މިދިޔަ ހުކުރު ދުވަހު ރިލީޒްވި "ދޫމް 3" ތިން ދުވަހުގެ ތެރޭގައި 100 ކްރޯޑް ކުބަލަށް ވަދެ ރެކޯޑްތަކެއް މުގުރާލައިފި އެވެ.
ކުރިން ވެސް ބެލެވިފައިވާ ގޮތަށް "ދޫމް 3" ގިނަ ރެކޯޑްތަކެއް ހަދާނެ އެވެ.
އޭގެ އެންމެ ބޮޑު އެއް ސަބަބަކީ މި ފިލްމުގައި އެފަދަ ދެވަނައެއް ނެތް އާމިރް ހާން މުހިއްމު ރޯލެއް އަދާކޮށްފައިވުމެވެ.
ޔާޝްރާޖް ފިލްމްސް (ވައިއާރްއެފް) ގެ ކާމިޔާބް ފްރެންޗައިޒް "ދޫމް" ގެ ތިން ވަނަ ފިލްމުގައި އާމިރް ހާން ނެގަޓިވް ރޯލަކުން ފެނިގެންދާ އިރު، ފުރަތަމަ ފަހަރަށް އާމިރާ އެކު ކެޓްރީނާ ކެއިފް ވެސް ފެނިގެން ދިއުމަކީ މި ފިލްމަށް ބޮޑު ކާމިޔާބީއެއް ލިބޭނެ ކަމަށް ބެލެވުނު އެއް ސަބަބެވެ.
"ދޫމް" ގެ ކުރީ ދެ ފިލްމާ އެއްގޮތަށް "ދޫމް 3" ގައި އަބިޝެކް ބައްޗަން އާއި އުދޭ ޗޯޕްޅާ އެ މީހުންގެ ކުރީގެ ރޯލްތަކުން ފެނިގެން ދެ އެވެ.
މަޝްހޫރު ކްރިޓިކް އަދި ފިލްމީ ވިޔަފާރި ދިރާސާ ކުރާ ތަރަން އަދާޝް ބުނި ގޮތުގައި އާދީއްތައިގެ ނިޔަލަށް "ދޫމް 3" ވަނީ 107.61 ކްރޯޑް ރުޕީސްގެ ވިޔަފާރިކޮށްފަ އެވެ.
މި ރޭޓުން ދާ ނަމަ ކުރިއަށް އޮތް ދުވަސްތަކުގައި ޝާހްރުކް ހާންގެ "ޗެންނައި އެކްސްޕްރެސް" އާއި ރިތިކް ރޯޝަންގެ "ކްރިޝް 3" ހަދާފައިވާ ގިނަ ރެކޯޑްތަކެއް "ދޫމް 3" މުގުރާލާނެކަން މިހާރު ވަނީ ކަށަވަރުވެފަ އެވެ.
ބައެއް ޓްރޭޑް އެނަލިސްޓުން ލަފާ ކުރާ ގޮތުގައި "ދޫމް 3" 250 ކްރޯޑް ރުޕީސް އަށް ވުރެ ބޮޑު ވިޔަފާރިއެއް ކުރާނެ އެވެ.
އިންޑި އާއި ބޭރު ގައުމުތަކުގެ ބޮކްސް އޮފީހުގައި ވެސް "ދޫމް 3" ބޮޑު ކާމިޔާބީއެއް ހޯދަމުން އަންނަ އިރު، މި ފިލްމް ވަނީ ތަމަޅަ އާއި ތެލެގޫ ބަހުން ވެސް ޑަބްކޮށްގެން ނެރެފަ އެވެ.