އައްޑޫގެ ތަރައްގީ އަށް ގުޅޭ ކަންކަމުގަައި ވަކާލާތު ކުރާނެ ޖަމިއްޔާއެއް އުފެއްދުމުގެ މަސައްކަތް ފަށައިފި އެވެ.
މި މަސައްކަތުގައި އިސްކޮށް ހަރަކާތްތެރި ވަނީ ސ. ފޭދޫ ޕްރިންސަސް އިބްރާހީމް ރަޝީދެވެ.
އޭނާ "އައްޑޫ ލައިވް" އަށް ބުނީ އެ ޖަމިއްޔާ އުފައްދަނީ ވަރަށް ގިނަ ބަޔަކާ ވާހަކަ ދައްކައި މަޝްވަރާކޮށް، ގިނަ ބައެއްގެ ބައިވެރިވުމާ އެކު ކަމަށެވެ.
އެގޮތުން ޖަމިއްޔާ އުފެއްދުމާ ގުޅޭ ގޮތުން މިހާރު ވާހަކަ ދެކެވެމުން އަންނަ ކަމަށް ރަޝީދު ވިދާޅުވި އެވެ. އެހެން ނަމަވެސް މި ޖަމިއްޔާ ވުޖޫދަށް އަންނާނެ ދުވަހެއް އަދި ނޭނގެ އެވެ.
ރަޝީދު ބުނީ މައިގަނޑު މަގުސަދަކީ އައްޑޫގެ ތަރައްގީގެ ކަންކަމާ ގުޅޭ ގޮތުން ވަކާލާތު ކުރުން ކަމަށެވެ. އެގޮތުން ސަރުކާރުގެ ކަމާ ބެހޭ މުއައްސަތަކާ އެކު ގާތް ގުޅުމެއް ބާއްވައި، އައްޑޫގެ ތަރައްގީ އަށް ސަރުކާރުން ހިންގަން ނިންމޭ ޕްރޮޖެކްޓްތަކަށް ވާނުވާ ބަލަމުން ގެންދާނެ ކަމަށް އޭނާ ވިދާޅުވި އެވެ.
މިހާރު ވެސް އައްޑޫގެ ތަރައްގީގެ ކަންކަމުގައި އައްޑޫ ޑިވެލޮޕްމަންޓް ކޮމިޓީ (އޭޑީސީ) ގެ ނަމުގައި ހަރަކާތްތެރިވާ ގްރޫޕެއް އުޅެ އެވެ.
އެކަމަކު އެ ގްރޫޕްގައި އުޅޭ ގިނަ މީހުންނަކީ މާލޭގައި ދިރިއުޅޭ މީހުންކަން ފާހަގަކޮށްލެވެ އެވެ.
އެހެން ނަމަވެސް ރަޝީދު އުފައްދަން މަސައްކަތް ކުރާ ޖަމިއްޔާގައި ތިބޭނީ އައްޑޫގައި އަބަދު ވެސް ދިރިއުޅޭ މީހުން ކަމަށް ބެލެވެ އެވެ.