އައްޑޫ ސިޓީގެ ހުޅުދޫ އާއި މީދޫ އެ ސިޓީގެ އެހެން ރަށްތަކާ ގުޅާލަދޭ ބުރިޖަކީ ވަރަށް ބޭނުންތެރި އެއްޗެއް ކަމަށް ކުރީގެ ރައީސް ޑރ.މުހައްމަދު ވަހީދު ހަސަން މަނިކު ވިދާޅުވެއްޖެ އެވެ.
އައްޑޫ ބުރިޖާ ގުޅޭ ގޮތުން ކްލަބުހައުސްގެ ގުރޫޕެއްގައި ވާހަކަ ދައްކަމުން ޕީޕީއެމްގެ އިސް މުޝްތަސާރު ޑރ.ވަހީދު ވިދާޅުވީ ބުރިޖަކީ އައްޑޫ ސިޓީއަށް ވަރަށް މުހިންމު ކަމެއް ކަމަށާއި އެކަމަށް އެދި މަސައްކަތްކުރަން ޖެހޭ ކަމަށެވެ. ޑރ.ވަހީދު ވިދާޅުވީ އާއްމުންގެ މެދުގައި މަޝްވަރާ ކުރެވި ވިޝަންއެއް ހަދައި އެކި ފަރާތްތަކަށް ހިއްސާ ކުރުން ވަރަށް މުހިންމު ކަމަށެވެ. ކުރިއަށް އޮތް ރިޔާސީ އިންތިހާބުގައި ޕީޕީއެމް އިން ނެރޭ މެނިފެސްޓޯގައި އައްޑޫގެ ރައްޔިތުން އެދޭ ގޮތައް ބުރިޖް އަޅަން ހިމަނާ ދޭނެ ކަމަށް ވެސް ޕީޕީއެމްގެ ޕްރައިމަރީގައި ވާދަކުރެއްވުމުގެ ޝައުގުވެރިކަން ފާޅުކުރައްވާފައިވާ ވަހީދު ވިދާޅުވި އެެވެ.
"ޕީޕީއެމްގެ މެނިފެސްޓޯއާއި ލިޔުންތައް ތައްޔާރުކުރާއިރު ކަންކަން ހިމެނުއްވުމަށް އަޅުގަނޑަށް ފުރުސަތު ލިބެގެންދާނެ މަޝްވަރާ ދިނުމަށް.އަޅުގަނޑު މަސައްކަަތްކުރާނަން ބުރިޖް އެޅުން ހިމެނުމަށް،" ވަހީދު ވިދާޅުވި އެވެ.
ތަރައްގީގައި ޓްރާންސްޕޯޓަކީ ވަރަށް މުހިންމު ކަމެއް ކަމަށް ފާހަގަ ކުރައްވައި، ޑރ. ވަހީދު ވިދާޅުވީ އައްޑޫއަށް ބުރިޖަކީ އައްޑޫގެ ތަރައްގީއަށް އެންމެ މުހިންމު ހައްލު ކަމަށް ގަބޫލު ކުރައްވާ ކަމަށެވެ. އެހެން ނަމަވެސް ރަށްތައް ގުޅާލުމުގައި ފަހުގެ ޓެކްނޮލޮޖީއާ މެދު ވިސްނުމަކީވެސް މުހިންމު ކަމެއް ކަން ޑރ.ވަހީދު ފާހަގަ ކުރެއްވި އެވެ.
"އާ ޓެކްނޮލޮޖީއާ މެދު ވިސްނުން އެއީ ވަރަށް މުހިންމު ކަމެއް މި ވަގުތު. އެހެންވީމަ އެކަމާމެދު ވެސް ވިސްނުން އެއީ ވަރަށް މުހިންމު ކަމެއް،" ވަހީދު ވިދާޅުވި އެވެ.
އޭގެ އިތުރުން އައްޑޫގައި ޓްރާންސިޓް ބަނދަރެއް އޮތުން އެއީ ވަރަށް މުހިންމު ކަމެއް ކަމަށާއި އެކަން އަވަސް ކުރުމަކީ ވެސް ވަރަށް މުހިންމު ކަމެއް ކަމަށްވެސް ވަހީދު ވިދާޅުވި އެވެ.
"ފޯޅަވަހި މިހާރު މޮރިޝަސްއަށް އެދަނީ. އެހެންވީމަ އެމީހުން އެކަންކޮށްފި ނަމަ ރާއްޖެއަށް އެ ފުރުސަތު ގެއްލިގެން ހިނގައިދާނެ. އެހެންވީމަ ރާއްޖެއިން އެކަން (ޓްރާންސްސިޓް ބަނދަރު ގާއިމުކުރުން) އަވަސްކުރަން ޖެހޭ،" ޑރ.ވަހީދު ވިދާޅުވި އެވެ.
މީގެ އިތުރުން ޑރ.ވަހީދު ވަނީ އެމްޑީޕީގެ ވެރިކަމުގައި އައްޑޫ ސިޓީ ތަރައްގީ ކުރަން ވަރަށް ހާއްސަ ސަމާލުކަމެއް ދިން ކަމަށް ވިދާޅުވެފައި އެވެ. ނަމަވެސް އައްޑޫ ގަން އިންޓަރނޭޝަނަލް އެއާޕޯޓް ތަރައްގީ ކުރަން އޭރު ސަރުކާރުން މަސައްކަތްކުރިއިރު ބޮޑެތި ވިޔަފާރިވަރިވެރިންނާއި ސަރުކާރު ތެރެއިން އޭރުވެސް ހުރަސްތައް އައި ކަމަށް ވެސް ރައީސް ޑރ. ވަހީދު ވިދާޅުވި އެވެ.
" ވިޔަފާރިވެރިންވެސް ބުނަމުންދިޔަ އެހާ ބޮޑު ހޭދައެއްކޮށްގެން އެއާޕޯޓް ތަރައްގީކުރަން ބޭނުން ނުވާކަމަށް. ސަރުކާރުގެ އިދާރާތަކުން ހުރަސް އެޅި. އެތަނަށް ގެންދަން ޖެހޭ މެޝިނަރީތައް ގެންދަން. އެކަމު އެކަންވެސް ވި، އެކަމު އެއާޕޯޓް ބޮޑުކުރުމުގެ މަސައްކަތްފެށުނު،" ވަހީދު ވިދާޅުވި އެވެ.