މޯލްޑިވްސް އޯޓިޒަމް އެސޯސިއޭޝަނުން ނެރުނު "އޯޓިޒަމް ކުދިންނަށް އުނގަންނައި ދިނުން" އަތްމަތީ ފޮތް ނައިބު ރައީސް ފައިސަލް ނަސީމް އިފްތިތާޙުކޮށްދެއްވައިފި އެވެ.
މިއަދު ހުޅުމާލޭގައި ހުންނަ މޯލްޑިވްސް އޯޓިޒަމް އެސޯސިއޭޝަންގެ ހޯލުގައި ކުރިއަށް ގެންދިޔަ މި ރަސްމިއްޔާތުގައި އެޑިއުކޭޝަން މިނިސްޓަރ ޑރ.އައިޝަތު ޢަލީވެސް ވަނީ ބައިވެރިވެވަޑައިގެންފައެވެ.
'އޯޓިޒަމް ކުދިންނަށް އުނގަންނައި ދިނުން' އަތްމަތީ ފޮތުގައި އޯޓިސްޓިކް ކުދިން ދެނެގަންނާނެގޮތާއި، އެކުދިންގެ ފަރުވާގައި ބޭނުންކުރެވިދާނެ ކަންކަމާއި، އެކުދިން މެނޭޖްކުރުމުގައި ބޭނުންކުރެވިދާނެ އުކުޅުތަކުގެ މަޢުލޫމާތު އެކުލަވާލާފައިވެއެވެ. އަދި މި ފޮތް ނެރުމުގެ ބޭނުމަކީ އޯޓިސްޓިކް ކުދިންނަށް ކިޔަވައިދޭން ބެލެނިވެރިންނާއި ޓީޗަރުންނަށް ބޭނުންކުރެވޭނެ އުކުޅުތައް ދެނެގަތުންކަމަށް އެ އެސޯސިއޭޝަނުން ވިދާޅުވެއެވެ.
މި އަތްމަތީ ފޮތް ނެރެދެއްވުމަށްފަހު ނާއިބު ރައީސް ފައިސަލް ނަސީމް ވިދާޅުވީ، މިއީ ދިވެހިރާއްޖޭގެ ރައްޔިތުންނަށް ލިބިގެންދިޔަ އަގުހުރި ހަދިޔާއެއް ކަމަށާއި، މި ފޮތުގެ ސަބަބުން ގިނަގުނަ ފާއިދާތަކެއް ކުރާނެކަން ނައިބު ރައީސް ފާހަގަކުރައްވާފައެވެ. ހަމައެހެންމެ، ރައީސް އިބްރާހިމް މުޙައްމަދު ޞާލިޙުގެ ވެރިކަމުގައި ތަޢުލީމީ ދާއިރާއަށް ދެއްވާ އަހަންމިއްޔަތުކަމަށް އަލިއަޅުވައި ނައިބު ރައީސް ވިދާޅުވީ، އެއްވެސް ކުއްޖަކު ބާކީ ނުކޮށް ސްކޫލުގައި ހުރިހާ ކުދިންނަށްވެސް ކިޔެވޭނެ މަގު ސަރުކާރުން ފަހިކޮށްދެއްވަމުން އަންނަ ކަމަށާއި، އެކަމަށްޓަކައި މިހާރުވެސް ސަރުކާރުން އެތަކެއް މަސައްކަތްތަކެއް ކުރައްވަމުން ގެންދަވާކަމަށެވެ. އެގޮތުން، ސްޕީޗް ތެރަޕީ އަދި އޮކިއުޕޭޝަނަލް ތެރަޕީގެ ދާއިރާއިން ރާއްޖޭގެ އެކި ރަށްރަށަށް އަމާޒުކޮށްގެން ހިލޭ ސްކޮލަރޝިޕްގެ ފުރުޞަތު ހުޅުވާލާފައިވާކަން ނާއިބު ރައީސް ފާހަގަކުރެއްވިއެވެ.
މީގެ އިތުރުން، ސަރުކާރުން މިހާރުވެސް ހުޅުމާލެ ހޮސްޕިޓަލުގައި ޗައިލްޑް ޑިވެލޮޕްމަންޓް ސެންޓަރެއް ޤާއިމުކުރެއްވުމުގެ މަސައްކަތް ކުރިއަށް ގެންދަވާކަމަށާއި، މި ސެންޓަރުގެވެސް އަމާޒަކީ އެ ދާއިރާއިން ބޭނުންޖެހިފައި ތިބި ކުދިންނަށް އިތުރު ފަރުވާއާއި ތަމްރީނު ދަސްކޮށްދިނުން ކަމުގައި އެމަނިކުފާނު ވިދާޅުވިއެވެ.
މި ރަސްމިއްޔާތަށްފަހު ނާއިބު ރައީސް ވަނީ އޯޓިޒަމް އެސޯސިއޭޝަނުގައި ހިމެނޭ ބައެއް ތަންތަން ބައްލަވައިލައްވާފައެވެ.