ސ. ގަން އެއާޕޯޓްގެ ބިން ހިއްކުމުގެ މަސައްކަތް އަންނަ ހަފުތާގެ ތެރޭގައި އަލުން ފެށޭނެ ކަމަށް އައްޑޫ އިންޓަނެޝަނަލް އެއާޕޯޓް (އޭއައިއޭ) އިން ބުނެފި އެވެ.
އެ ކުންފުނީގެ މެނެޖިން ޑިރެކްޓަރު އާދަމް އާޒިމް މިއަދު ވިދާޅުވީ ދުބާއީގެ ގަލްފް ކޮބްލާ އިން މި މަހުގެ 11 ވަނަ ދުވަހު، މަސައްކަތް މެދުކަނޑާލީ ފައިސާގެ ތާށިކަން ދިމާވެގެން ކަމަށެވެ.
"އެކަމަކު މިހާރު ފައިސާގެ ކަންތައްތައް ހަމަޖެހިއްޖެ. އެހެންވީމާ އެކަމާ ގުޅޭ ހުރިހާ ޑޮކިއުމަންޓެއްގެ މަސައްކަތް އަންނަ ހަފުތާގެ ތެރޭގައި ނިންމާލައި، އަލުން މަސައްކަތް ފަށައި ގަނެވޭ،ެ" އެސްޓީއޯގެ އެމްޑީގެ މަގާމު ވެސް ފުރުއްވާ އާޒިމް ވިދާޅުވި އެވެ. "އޭރުން ދެން މަސައްކަތް ފެށިގެން ދާނީ ނުހުއްޓި ކުރިއަށް ގެންގޮސް ނިންމާލާ ގޮތަށް."
ދުބާއީގެ ގަލްފް ކޮބްލާ އިން ފައިސާގެ މައްސަލަ ދިމާވެގެން ދެ ވަނަ ފަހަރަށް މަސައްކަތް މެދުކަނޑާލި އިރު، ހިއްކަން ޖެހޭ ބިމުގެ 55 ޕަސެންޓް ވަނީ ނިންމައިފަ އެވެ. އަދި ފައިސާ ހަމަޖެހިގެން ނޫނީ އަލުން މަސައްކަތް ނުފެށޭނެ ކަމަށް އެ ކުންފުނިން ބުންޏެވެ.
މިއީ 11.7 މިލިއަން ރުފިޔާގެ މަޝްރޫއެކެވެ.