ސަރުކާރު ހިންގާ މައި ޕާޓީ، އެމްޑީޕީގެ އިސްތިއުނާފް ފަނޑިޔާރުންގެ މަޖިލީހަށް މެމްބަރުން އިންތިހާބުކުރުން ވޯޓުދޭން ޖެހޭނީ ގައުމީ މަޖިލީހުގެ ޖަލްސާއަށް ފިލިކަލީ މެމްބަރުން ހާޒިރުވެގެން ކަމަށް ގައުމީ މަޖިލީހުން ފަސްކޮށްފި އެވެ. މިގޮތައް ފާސްކޮށްފައިވަނީ އެމްޑީޕީގެ އިސްތިއުނާފު ކޮމެޓީއަށް މެމްބަރުން އިންތިހާބުކުރަން ބޭއްވި ގައުމީ މަޖިލީހުގެ ޖަލްސާގައި އެ ވޯޓު ނެގެން ވާނީ މެމްބަރުން ސީދާ މަޖިލީހަށް ހާޒިރުވެގެން ކަމަށް ނިންމުމުންނެވެ.
އެމްޑީޕީގެ ގައުމީ މަޖިލީހުގެ އައްޑޫ ސިޓީގެ ރައީސް، އަހްމަދު އަދްހަމްގެ އެ ހުށައެޅުން ގައުމީ މަޖިލީހުން ފާސްކުރީ ޖަލްސާއަށް ހާޒިރުވެވަޑައިގެން ތިއްބެވި 116 މެމްބަރުންގެ ތެރެއިން 100 މެމްބަރުންގެ ވޯޓުންނެވެ.
އަދި ފިލިކަލީ މެމްބަރުން ހާޒިރުވާ ގައުމީ މަޖިލީހުގެ ޖަލްސާގައި އެ ވޯޓު ނަގާނީ ސިއްރު ވޯޓަކުން ކަމަށް ކަނޑައަޅަން އަދަހަމް ހުށައެޅުއްވި އެވެ. އެ ހުށައެޅުން ފާސްވީ ގައުމީ މަޖިލީހުން ފާސްވީ 98 މެމްބަރުންގެ ވޯޓުނެވެ. އެ ވޯޓު ސިއްރުކުރަން ނުފެންނަ ކަމަށް 19 މެމްބަރުން ވޯޓު ދެއްވި އެވެ.
އެ ނިންމުމާއެކު ރިޔާސަތުގައި އިންނެވި ހަސަން ލަތީފު ވިދާޅުވީ އިސްތިއުނާފު ކޮމެޓީއަށް މެމްބަރުން އިންތިހާބު ކުރަން ބާއްވާ ޖަލްސާ ހޯމަ ދުވަހު އޮންނާނެ ކަމަށެވެ.
މި މަހުގެ 21 ވަނަ ދުވަހު އިސްތިއުނާފު ފަނޑިޔާރުންގެ މަޖިލީހަށް ކުރިމަތިލާން ހުޅުވާލުމުން 18 މީހަކު އެ މަގާމަށް ކުރިމަތިލާފައިވާ ކަމަށް ރޭ ހަސަން ލަތީފު ވިދާޅުވި އެވެ. އޭގެ ތެރެއިން އިސްތިއުނާފު ކޮމެޓީގެ ރައީސްގެ މަގާމަށް ޝަރުތު ހަމަވަނީ ފަސް މީހަކު ކަމަށެވެ.
އިސްތިއުނާފު ކޮމެޓީއަށް ކުރިމަތިލި މެމްބަރުންނަކީ:
1. އަމީން ފައިސަލް
2. ފާތިމަތު ޝަހީދާ
3. އަހްމަދު ޒުހައިރު
4. ޝޫޒަން އިބްރާހިމް
5. އަހްމަދު އަފްރާހް
6. ފަޞާހް އަހްމަދު
7. އަހްމަދު ރިޝްވާން
8. ފާތިމަތު އިނާޝާ
9. ހުސެއިން ރަޝީދު
10. އިބްރާހިމް މުހައްމަދު ދީދީ
11. އަހްމަދު މައުރޫފު
12. ނައުޝާދު އަބްދުލް އަޒީޒް
13. މުހައްމަދު ކަމާލް
14. އަހްމަދު ނިޝާދު
15. ހަސަން ޒާހިރު
16. އާދަމް މާހިރު
17. އަބްދުލް މަޖީދު ޝަމީމް
18.0 އަނަސް އަބްދުއް ސައްތާރު
އިސްތިއުނާފު ކޮމެޓީއަށް މެމްބަރުން އިންތިހާބުކުރަން ނިންމީ ކުރިމަތިލާފައި ތިބި މެމްބަރުންގެ ތެރެއިން ކުރިމަތިލި ތަރުތީބުން ވޯޓަށް އަހަމުން ގޮސް އިންތިހާބު ކުރަން ޖެހޭ އަދަދަަށް މެމްބަރުން އިންތިހާބު ވުމުން ދެން އެހެން ނަމަކަށް ވޯޓަށް ނާހާ ގޮތަށެވެ. ނަމަވެސް ގައުމީ މަޖިލީހުގައި އިންނަވާ ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު ޔައުގޫބު އަބްދުﷲ ވަނީ ހުރިހާ ކެންޑިޑޭޓުނަށްވެސް ވޯޓަށް އެހުމަށްފަހު އެންމެ ގިނައިން ވޯޓު ލިބޭ ނުވަ މީހަކު އިންތިހާބުވީ ކަމަށް ކަނޑައަޅަން ހުށައަޅުއްވާފައި އެވެ. އެކަމު ރިޔާސަތުގައި އިންނެވި ހަސަން ލަތީފު ވިދާޅުވީ އެއީ މީގެ ކުރިން އަމަލުކުރަމުންދާ އުސޫލެއް ނޫން ކަމަށާއި އަމަލުކުރާނީ ކުރިންވެސް އަމަލުކުރަމުންދާ އުސޫލުން ކަމަށެވެ. ނަމަވެސް އެ ހުށައެޅުމަށްވެސް ވޯޓަށް އަހަން ޖެހޭނެ ކަމަށް ބުނެ އަލުން އެކަން ޔައުގޫބު ފާހަގަ ކުރުމުން ހަސަން ލަތީފު ނިންމީ އެ ހުށައެޅުމަށް ވޯޓަށް އެހުމަށެވެ. އެހެން ނަމަވެސް އެ އުސޫލު ބަދަލުކުރުމާ ދެކޮޅަށް ބައެއް މެމްބަރުން ނިޒާމީ ނުކުތާތަކެއް ނެންގެވުމުން ރިޔާސަތުން ވަނީ އެ ޕާޓީގެ ލީގަލް ޑިރެކްޓަރ ހިސާން ހުސެއިންގެ ލަފަޔަކަށް އެދިފައި އެވެ. ހިސާން ލަފާ ދެއްވީ އިންތިހާބުކުރަން ޖެހޭ އަދަދަށް މެމްބަރުން އިންތިހާބުވުން ދެން އިތުރަށް ވޯޓަށް އަހަން ނުޖެހޭނެ ކަމަށެވެ.
މުއްދަތު ހަމަވެފައިވާ ގައުމީ މަޖިލީހަށް އިސްތިއުނާފު މަޖިލިސް އިންތިހާބު ކުރެވިދާނެ ތޯ އުނގޫފާރު ދާއިރާގެ މެމްބަރު މުހައްމަދު ވަހީދު ވަނީ ސުވާލު އުފައްދާފައި އެވެ. އަކަމަށް ޖަވާބު ދެއްވަމުން ހަސަން ލަތީފު ވިދާޅުވީ އެއީ ގައުމީ މަޖިލީސް އޮތީ އިންތިހާބާ ހަމައަށް ދެމިގެންދާ ގޮތައް ކަމަށާއި އެހެން ކަމުން ގައުމީ މަޖިލީހުން ކުރަން ޖެހޭ ކަމެއް ނުކުރެވެންވީ ސަބަބެއް ނޫން ކަަމަށެވެ.
ގިނަ ދުވަސްތަކަށްފަހު ގިނަ މެމްބަރުން ތަކެއް ބައިވެރިވި އެމްޑީޕީގެ ގައުމީ މަޖިލީހުގެ ރޭގެ ޖަލްސާގައި އެމްޑީޕީ އެތެރޭގައި އޮތް ހަމަނުޖެހުގެ އަސަރު ވެގެންދިޔަ އެވެ. އެއް މެމްބަރުން އަނެއް މެމްބަރަށް ރައްދު ދިނުމާއި ނިޒާމީ ނުކުތާތައް ވެސް ރޭގެ ޖަލްސާގައި ގިނަކަން ފާހަގަވި އެވެ.