އައްޑޫ ސިޓީ މީދޫ އަވަށުން ކޮވިޑް-19އަށް އެކަކު ޕޮޒިޓިވް ވެއްޖެއެވެ.
އައްޑޫ މީދޫއިން ވެސް މީހަކު ޕޮސިޓިވްވެފައިވާކަން ހުޅުމީދޫ ސިއްހީ މަރުކަޒުގެ މެނޭޖަރ އިބްރާހިމް ދީދީ ވަނީ އައްޑޫލައިވްއަށް ކަށަވަރު ކޮށްދެއްވާފައެވެ.
އިބްރާހިމް ދީދީ ވިދާޅުވީ އިއްޔެ އިރުއޮއްސި 6ގެ ފަހުން މީދޫއިން މި ބައްޔަށް މީހަކު ޕޮޒިޓިވްވެފައިވާ ކަމަށާއި، އެމީހާގެ ކޮންޓެކްޓް ޓްރޭސިންގ ހަދަމުން އަންނަ ކަމަށެވެ. އަދި ޑައިރެކްޓް ކޮންޓެކްޓުންގެ ޢަދަދެއް މިވަގުތު އެނގެން ނެތް ކަމަށެވެ.
އެނގިފައިވާ ގޮތުގައި މީދޫއިން ޕޮސިޓިވް ވެފައިވަނީ ސިއްހީ މަރުކަޒުގައި މަސައްކަތްކުރާ ނަރުހެއްގެ ބައްޕައެކެވެ. އަދި އޭނާ ޕޮސިޓިވްކަން އެނގުނީ އޭނާ މަރުކަޒަށް ޑޮކްޓަރަށް ދައްކަން ދިއުމުން ނެގި ސާމަޕަލުން ނެވެ.
އައްޑޫ މީދޫއިން ކޮވިޑަށް ޕޮޒިޓިވް ކޭސްއެއް ފެނިފައިވާއިރު، އައްޑޫގެ ގުޅިފައިވާ ރަށްތައް ކަމުގައިވާ ހިތަދޫ، މަރަދޫ، މަރަދޫފޭދޫ އަދި ފޭދޫވަނީ މޮނިޓަރިންގެ ޙާލަތަށް ގެނެސްފައެވެ. އައްޑޫ ސިޓީގެ ހުޅުދޫ އަވަށާއި މީދޫ އަވަށް މޮނިޓަރިންގއަށް ލާފައިނުވި ނަމަވެސް މި 2 އަވަށުންވެސް ކޮވިޑުގެ ކޭސްތަކެއް ވަނީ ފެނިފައެވެ.
އިއްޔެ އިރުއޮއްސި 6.00 އާ ހަމައަށް އައްޑޫއިން މި ބައްޔަށް 14 މީހުން ފައްސިވެފައިވާއިރު، އެކަކަށް އަންނަނީ ހޮސްޕިޓަލުގައި ފަރުވާ ދެމުންނެވެ.