުޅުނީ ވަރަށް އަވަދި ނެތި އެވެ.
އެހެންވެ ޗުއްޓީ އެއް ނަގައި، އާއިލާ އާ އެކު ވެސް ހޭދަ ކުރާނެ ވަގުތެއް ޒުވާން ބަތަލާއަކަށް މި އަހަރު ލިބޭ ގޮތެއް ނުވި އެވެ.
އެކަމަކު އަހަރު ނިންމާލަން ދީޕިކާ މިހާރު ވަނީ ޗުއްޓީއެއް ނަގައިފަ އެވެ. އެކުވެރިންނާއި އާއިލާ އާ އެކު ދީޕިކާ މި ޗުއްޓީ ހޭދަކޮށް އެނބުރި އަންނަ އަހަރަށް ކުރިމަތިލާ އިރު ވެސް، އުންމީދުން ފުރިގެންވާ ފިލްމުތަކެއް އަންނަ އަހަރަށް ވެސް އެބަ ހުއްޓެވެ.
އޭގެ ތެރެއިން އެންމެ އަވަހަށް ރިލީޒް ވާނެ ފިލްމަކީ ރަޖްނީކާންތު އާ އެކު އޭނާ ކުޅުނު "ކޮޗަދައްޔާން" އެވެ.
އޭގެ ފަހުން އަރުޖުން ކަޕޫރާ އެކު ކުޅުނު "ފައިންޑިން ފެނީ ފެނާންޑޭޒް" އާއި ޝާހުރުކް އާ އެކު ކުޅޭ "ހެޕީ ނިއު އިޔާ" ހިމެނެ އެވެ.
މީގެ އިތުރުން އިމްތިއާޒް އަލީގެ ފިލްމަކަށް ވެސް ދީޕިކާ ވަނީ ސޮއިކޮށްފަ އެވެ. މި ފިލްމުގައި އަނެއްކާ ވެސް އޭނާ ފެނިގެން ދާނީ ކުރީގެ ލޯބިވެރިޔާ ރަންބީރާ އެކުގަ އެވެ.
ބޮޑެތި ކާމިޔާބީތަކެއް ހޯދި ހަތަރު ފިލްމާ އެކު ދީޕިކާ 2013 ނިންމާލި އިރު، ދެން އޮތީ ކުރިއަށް ހުރި އެވޯޑް ހަފުލާތަކެވެ.
ގިނަ ބަޔަކު މިހާރު ވެސް ގަބޫލް ކުރާ ގޮތުގައި އަހަރުގެ ހުރިހާ އެވޯޑް ހަފުލާތަކެއްދައި ދީޕިކާ އެންމެ މޮޅު ބަތަލާގެ އެވޯޑް އުފުލާނެ އެވެ.