ފެމިލީ ކޯޓުގެ ގާޟީންގެ މަގާމަށް ކުރިމަތިލާން ހުޅުވާލައިފިއެވެ.
ޖުޑިޝަލް ސަރވިސް ކޮމިޝަން މިއަދު ކުރި އިއުލާންގައި ވަނީ ފެމިލީ ކޯޓަށް ދެ ގާޟީން ބޭނުންވާ ކަމަށެވެ. ފެމިލީ ކޯޓުގެ ގާޟީއަކަށް އަސާރީ މުސާރައިގެ ގޮތުގައި 30000 ރުފިޔާ ލިބޭއިރު އެހެނިހެން އިނާޔަތްތަކާއެކު ޖުމްލަ 46375 ރުފިޔާ މަހަކު ލިބޭނެ އެވެ.
ގާޟީކަމަށް ކުރިމަތިލެވޭނީ އުމުރުން 25 އަހަރުން މަތީގެ މީހުނަށެވެ. އޭގެ އިތުރުން މުސްލިމަކު ކަމުގައިވުމާއި، ސުންނަތް ޖަމާޢަތުގެ މީހަކަށް ވުމުގެ އިތުރުން ޤާނޫނުއަސާސީގެ ދަށުން ނުވަތަ ޤާނޫނެއްގެ ދަށުން އިންތިޚާބުކޮށްފައިވާ ނުވަތަ ޢައްޔަންކޮށްފައިވާ ސިޔާސީ މަޤާމެއް ފުރަމުންދާ މީހަކުކަމުގައިވެގެން ނުވާނެ އެވެ. ހަމަ އެހެންމެ ސިޔާސީ ޕާޓީއެއްގެ މެންބަރަކު ކަމުގައި ނުވަތަ ސިޔާސީ ޕާޓީއެއްގައި ޙަރަކާތްތެރިވާ މީހަކު ކަމުގައި ނުވުމަކީވެސް ޝަރުތެކެވެ.
މި މަގާމަށް ކުރިމަތިލާ ފަރާތްތައް ނެގުމުގައި އަމަލުކުރާނީ "ދިވެހިރާއްޖޭގެ ކޯޓުތަކަށް ފަނޑިޔާރުން ޢައްޔަނުކުރުމުގައި ޢަމަލުކުރާނެ ގަވާއިދު" ގައިވާ ގޮތުގެމަތީން ކަމަށްވެސް އިއުލާންގައިވެ އެވެ.