އަންނަ އަހަރު ރާއްޖޭގައި ބޭއްވުމަށް ހަމަޖެހިފައިވާ އޭއެފްސީ ޗެލެންޖް ކަޕަށް ސ. ހިތަދޫ ޒޯން ސްޓޭޑިއަމްގައި ކުރަން ޖެހޭ މަސައްކަތްތަކަށް ކުރިން ހުޅުވާލި ބިޑު ބާތިލްކޮށް، އަލުން ބިޑަށް ލައިފި އެވެ.
ޗެލެންޖް ކަޕަށް ގަލޮޅު ދަނޑާއި ހިތަދޫ ދަނޑުގައި ކުރަން ޖެހޭ މަސައްކަތްތައް ފިނޭންސް މިނިސްޓްރީން ފުރަތަމަ ބީލަމަށް ހުޅުވާލީ މިދިޔަ މަހުގެ 28 ވަނަ ދުވަހު އެވެ.
ފިނޭންސް މިނިސްޓްރީން ނެރުނު އިއުލާނެއްގައި ބުނަނީ ކުރިން ކުރެވުނު އިއުލާންތަކަށް ބައެއް ބަދަލުތަކެއް ގެނެސް، ކުރިން ހުޅުވާލެވުނު ބިޑުތައް ބާތިލްކޮށް، އަލުން މި މަސައްކަތަށް ބީލަން ހުޅުވާލައިފައިވާ ކަމަށެވެ.
ކުރިން ކުރެވުނު އިއުލާނާ ހިލާފަށް، މި ފަހަރުގެ އިއުލާންގައި މަސައްކަތުގެ އަގު އަދާ ކުރަން ހަމަޖެހިފައި ވަނީ ދެ އަހަރު ދުވަހަށް ބަހާލައިގެންނެވެ.
އެ އިއުލާނިުގައި ބުނަނީ ބިޑް ފޮތަށް ފައިސާ ބަލައިގަތުން އޮންނާނީ މާދަމާ އިން ފެށިގެން މި މަހުގެ 30 ވަނަ ދުވަހާ ހަމައަށް ކަމަށެވެ.
ބިޑް ފޮތެއްގެ އަގަކީ 500ރ. އެވެ. ބިޑް ހުށަހަޅާ ފަރާތްތަކުން 30،000ރ. ގެ ބިޑް ސެކިއުރިޓީއެއް ބަހައްޓަން ޖެހެ އެވެ. ބިޑް ހުޅުވާނީ އަންނަ މަހުގެ 6 ވަނަ ދުވަހު އެވެ.
ޗެލެންޖް ކަޕަށް ރާއްޖޭން ތައްޔާރުވަމުން އަންނަ މިންވަރު ބެލުމަށް އޭއެފްސީގެ މަތީ ފެންވަރުގެ ވަފުދެއް މިދިޔަ ހަފުތާގެތެރޭ ރާއްޖެ ޒިޔާރަތްކޮށްފަ އެވެ.
އެ ވަފުދުން ވަނީ މުބާރާތް ބާއްވާ މާލެ އާއި އައްޑޫގެ ދަނޑުތައް ބަލައި އިންސްޕެކްޓްކޮށްފަ އެވެ.