އައްޑޫގައި ހުރި ސަރުކާރުގެ އޮފީސްތަކުގެ ތެރެއިން، ރަސްމީ ގަޑި ނިމުމުން މީން ދުވަހަކު ވެސް ގައުމީ ދިދަ ނުބާލައި ހުންނަ އޮފީހަކީ ކޮބައި ހެއްޔެވެ؟
އެ ސުވާލުގެ ޖަވާބު ދޭން އައްޑޫގެ ވަރަށް ގިނަ ބަޔަކަށް ފަސޭހަ ވާނެ އެވެ. ސަބަބަކީ ގިނަ ބަޔަކު އާންމުކޮށް ދުއްވައި ހަދާ އައްޑޫ ލިންކް ރޯޑްގައި ހުންނަ އިމާރާތެއްގައި 24 ގަޑި އިރު ގައުމީ ދިދަ ނަގާފައި ހުންނަ ތަން ފެންނަން ހުރުމެވެ.
އެ ތަނަކީ މަރަދޫފޭދޫ ލިންކް ރޯޑްގައި ހުރި އެ ރަށު ޕަބްލިކް ހެލްތު ޔުނިޓެވެ.
އެ ތަނުގެ ދިދަ ދަނޑީގައި ނަގާފައި ހުންނަ ދިދަ ނުބާލާތާ މިހާރު ފަސް މަހަށް ވުރެ ގިނަ ދުވަސްވަނީ އެވެ. ސަބަބަކީ އެކަން ކުރާނެ މުވައްޒަފަކު ނެތުމެވެ.
މަރަދޫފޭދޫގައި ހުރި ޕަބްލިކް ހެލްތު ޔުނިޓްގައި މަސައްކަތް ކުރަނީ އެންމެ ދެ މުވައްޒަފުންނެވެ. އެއީ ދެ ހެލްތު ވޯކަރުންނެވެ. މަަސައްކަތު މީހެއް އެތަނަކު ނެތެވެ. އެހެންވެ ދިދަ ބާލާނެ މީހަކު ނެތުމުން، އެކަން ނުކުރެވެނީ އެވެ.
މަސައްކަތު މީހަކު ނެތުމުން އެތަނުގައި ކުނި ކަހައި ހަދާނެ މީހަކު ވެސް ނެތެވެ. އެ މަސައްކަތް މިހާރު ކުރަން ޖެހެނީ ތަނުގައި ތިބި ދެ ހެލްތު ވޯކަރުންނެވެ.
އެ މީހުން ބުނީ އެތަނުގެ ދިދަ ނުބާލައި އަބަދު ނަގާފައި ހުންނާތީ، ވަރަށް ގިނަ ބަޔަކު މަލާމާތްކޮށް، ދިމާކޮށް ވެސް ހަދާ ކަމަށެވެ.
ސަރުކާރުން، ގައުމީ ކަމެއްގައި ބައި ދަނޑި އަށް ދިދަ ތިރި ކުރާ ހާލަތްތަކުގައި ވެސް މަރަދޫފޭދޫ ޕަބްލިކް ހެލްތު ޔުނިޓްގެ ދިދަ ހުންނާނީ، ކުންނުގައި ވިހުރުވި ވިހުރި އެވެ.
އެތަނުގެ މުވައްޒަފަކު ބުނީ މީގެ ފަސް މަހެއްހާ ދުވަސް ކުރިން، ފޭދޫ ސިއްހީ މަރުކަޒުގެ މަސައްކަތު މީހަކު، މަރަދޫފޭދޫ ޕަބްލިކް ހެލްތު ޔުނިޓްގެ ދިދަ އަރުވައި ބާލައި ހެދި ކަމަށެވެ.
އެހެން ނަމަވެސް ވަގުތު ހުންނަ ގޮތުން އޭނާ އަށް އެކަން ނުވެގެން ވަކި ހިސާބަކުން ހުއްޓާލި ގޮތަށް މިހާރު، ދިދަ ހުންނަނީ އަބަދު ވެސް އައްވާއި ވާރޭގައި 24 ގަޑި އިރު ވިހުރުވި އެވެ.
މިކަން ހިތަދޫ ރީޖަނަލް ހޮސްޕިޓަލް (އެޗްއާރްއެޗް) ގެ ސަމާލު ކަމަށް އެތައް ފަހަރަކު، މަރަދޫފޭދޫ ޕަބްލިކް ހެލްތު ޔުނިޓުން ގެންގޮސްފި އެވެ.
އެހެން ނަމަވެސް އެކަމަށް ހައްލެއް ހޯދައި ދޭނެ ކަމަށް ތަކުރާރުކޮށް ބުނި ނަމަވެސް އެކަން ވާނެ ދުވަހެއް ނާންނަ ކަމަށް އެ ޔުނިޓުން ބުންޏެވެ.
މަރަދޫފޭދޫ ޕަބްލިކް ހެލްތު ޔުނިޓް ހިންގާ އިމާރާތަކީ މީގެ ކުރިން، ގިނަ މުވައްޒަފުންތަކަކާ އެކު ވަރަށް ރަނގަޅަށް ހިނގަމުން ދިޔަ އެ ރަށު ސިއްހީ މަރުކަޒެވެ.
އެހެން ނަމަވެސް ކުރީގެ ރައީސް މުހައްމަދު ނަޝީދުގެ ސަރުކާރުން ސިއްހީ ދާއިރާ އަށް ގެނައި ބަދަލުތަކާ ގުޅިގެން، އައްޑޫ ސިޓީ ކައުންސިލުން ވަނީ އެ އިމާރާތް އައްޑޫގެ ޕަބްލިކް ހެލްތު ޔުނިޓަށް ހަމަޖައްސައިފަ އެވެ.
އެއީ މަރަދު އާއި މަރަދޫފޭދޫގެ އިތުރުން ފޭދޫގައި ތިބި ޕަބްލިކް ހެލްތު ދާއިރާގެ މުވައްޒަފުންނާ އެކުގަ އެވެ.
އެހެން ނަމަވެސް އަނެއްކާ ގެނައި ބަދަލުތަކަކާ ގުޅިގެން މަރަދޫފޭދޫގައި ހުރި އައްޑޫ ޕަބްލިކް ހެލްތު ޔުނިޓަކީ، މާ ބޮޑު ބޭނުމެއް ނުހިފޭ، އެންމެ ދެ މުވައްޒަފުން ތިބި ތަނަކަށް ވަނީ ވެފަ އެވެ.
އެތަނުގެ ކަރަންޓާއި އިންޓަނެޓް ބިލަށް މަހަކު 6،000 އެއްހާ ރުފިޔާ އަރަ އެވެ.