ކުރީގެ ރައީސް ޔާމީނަށް ހުކުމް އިއްވާފައިވަނީ ގާޒީން ރަހީނުކޮށްގެން ކަމަށް މައްސަލަ ބެލި ގާޒީންގެ ބެންޗުގައި ހުންނެވި ގާޒީ ހުސެއިން ފާއިޒް ރަޝާދު ވިދާޅުވެއްޖެ އެވެ.
ގާޒީ ފާއިޒް މިމޭރުމުން ވާހަކަދައްކަވާފައިވާ އޯޑިއޯ ރިކޯޑިންގއެއް ދިވެހިރާއްޖޭގެ ބައެއް ނޫސްތަކަށްވެސް މިހާރުވަނީ ލިބިފައެވެ.
މި ރިކޯޑިންގައި ގާޒީ ފާއިޒު އޭނާގެ ރަޙްމަތްތެރިއަކާ ވާހަކަދައްކަމުން ވިދާޅުވެފައިވަނީ މީހުން ރަހީނު ކުރެވޭނެ ބައިވަރު ގޮތްތައް ހުންނާނެކަމަށާއި، އޭނާ ރަހީނު ނުކުރި ނަމަވެސް އޭނާގެ އަނބިމީހާ ނުވަތަ ގާތްމީހަކު ރަހީނުކޮށްގެން ވެސް އަމަލެއް ހިންގިދާނެ ކަމަށެވެ. ހަމައެހެންމެ، ކުރީގެ ރައީސް ޔާމީންގެ މައްޗަށް ކުށް ސާބިތުވާކަމަށް ހުކުމް ކުރީ ބައިވަރު ސަބަބުތައް އެކަމުގައި ހުރެގެންކަމަށް އޭނާ ވަނީ ވިދާޅުވެފައެވެ. ނަމަވެސް އެކަމުގެ އިތުރު ތަފްޞީލެއް އެ އޯޑިއޯގައި އޭނާ ހާމަކުރައްވާފައެއް ނުވެއެވެ.
ކޮންމެއަކަސް، ކުރީގެ ރައީސް ޔާމީނަށް ހުކުމް ކުރީ ރަނގަޅަކަށް ކަމަށާއި އެކަން 2023ވަނަ އަހަރު އެނގޭނެ ކަމަށް ވެސް ފާއިޒު ވިދާޅުވިއެވެ. އަދި ފަސް ގާޒީންގެ ތިއްބަވާ ބެންޗަކުން އެންމެ ގާޒީއެއްގެ ރަޢުޔު ތަފާތު ވިޔަކަސް ނަތީޖާއަށް ބަދަލެއް ނާންނާނެކަމަށް އޭނާ ވިދާޅުވިއެވެ.
ރައީސް ޔާމީންގެ މައްސަލަ އެންމެ ފުރަތަމަ ބެއްލެވި އޭރުގެ އިސް ގާޒީ ހައިލަމް ސަސްޕެންޑް ކުރުމަށްފަހު އެ މައްސަލަ ފަހުން ބެލީ 5 ގާޒީންގެ ބެންޗަކުންނެވެ. އެ ބެންޗުގައި ފާއިޒުގެ އިތުރުން ދެން ތިއްބެވީ ގާޒީ އަލީ ރަޝީދު ހުސައިނާއި، ގާޒީ މުހައްމަދު ސަމީރާއި، ގާޒީ އަހުމަދު ޝަކީލާއި، ގާޒީ ޢަލީ އާދަމެވެ.
ގއ. ވޮޑަމުލާއާ ގުޅޭ މައްސަލައެއްގައި މަނީ ލޯންޑަރިންގެ ކުށް ސާބިތުވެ ރައީސް ޔާމީން ފަސް އަހަރަށް ޖަލަށް ލުމަށާއި، ޖޫރިމަނާ ކުރުމަށް ކްރިމިނަލް ކޯޓުން ހުކުމް ކުރީ، ނޮވެމްބަރު 28، 2019ގައެވެ.