އައްޑޫ ސިޓީ ހުޅުމީދޫ ކުނި ސައިޓްގައި އަނެއްކާވެސް ރޯކޮށްލައިފިއެވެ.
އިއްޔެގެ ވަގުތެއްގައިވެސް މި ސަރަޙައްދުގައި ރޯކޮށްފައި ހުއްޓާ ހުޅުމީދޫ ފަޔަރ ސްޓޭޝަނާއި ޕަބްލިކް ވޯކްސް ގުޅިގެންވަނީ އަލިފާންގަނޑު ނިއްވާފައެވެ.
މިކަމާ ގުޅިގެން މީދޫ ދާއިރާގެ ކައުންސިލަރ އާމިނަތު ޞާލިޙާ ވިދާޅުވީ، މި އަލިފާންގަނޑުން އަރާ ބޯ ދުމުގެ ސަބަބުން ކައިރީގައި ދިރިއުޅޭ ގެތަކުގެ މީހުންނަށް އެތަކެއް ތަކުލީފެއް އުފުއްލަން ޖެހިފައިވާ ކަމަށާއި، މިކަމަކީ ބަޔަކު ރާވައިގެން ކުރާ ކަމެއްކަމަށް ޤަބޫލުކުރެވޭ ކަމަށެވެ.
އޭނާ ވިދާޅުވި ގޮތުގައި ފަޔަރ ސްޓޭޝަނަށް އެކަނި އެ އަލިފާންގަނޑު ކޮންޓްރޯލްކުރަން އުނދަގޫވާތީ ޕަބްލިކް ވޯކްސްގެ އެހީއާއެކު އެކަން ކޮށްފައިވަނިކޮށް މިއަދު އަނެއްކާވެސް ބަޔަކު އެ ސަރަހައްދުގައި ރޯކޮށްފައިވާ ކަމަށެވެ.
"މިއަދު ހެނދުނު ޕަޔަރ އަދި ޕަބްލިކް ވޯކްސްގެ އެހީތެރިކަމާއެކު އެ ސަރަޙައްދުގައި ރޯކޮށްފައިވާ އަލިފާންގަނޑު ނިއްވި. ނަމަވެސް އަނެއްކާ ބަޔަކު ވަނީ އެތާނގައި ރޯކޮށްފައި. މިއީ ވަރަށް ހިތާމަހުރި ކަމެއް"، ޞާލިޙާ ވިދާޅުވިއެވެ.
މިރޭ ރޯކުރި އަލިފާންގަނޑު މިހާރު ނިއްވާލެވިފައިވިނަމަވެސް އަދިވެސް މި ސަރަޙައްދުގައި ރޯކޮށްފާނެކަމުގެ ބިރު އެ ސަރަހައްދުގައި ދިރިއުޅޭ އާންމުންގެ ހިތުތެރޭގައި އެބައޮތެވެ.