30 އޮގަސްޓް 2021 އިން ފެށިގެން އެމް.ޓީ.ސީ.ސީގެ ފެރީތަކުން އައްޑޫގެ އަވަށްތަކަށް ދަތުރުކުރެވޭނީ އެއަވަށެއްގެ އެސް.އެސް.ޑީގެ ހުއްދަ އޮވެގެންކަމަށް އެމް.ޓީ.ސީ.ސީން ބުނެފިއެވެ.
އެމް.ޓީ.ސީ.ސީން މިގޮތަށް ބުނެފައިވަނީ އައްޑޫގައި ކޮވިޑް-19ގެ ޙާލަތު ގޯސްވެ، އައްޑޫގެ ގުޅިފައިވާ ރަށްތައް މޮނިޓަރިންއަށް ލާފައިވަނިކޮށެވެ. އެކުންފުނިން ހާމަކޮށްފައިވާ ގޮތުގައި ޒަރޫރީ ބޭނުންތަކަށް އައްޑޫގެ އެއް އަވަށުން އަނެއް އަވަށަށް ދަތުރުކުރަންޖެހިއްޖެ ހާލަތެއްގައި އެއަވަށެއްގެ އެސް.އެސް.ޑީގެ ނަގަންޖެހޭނެއެވެ.
އައްޑޫސިޓީގެ ހިތަދޫ، މަރަދޫ، މަރަދޫފޭދޫ، އަދި ފޭދޫގައި ކޮވިޑުގެ ވޭދަނަތައް ގިނަވުމުގެ ސަބަބުން އިއްޔެއިން ފެށިގެން މި އަވަށްތައް ވަނީ މޮނިޓަރިންއަށް ލާފައެވެ. ނަމަވެސް ހުޅުދޫ އަދި މީދޫ އަވަށް އޮތީ މޮނިޓަރިންގެ ހާލަތެއްގައި ނޫނެވެ.
މޮނިޓަރިންގައި އޮތް އަވަށްތަކުގައި ޚާއްޞަ ފިޔަވަޅުތަކެއް އައްޑޫސިޓީ ކައުންސިލުންވަނީ އަޅާފައެވެ. އެގޮތުން ރޭގަނޑު 9އަކުން ފަތިހު 4ކަށް ކާފިއު ހިންގުމުގެ އިތުރުން، ސިޓީއިން ފުރުމުގެ ކުރިން ނެގެޓިވް ޕީ.ސީ.އާރު ޓެސްޓަކާއެކު އައްޑޫ އީ.އޯ.ސީގެ ހުއްދަ ނަގަންޖެހޭނެ ކަމަށް ސިޓީ ކައުންސިލުން ވަނީ އިއުލާންކޮށްފައެވެ.
މިވަގުތު އައްޑޫގައި ކޮވިޑުގެ 167 އެކްޓިވް ކޭސް އޮތްއިރު، މިއަދު އެކަނިވެސް 14 މީހުން ވަނީ މި ބައްޔަށް ފައްސިވެފައެވެ.